Achvotnych vykupić va ŭładaŭ pałac Radziviłaŭ u Pałanečcy nie znajšłosia
Da pačatku tarhoŭ pa prodažy dziaržaŭnych abjektaŭ nieruchomaści nie nadyšło nivodnaj zajaŭki na pakupku byłoha pałaca Radziviłaŭ u Pałanečcy.
Na pieradnavahodnim aŭkcyjonie, jaki 30 śniežnia pravioŭ Brescki abłasny fond dziaržaŭnaj majomaści, prodaž pomnika architektury nie adbyŭsia. Dvuchpaviarchovy pałac, pabudavany ŭ 1836 hodzie, pa-raniejšamu znachodzicca va ŭłasnaści adździeła adukacyi, sportu i turyzmu Baranavickaha rajvykankama. Jaho pačatkovy košt na aŭkcyjonie składaŭ paŭmiljarda biełaruskich rubloŭ.
«My paviedamim ułaśniku pra toje, što tarhi pa dadzienym abjekcie nieruchomaści nie adbylisia. I jon užo budzie vyrašać: ci znoŭ vystaŭlać hety budynak na prodaž, ale, mahčyma, za mienšuju canu, ci pakinuć sabie», — raspaviali aŭkcyjanisty fondu «Brestabłmajomaść» pa zakančeńni tarhoŭ.
Pałac vystaŭlaŭsia na prodaž razam z frahmientam aharodžy, padpornaj ścienkaj i leśvicaj – usio razam uniesiena ŭ śpis historyka-kulturnych kaštoŭnaściaŭ Respubliki Biełaruś. Taksama ŭ dadatak pryvatnamu ŭłaśniku prapanoŭvalisia raźmieščanyja pobač budynki savieckich časoŭ. Ziamielny ŭčastak u zonie achovy pomnikaŭ architektury płoščaj zvyš 1 Ha prapanoŭvaŭsia ŭ arendu na 50 hod. Pa ŭmovach aŭkcyjonu tut dazvalałasia raźmiaščać abjekty hramadskaha charčavańnia, handlu, pasłuh.
Pałacava-parkavy ansambl u vioscy Pałanečka Baranavickaha rajona naležaŭ Macieju Radziviłu, viadomamu dramaturhu i kampazitaru. U hady Druhoj suśvietnaj pałac byŭ paškodžany. U savieckija časy jaho adnavili, źmianili płaniroŭku, i źmiaścili tut škołu-internat. Paśla taho jak ŭ 90-ja hady ŭ budynku pravaliŭsia dach, pałac staić zakinuty.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym5
Kamientary