Vydača kredytaŭ biez daviedak ab dachodach moža być zabaroniena
Vydača kredytaŭ nasielnictvu biez daviedak ab dachodach moža być zabaroniena, paviedamili pradstaŭniki niekalkich bankaŭ.
Pavodle słoŭ bankiraŭ, pryniaćcie hetaha rašeńnia pryviadzie da značnaha skaračeńnia abjomaŭ spažyvieckaha kredytavańnia ŭ miescach prodažaŭ. «Siońnia ŭ kramach znachodziacca supracoŭniki bankaŭ, jany zadavalniajuć impulsny popyt pakupnikoŭ, kali ludzi ŭbačyli tavar i žadajuć jaho adrazu ž kupić. Zrazumieła, što, kali bankiry zapatrabujuć u pakupnikoŭ daviedku ab dachodach, apošnija nie zmohuć zadavolić impulsnaje žadańnie kupić tavar u kredyt», — rastłumačyŭ top-mieniedžar adnaho z kamiercyjnych bankaŭ.
Pa stanie na 1 studzienia 2014 hoda zavinavačanaść nasielnictva pierad bankami pa spažyvieckich kredytach składała 14,9 trłn rubloŭ i pavialičyłasia amal na 45% za minuły hod.
Pavodle mierkavańnia ekśpiertaŭ, płany Nacbanka ŭvieści zabaronu na vydaču kredytaŭ nasielnictvu biez daviedak ab dachodach mohuć być źviazany z uzmacnieńniem žorstkaści hrašova-kredytnaj palityki ŭ pačatku hetaha hoda. Nahadajem, što ŭ pačatku 2014-ha Nacbank zajaviŭ pra abmiežavańnie pryrostu kredytavańnia ekanomiki na ŭzroŭni 0,7% za miesiac.
«Z punkta hledžańnia ŭzmacnieńnia žorstkaści hrašova-kredytnaj palityki razhladanaje rašeńnie karysnaje. Kali my chočam bolš nizkuju inflacyju, abjomy ŭnutranaha popytu nieabchodna abmiažoŭvać i abjomy kredytavańnia źnižać», — adznačaje finansavy analityk aficyjnaha partniora «Alpary» ŭ Minsku Vadzim Iosub.
U svaju čarhu, pradstaŭniki niekatorych kamiercyjnych bankaŭ ličać, što zabarona na vydaču spažyvieckich kredytaŭ biez daviedak ab dachodach moža być abumoŭlena imknieńniem hrašovych uład abmiežavać spažyviecki impart.
Ekanamist Biełaruskaha ekanamičnaha daśledča-adukacyjnaha centra (BEROC) Dźmitryj Kruk u hetaj suviazi miarkuje, što ŭ vypadku ŭviadzieńnia zabarony na vydaču kredytaŭ nasielnictvu biez daviedak ab dachodach roźničnyja banki mohuć pasprabavać abyści hetaje abmiežavańnie.
«U pryvatnaści, havorka moža iści ab tym, što banki buduć kredytavać nie nasielnictva, a abjekty handlu, jakija stanuć prapanoŭvać kupić tavar u rasterminoŭku», — miarkuje ekanamist.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym2
Kamientary