Ad 21 listapada, ad pačatku masavych pratestaŭ va Ukrainie, 136 žurnalistaŭ paciarpieła padčas abo ŭ vyniku vykanańnia prafiesijnych abaviazkaŭ. Takija dadzienyja Instytuta masavaj infarmacyi, jaki adsočvaje, fiksuje i praviaraje infarmacyju ab paciarpiełych žurnalistach, fatohrafach i apieratarach u čas vykanańnia imi prafiesijnych abaviazkaŭ u zonie sutyknieńniaŭ pratestoŭcaŭ, milicyi i citušak ŭ Kijevie i inšych haradach. Pad uvahu bralisia tolki vypadki, źviazanyja z prafiesijnaj dziejnaściu, i takija, dzie žurnalisty atrymali realnyja ranieńni abo paškodžańnia techniki.
Bolšaść žurnalistaŭ — 80 vypadkaŭ — paciarpieli za apošnija 2 tydni (ad 19 studzienia da 2 lutaha 2014 h.).
Najbolš žurnalistaŭ paciarpieła ad źbićcia milicyjaj ci bajcami «Bierkuta» — 54 vypadki. 27 žurnalistaŭ atrymali ranieńni ad vybuchu śviatła-šumavych hranat, na 21 rabotnika ŚMI napadali cituški. Było zafiksavana 17 vypadkaŭ ranieńniaŭ žurnalistaŭ ad kul, jakija lacieli z boku milicyi na vuł. Hrušeŭskaha ŭ Kijevie. Taksama było 2 vypadki, kali bierkutaŭcy celili žurnalistam u kamiery, adnak tyja paśpiavali schavacca i kuli lacieli mima.
Jašče 19 žurnalistaŭ paciarpieli ŭ vyniku inšych dziejańniaŭ, naprykład, ad ciskaniny pamiž milicyjaj i pratestoŭcami, ad kamianioŭ, jakija laciać z roznych bakoŭ, i ad atručvańnia ślezaciečnym hazam.
31-mu žurnalistu paškodzili abo całkam źniščyli techniku — videakamiery, fotaaparaty, płanšety, fłeški i inšaje.
11 žurnalistaŭ zatrymlivała abo aryštoŭvała milicyja.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym2
Kamientary