XXI Minskaja mižnarodnaja knižnaja vystava adkryłasia siońnia na «Biełekspa». «Naša Niva» adpraviłasia pahladzieć na knižnyja navinki i paralelna daviedałasia pra kryzis mužčynskaha ŭzrostu, amierykanskuju kulturu komiksaŭ i knihu ŭspaminaŭ žonki kasmanaŭta Navickaha.
Uračystaje adkryćcio vystavy.
Zvyčajna na adkryćcio knižnaj vystavy prychodziać ministr infarmacyi Aleh Pralaskoŭski i pieršy namieśnik kiraŭnika Administracyi prezidenta Alaksandr Radźkoŭ, časam da ich dałučajecca Lidzija Jarmošyna. Sioleta z pradstaŭnikoŭ urada była tolki Lilija Ananič, jana ž razam z Čarhincom i kasmanaŭtam Navickim i pierarezała stužku na adkryćci.
Atmaśfiera sioleta na vystavie sonnaja – niama hanarovaha hościa: kažuć, Kitaj admoviŭsia, a Ukrainie zaraz nie da taho. Darečy, ukrainski stend na vystavie ŭsio ž taki jość – praŭda, z knih tam tolki kłasiki, niekalki vydańniaŭ zasnavalnika intehralnaha nacyjanalizma Dźmitro Dancova, «Maskoŭskaja atruta» i «Nacyjanalizm».
«A čamu Siarhieja Žadana niama?» — pytajemsia ŭ pradstaŭnikoŭ Ukrainy, tym bolš Žadan jakraz vypuściŭ novy prazaičny zbornik.
«Nie mahli jaho ŭziać, tam — maciuki», — patłumačyli pradaŭcy.
Amierykancy ŭ hetym hodzie demanstrujuć svaju kulturu praz komiksy.
Zapaminalnych stendaŭ na vystavie nasamreč niašmat — naprykład, ZŠA całkam addała stend pad komiksy. Atrymałasia niezvyčajna, dyj komiksy — nieadjemnaja častka masavaj kultury ZŠA, to bok lepšaj mahčymaści paznajomicca ź joj u Biełarusi niama.
«Pačakajcie, vy pa-rusku razumiejecie?» — spyniaje nas žančyna sa stenda, pryśviečanaha tvorčaści Śviatłany Piaŭnovaj.
Daviedaŭšysia, što my pa-rusku razumiejem, žančyna pačynaje tłumačyć, što tut pradstaŭlajuć tvory vydatnaj piśmieńnicy z Rasii, u knihach jakoj možna znajści adkazy na ŭsie pytańni.
«Voś kniha — «Adkazy na ŭsie mužčynskija pytańni», — adkryjcie jaje na luboj staroncy. Adkryŭ. Parada na temu, što nie treba pieražyvać, kali žančyna starejšaja za ciabie. Takich knih na stendzie nie mieniej za dvaccać. Akazvajecca, u mužčyny jość dva kryzisnyja ŭzrosty — 25 i 40 hadoŭ. Šmat kamu hetyja knihi byccam dapamahli. Na raźvitańnie nam vydajuć papierku z cytataj z tryłohii «Jość u žyćci ščaście?», jakaja pačynajecca słovami: «U žyćci možna mieć toje, što tabie dazvalajuć, a možna toje, čaho ty chočaš».
Lepiej za ŭsich na vystavie pradstaŭlena Rasija — ahromnisty stend «Knihi Rasii» ŭjaŭlaje ź siabie łabirynt, raźbity na pradstaŭnictvy roznych vydaviectvaŭ. Šmat tak zvanaj «duchoŭnaści» — nad stałom vydaviectva «Ruskaja praŭda» visić dziŭnaja prapanova pa źnižkach: «Kupicie try knihi pa canie čatyroch, i čaćviortuju atrymajcie biaspłatna». Na stendzie śpiecyfičnyja knihi — «Chto kiruje Amierykaj?», «Ukryžavanaja Rasija» i «Alaksandr Ryhoravič Łukašenka — Pieršy prezident Biełarusi».
«A što, ŭ Rasii jość «niapraŭda»?» – pytajecca dziadok u pradaŭcoŭ.
