Infarmacyja pra toje, što ŭ Minharvykankamie — novy staršynia kamiteta architektury i horadabudaŭnictva, źjaviłasia siońnia ŭ sacyjalnych sietkach. Jak akazałasia, pryznačeńnie adbyłosia jašče ŭ kancy śniežnia 2013 hoda.
Na aficyjnym sajcie Minharvykankama staršyniom kamiteta architektury i horadabudaŭnictva značycca ŭžo nie Alaksandr Piatroŭ, a Mikałaj Ułasiuk.
Infarmacyju pra toje, što kiruje kamitetam ciapier jon i adbyłosia pryznačeńnie jašče «ŭ kancy śniežnia», paćvierdziŭ ranicaj 15 studzienia sam Mikałaj Mikałajevič. Alaksandr Piatroŭ budzie pracavać u «Minskhrada».
Viadoma, što jašče ŭ listapadzie 2013 Mikałaj Ułasiuk zajmaŭ pasadu namieśnika dyrektara pa navucy BiełNDI horadabudaŭnictva, a raniej — byŭ zahadčykam kafiedry architekturnaha prajektavańnia i malunka Bresckaha techničnaha univiersiteta.
U kancy śniežnia 2013 hoda Mikałaj Ułasiuk ŭ hrupie bresckich architektaraŭ udzielničaŭ u konkursie prajektaŭ kancepcyi architekturnaj zabudovy «Minsk-Sici». Kancepcyja hetaj aŭtarskaj hrupy była pryznana adnoj z najlepšych.
Alaksandr Piatroŭ byŭ kiraŭnikom kamiteta architektury i horadabudaŭnictva ź listapada 2011 hoda.
Niahledziačy na toje, što pryznačeńnie prajšło vielmi cicha, aficyjnaja infarmacyja pra heta ŭ drukavanych ŚMI ŭsio ž źjaŭlałasia — 10 studzienia ŭ haziecie «Minski Kurjer» ŭ rubrycy «Pradstaŭlajem kiraŭnikoŭ». Tady ž paviedamili ab pryznačeńni staršynioj kamiteta budaŭnictva i inviestycyj Fiodara Rymašeŭskaha.
Stała viadoma pra śmierć 22-hadovaha chłopca, jakoha asudzili pa palityčnaj kryminałcy2
Kamientary