Elektaralny rejtynh Alaksandra Łukašenki ŭpieršyniu z sakavika 2012 hoda znoŭ pačaŭ prykmietna źnižacca, śviedčać źviestki śniežańskaha nacyjanalnaha apytańnia biełarusaŭ, praviedzienaha Niezaležnym instytutam sacyjalna-ekanamičnych i palityčnych daśledavańniaŭ (NISEPD, Litva).
Kali ŭ červieni 2012 hoda za Łukašenku hatovyja byli hałasavać 29,7% respandentaŭ, u śniežni — 31,5%, u sakaviku 2013 hoda — 33,4%, u červieni — 37,3%, u vieraśni — 42,6%, to ŭ śniežni 2013 hoda — tolki 34,8%. Hety rejtynh paćviardžajecca i adkazam na zakrytaje pytańnie, zhodna ź jakim za Łukašenku hatovyja hałasavać 32,6%.
Upieršyniu ŭ 2013 hodzie kolkaść tych, chto nie daviaraje Łukašenku, značna pieravysiła kolkaść tych, chto daviaraje, — 47,5% suprać 37,7% (u sakaviku było 43,2 i 43,4%, u červieni — 40,6 i 48,9%, u vieraśni — 36,7 i 46,7%).
Aceńvajučy zajavu Łukašenki pra toje, što «paskoranaja madernizacyja pradpryjemstvaŭ u 2013 hodzie — załoh umacavańnia biełaruskaj dziaržaŭnaści i rostu dabrabytu naroda», 59% skazali, što «bolšaja častka płana pa madernizacyi pradpryjemstvaŭ u 2013 hodzie faktyčna pravalena» (supraćlehłaha punkta hledžańnia prytrymlivajucca 25,4%).
Z vykazvańniem Łukašenki: «Kali vy budziecie biehać z ranicy da viečara pa abmiennych punktach i skuplać valutu, vy sami pryviedziacie da taho, što asłabicie svaju nacyjanalnuju valutu», — nie pahadzilisia 61,3% (pahadzilisia 34,7%).
Da jaho prapanovy «brać pošlinu ŭ 100 dołaraŭ z kožnaha hramadzianina Biełarusi, jaki vyjazdžaje za miažu», admoŭna pastavilisia 64,7% (stanoŭča — 14,1%).
Z zajavaj Łukašenki pra toje, što ŭ budaŭnictva Pałaca Niezaležnaści ŭ Minsku nibyta nie ŭkładziena «nivodnaha biudžetnaha rubla», nie pahadzilisia 60% (pahadzilisia 21,9%).
Inicyjatyvu ŭvieści padatak na biespracoŭnych i dziaržpošlinu za vydaču dazvołu na dopusk transpartnaha srodku da ŭdziełu ŭ darožnym ruchu ŭchvalili 22,5%, nie ŭchvalili — 60,5%.
Aceńvajučy «palityčnuju stratehiju kiraŭnictva krainy na čale z Łukašenkam», 36% adkazali: «jak mahčyma doŭha zastavacca va ŭładzie i kantralavać situacyju ŭ krainie», 25,3% — «padtrymlivać hramadski paradak i palityčnuju stabilnaść», 22,6% — «damahacca pastupovaha palapšeńnia jakaści žyćcia hramadzian». Pry hetym 22,5% miarkujuć, što «nijakaj stratehii niama».
Upieršyniu sa śniežnia 2011 hoda kolkaść apytanych, jakija ličać, što paśla sychodu Łukašenki z pasady prezidenta žyćcio ŭ Biełarusi palepšycca, pieravysiła kolkaść tych, chto prytrymlivajecca supraćlehłaj dumki: 25,2% suprać 21,5% (u śniežni 2012 hoda było 24,5% suprać 25,9%).
NISEPD taksama paviedamlaje, što nazirajecca značnaje źnižeńnie ŭzroŭniu davieru nasielnictva praktyčna da ŭsich instytutaŭ dziaržaŭnaj ułady: kali ŭ vieraśni armii daviarali 52,8%, sudam — 40,8%, dziaržaŭnym ŚMI — 38,1%, KDB — 37,2%, prakuratury — 37,8%, uradu — 35%, milicyi — 37,4%, FPB — 34,1%, Nacyjanalnamu schodu — 33,1%, miascovym vykanaŭčym kamitetam — 30,5%, to ŭ śniežni — 44,1, 34,9, 31,6, 33,9, 34,5, 29,4, 34,9, 30, 31,5 i 28,6% adpaviedna. Kali ŭ vieraśni 39,1% mierkavali, što ŭ ciapierašnim ekanamičnym kryzisie vinavaty ŭrad, a 17,2% — parłamient, to siońnia tak dumajuć 42 i 19,6% respandentaŭ.
Pry hetym NISEPD zaznačaje, što apytańnie pravodziłasia da vydzialeńnia dvuchmiljardnaha kredytu, padpisańnia hazavaha kantrakta na 2014 hod i inšych prefierencyj, dadzienych niadaŭna Biełarusi Rasijaj. Chutčej za ŭsio, «załataŭšy dzirki» ŭ biudžecie ź ich dapamohaj, biełaruskim uładam na niejki čas znoŭ udasca stabilizavać situacyju, zaznačajecca ŭ pres-relizie
Kamientary