Śviatłana Kalinkina: Chakieisty prezidenckaj kamandy atrymali zvańni zasłužanych majstroŭ sportu. Nie śmiešna!

Spartoŭcy kažuć, što heta śmiešna. Chakieisty-vieterany-amatary z prezidenckaj kamandy atrymali zvańni zasłužanych majstroŭ sportu Respubliki Biełaruś — i sapraŭdnym spartoŭcam takaja navina zdałasia śmiešnaj.

Bo heta jak čałavieku, što časam ukručvaje doma lampački, prysvoić zvańnie zasłužanaha enierhietyka.

Jak sknaru-ciešču ŭznaharodzić zvańniem zasłužanaha ekanamista.

Jak dziejača, jaki ŭmieje napisać na płocie viadomaje słova z troch litar, nazvać piśmieńnikam.

Heta śmiešna, tamu što ŭ saviecki čas «zasłužanych» davali TOLKI alimpijskim čempijonam!

Uładzimir Parfianovič — zasłužany majstar sportu. Trochrazovy alimpijski čempijon, adziny ŭ śviecie bajdaračnik, jaki vyjhraŭ try załatyja miedali ŭ ramkach adnych Alimpijskich hulniaŭ.

Kaciaryna Karsten — zasłužany majstar sportu. Pieršaja i adzinaja dvuchrazovaja alimpijskaja čempijonka ŭ historyi niezaležnaj Biełarusi, šmatrazovaja čempijonka śvietu ŭ viesłavańni na adzinočcy.

Vital Ščerba — zasłužany majstar sportu. Znakamity himnast, šaścirazovy alimpijski čempijon, adziny ŭ historyi niepłyviec, jaki vyjhraŭ šeść załatych uznaharod na adnych Hulniach, adzin z najlepšych himnastaŭ usich časoŭ, adziny mužčyna, jaki rabiŭsia čempijonam śvietu va ŭsich vaśmi dyscyplinach — asabistym i kamandnym pieršynstvach, a taksama na ŭsich šaści snaradach…

Nie viedaju, jakoje zaćmieńnie pavinnaje zdarycca, kab adnolkava aceńvać zasłuhi pierad sportam Vitala Ščerby, Sašy Hierasimieni, Darji Domračavaj, Siarhieja Martynava i haspadara budaŭničych kampanij Paŭła Biełaha.

Nie viedaju, čym treba kiravacca, kab u vyniku pastavić u adzin šerah spartoŭcaŭ Alaksandra Hleba, Viktoryju Azaranka, Maksa Mirnaha i niejkich Hienadzia Saviłava i Siarhieja Zadzialenava.

Urešcie, heta całkam supiarečyć biełaruskamu zakonu ab dziaržaŭnych uznaharodach, jaki elemientarna nie dazvalaje prysvojvać hanarovyja zvańni za traplańnie ŭ pisuar abo ŭ plavalnicu.

Tak, artykuł 59 hetaha zakona abviaščaje: «Hanarovaje zvańnie «Zasłužany majstar sportu Respubliki Biełaruś» prysvojvajecca spartoŭcam, u tym liku spartoŭcam-invalidam, za dasiahnieńnie vysokich vynikaŭ na Alimpijskich, Paralimpijskich i Suśvietnych hulniach, čempijanatach, pieršynstvach i Kubkach śvietu i Jeŭropy».

Naprykład, kryter «vysoki vynik» — heta acenačny kryter. Niechta moža śćviardžać, što ŭznaharodžvać treba tolki za pieršaje miesca, za «zołata», niechta — što samo traplańnie na Alimpijadu vartaje ŭznaharody. Ale ŭsio astatniaje absalutna zrazumieła prapisana: dla atrymańnia zvańnia ZMS jak minimum treba chacia b nie ŭdzielničać u dvarovych spabornictvach i nie ŭ kaladnych i ŭsiakich padobnych šou.

Hulcy prezidenckaha chakiejnaha kłuba prosta nie ŭdzielničali ŭ turnirach, za jakija moža być prysvojenaje zvańnie «Zasłužany majstar sportu». Jany nie pakazali na ich nijakaha vyniku — ni vysokaha, ni nizkaha, tamu što ich tam nie było i być nie mahło. Ni na Alimpijadzie, ni na Kubku śvietu, ni na pieršynstvach Jeŭropy…

Jany, pa vialikim rachunku, nie spartoŭcy. Jany — absłuhoŭvajučy piersanał. Jany — tyja, chto nie daje kiraŭniku dziaržavy sumavać, chto i jaho zabaŭlaje, i sam zabaŭlajecca, chto jamu ciešyć samalubstva i nie zabyvaje ab svaim. Jak na mianie, jany bolš padyšli b da naminacyj «Śfiera absłuhoŭvańnia» abo «Zasłužany vynachodnik», ale nijak nie ŭ katehoryju «Sport».

Dać zvańnie zasłužanaha majstra sportu ludziam, zasłuhi jakich pierad sportam zaklučajucca ŭ tym, kab pa pieršym zvanku źjavicca zabaŭlać prezidenta hulnioj u chakiej, — heta plavok u sapraŭdnych spartsmienaŭ.

Heta plavok u tych, chto praz pot i kroŭ, praz hady i dziesiacihodździ ciažkich trenirovak, praz traŭmy, bol i ciažkuju pracu išoŭ da svaich pieramoh.

Heta nie śmiešna.

Apytanka

• 0
• 0
• 0
• 0
• 0
• 0
• 0
• 0