«Pakul jašče jość» – surjozna adkazvajuć jany.
Biełaruskich stendaŭ taksama chapaje — praŭda, biez vydaviectva «łohvinaŬ» stała sumniej. Zatoje «Technałohija», «Knižny sałon», vydaviec Źmicier Kołas i «Hajsak» z časopisam Arche. Samyja pryvabnyja vydańni — šykoŭnyja albomy «Partrety Radziviłaŭ» i «Kraina Biełaruś».
Cikava vyhladaje stend Tadžykistana: jon bolej, čym na pałovu, składajecca z tvoraŭ, pryśviečanych Emamali Rachmonu. U asartymiencie jość albom «Naš prezident Emamali Rachmon», niekalki bijahrafij Rachmona i zbor tvoraŭ Rachmona ažno ŭ šaści tamach.
Samaj jaskravaj padziejaj stała prezientacyja prajekta «U pošukach stračanaha» — na druhim paviersie raźmieščana vystava z ekspazicyi budučaha muzieja Pieršaj suśvietnaj vajny, tam ža možna panazirać za poŭnym pracesam stvareńnia hraviur, pasłuchać duchavy arkiestr Vilejki i pahladzieć retra-fota Minska.
Tut ža źbirali hrošy na «Zaviaršeńnie kaplicy-pomnika Śviatoha Barysa i Hleba i ŭźviadzieńnia zvanicy», pa anhlijsku heta nadpis hučaŭ bolš łakanična: «For Money».
Ale hałoŭnaj padziejaj dnia stała prezientacyja knihi žonki kasmanaŭta Aleha Navickaha «Hołas serca. Dziońnik žonki kasmanaŭta», u jakoj Julija Navickaja apisała svaje adčuvańni i dumki ŭvieś toj čas, pakul jaje muž rychtavaŭsia da palotu, i čas, jaki jon pravioŭ u kosmasie.
«Źviarnicie ŭvahu, na vokładcy — ściah Biełarusi, jaki pabyvaŭ u kosmasie i jaki my paśla padaryli Alaksandru Łukašenka».
Kažuć, Roskosmas spačatku byŭ suprać nazvy «Hołas serca», tamu nazvu abrali kampramisnuju. «Heta redki vypadak — pohlad na prablemu praz pryzmu adčuvańniaŭ žančyny», — kaža Julija Navickaja.
Vystavu adkryvaŭ Dziaržaŭny kamierny arkiestr.
Muzyki vilejskaha duchavoha arkiestra.
Stend Vielikabrytanii.
Pradstaŭniki Vieniesueły.
Stend Izraila.
Stend KNR.
Paśla cyrymonii aficyjnaha adkryćcia knihi na stendzie Kitaja razharnuli na staronkach z vyjavami sustreč Łukašenki i kitajskich čynoŭnikaŭ.
Knižny rasprodaž.
Stend vydaviectva «Technałohija».
Akcyja ad vydaviectva «Russkaja pravda».
Stend Azierbajdžana byŭ samym pustym na ŭsioj vystavie.
Stend minskaha vydaviectva «Knihohrad'».
Pradstaŭnictva Turcyi.
Pieršy dzień vystavy naviedaŭ Vadzim Hihin.
Na knižnaj vystavie možna nabyć nie tolki knihi.
Ludzi hulajuć u nastolnuju hulniu na vystavačnym stendzie ZŠA.
Stend Vydaviectva biełaruskaha ekzarchata.
Stend Vydaviectva biełaruskaha ekzarchata.
Stend Sajuza piśmieńnikaŭ Biełarusi.
Knihi na stendzie Sajuza piśmieńnikaŭ Biełarusi.
Stend Irana.
Staronka, vyrablenaja rukapisnaj majsterniaj Juryja Chrapaja z Ukrainy.
Stend typahrafii «Makarava i K».
Prezientacyja «Encykłapiedyi BFST Dynama».
Pieršy dzień vystavy byŭ nadziva sonny. Kali raniej Knižnaja vystava była admietnaj padziejaj, to ciapier jana vyhladaje jak płanavaje mierapryjemstva.
