Brescki śledčy kamitet nie znajšoŭ składu złačynstva ŭ pierapiscy hałoŭnaha redaktara adnoj z haziet ź niepaŭnaletnim, jakuju pieradali ŭ milicyju łaŭcy piedafiłaŭ.
U časie śledstva było praviedziena šeść mastactvaznaŭčych ekśpiertyz, apytana bolš za 20 čałaviek, ahledžanaje miesca zdareńnia, žytło i miesca pracy redaktara.
U vyniku było pryniataje rašeńnie admović u zaviadzieńni kryminalnaj spravy «ŭ suviazi z adsutnaściu składu złačynstva» pavodle troch artykułaŭ Kryminalnaha kodeksa — hvałtoŭnyja dziejańni seksualnaha charaktaru, dziejańni seksualnaha charaktaru z asobaj, jakaja nie dasiahnuła paŭnalećcia, i raspusnyja dziejańni.
Redaktara ŭ ruki milicyi pieradali bresckija palaŭničyja na piedafiłaŭ z supołki «Bolš być, čym zdavacca».
Aktyvisty zajavili, što zatrymali 58-hadovaha mužčynu, kali jon pryjšoŭ na spatkańnie z 15-hadovym chłopčykam. Palaŭničyja na piedafiłaŭ apaviali milicyi, što redaktar pryjšoŭ da chłopčyka z namieram učynić seksualnyja dziejańni, i ŭ dokaz hetaha pieradali milicyjantam jaho listavańnie z chłopčykam u sacyjalnych sietkach.
Adzin z aktyvistaŭ supołki baraćbitoŭ ź piedafiłami Alaksiej tak prakamientavaŭ hetuju situacyju:
«Da Śledčaha kamiteta pretenzijaŭ niama, śledčy vielmi tałkovy. Vidać, dzieści my dapuścili pamyłku, raz nie chapiła materyjałaŭ dla zaviadzieńnia kryminalnaj spravy… Vidać, u listavańni z chłopčykam niama schileńnia da seksualnaha kantaktu, dyj porna, jakoje jon prynios z saboj na fłešcy, taksama było nie dla chłopčyka pryznačanaje… Nakont redaktara — nu, pra sumleńnie havaryć śmiešna ciapier, ale, ja dumaju, žyćcio jašče pastavić usio pa miescach…»
Surazmoŭca raskazaŭ, što na hetym supołka palaŭničych na piedafiłaŭ aficyjna zaviaršaje svaju dziejnaść:
«Z boku hramadskaści nie nadta pryjemna čuć na svoj adras «hopniki» i da t. p. Nas užo i fašystami nazyvali, i kim tolki nie nazyvali. Choć, pa sutnaści, usio prosta — my lubim svaju Radzimu, svoj narod i staralisia zrabić niešta bolšaje, čym prosta siadzieć skłaŭšy ruki. Sprabavali danieści da baćkoŭ, što treba zajmacca dziećmi, a nie pić piva na łaŭkach. Kryŭdna, što nas nie pačuli i nie zrazumieli…
Paśla ŭsiaho, što adbyłosia, my nie bačym sensu zajmacca našaj dziejnaściu. Jak akazałasia, naš ruch nikomu nie patrebny. Dla hramadskaści my pierastajom isnavać, i ciapier nie budzie bačna infarmacyi pra našu dziejnaść. Choć heta i nie kaža pra toje, što my nie budziem ničoha rabić».
Supołka bresckich baraćbitoŭ ź piedafiłami «Bolš być, čym zdavacca» adznačyłasia nie tolki hučnaj spravaj z redaktaram. Za čas svajoj dziejnaści aktyvisty złavili taksama vykładčyka budaŭničaha kaledža i jašče kala 7 asobaŭ. U adroźnieńnie ad šmatlikich rasijskich supołak łaŭcoŭ piedafiłaŭ, bieraściejskija aktyvisty nie ŭžyvali ŭ dačynieńni da złoŭlenych hvałtu.
Stała viadoma pra śmierć 22-hadovaha chłopca, jakoha asudzili pa palityčnaj kryminałcy2
Kamientary