Nacyjanalny bank Biełarusi ŭ 2014 hodzie nie budzie źmiakčać hrašova-kredytnuju palityku na fonie dasiahnutych damoŭlenaściaŭ u častcy pryciahnieńnia nieabchodnych abjomaŭ źniešnich pazyčańniaŭ dla papaŭnieńnia dziaržaŭnych zołatavalutnych reziervaŭ, «naadvarot, žorstkaść padychodaŭ da jaje praviadzieńnia budzie ŭzmocniena».
Adpaviednyja rašeńni pryniaty na pasiadžeńni praŭleńnia Nacyjanalnaha banka 3 studzienia, paviedamlaje ŭpraŭleńnie infarmacyi i hramadskich suviaziaŭ Nacbanka.
Tak, realizacyja mier pa pavyšeńni efiektyŭnaści bankaŭskaha kredytavańnia dazvolić u I kvartale hetaha hoda abmiežavać pryrost patrabavańniaŭ da ekanomiki na ŭzroŭni da 0,7% u siarednim za miesiac. Takija tempy kredytavańnia adpaviadajuć hadavomu prahnozu, dazvalajuć zabiaśpiečvać nieabchodnaje raźvićcio ekanomiki bieź niehatyŭnaha ŭpłyvu na makraekanamičnuju zbałansavanaść.
«Žorstkaść padychodaŭ da refinansavańnia bankaŭ z boku Nacyjanalnaha banka taksama budzie ŭzmacniacca, stymulujučy banki zabiaśpiečvać praviadzieńnie aktyŭnych apieracyj stroha ŭ adpaviednaści z najaŭnymi resursnymi mahčymaściami», — adznačyli ŭ Nacbanku.
Staŭka refinansavańnia ŭ studzieni 2014 hoda zachavajecca na raniejšym uzroŭni, a «nadalej jaje źmianieńni buduć ažyćciaŭlacca ŭ zaležnaści ad dynamiki inflacyi i situacyi na finansavym rynku i nasić płaŭny charaktar».
«Pry hetym bazavym pryncypam pracentnaj palityki ŭ 2014 hodzie zastaniecca padtrymańnie dachodnaści pa rublovych instrumientach, jakaja pieravyšaje dachodnaść zachoŭvańnia srodkaŭ u zamiežnaj valucie i zabiaśpiečvaje nadziejnuju abaronu źbieražeńniaŭ ad inflacyi. U svaju čarhu, heta budzie sadziejničać umacavańniu davieru da nacyjanalnaj valuty i dedałaryzacyi ekanomiki», — adznačajecca ŭ kamientary.
Jak zapeŭnivaje Nacbank, sioleta praciahniecca praviadzieńnie kursavoj palityki, jakaja zabiaśpiečvaje farmiravańnie abmiennaha kursu biełaruskaha rubla na asnovie popytu i prapanovy. Pry hetym Nacyjanalny bank «nie dapuścić rezkich vahańniaŭ kursu, zhładžvajučy ich svaimi instrumientami».
Kamientary