Kiraŭnik jehipieckaj armii i de-fakta kiraŭnik krainy Abdel Fatach al-Sisi naviedaŭ ź vizitam Maskvu. Mała chto sumniajecca, što jon stanie novym prezidentam na pieršych paśla adchileńnia ad ułady zakonna abranaha prezidenta Mursi z ruchu «Musulmanskaje bractva». U krainie ŭstalavałasia «kiravanaja demakratyja». Da 2000 prychilnikaŭ musulmanskaj apazicyi zahinuła ŭ časie razhonu demanstracyj suprać ułady armii.
ZŠA i Jeŭrasajuz strymana pastavilisia da hetaha dziaržaŭnaha pieravarotu, ale praciahvajuć zaklikać da «ŭklučeńnia ŭ palityčny praces usich palityčnych siłaŭ».
Rasija ž była vyrazna zadavolenaja kontrrevalucyjaj u Jehipcie, bo bačyła ŭ arabskaj viaśnie niebiaśpiečny prykład. Prastora byłoha SSSR, jak i arabskija krainy, zastajecca abšaram, dzie panujuć aŭtarytarnyja režymy, kiraŭniki dziaržavaŭ i siłavaja viarchoŭka majuć nieabmiežavanuju ŭładu i dostup da resursaŭ. Rasija dapamahła ŭtrymacca kłanu Asadaŭ u Siryi.
«My ź vialikaj uvahaj sočym za raźvićciom ŭnutrypalityčnaj situacyi ŭ vašaj krainie, žadajem kiraŭnictvu Jehipta pośpiechaŭ na šlachu da ahulnanacyjanalnaj miru i zhody», — zajaviŭ Pucin na sustrečy z al-Sisi.
Nieŭzabavie majuć adbycca rasijska-jehipieckija vajennyja manieŭry.
Novy režym u Kairy abapirajecca na padtrymku Saudaŭskaj Aravii i Abjadnanych Arabskich Emirataŭ — manarchij, jakija taksama z tryvohaj nazirali za demakratyzacyjaj Blizkaha Uschodu. Bratoŭ-musulman u Jehipcie padtrymlivaŭ Katar ź jaho abmiežavanaj manarchijaj. ZŠA i Zachad u Jehipcie spadziavalisia na pośpiech śvieckich siłaŭ — kansiervatyŭnych, libieralnych i levych.
SSSR i Jehipiet byli blizkija ŭ 1950—1970-ja hady, kali prezident Nasier zmahaŭsia z anhlijskim upłyvam u krainie. U 1970-ja prezident Sadat pieraaryjentavaŭsia na aljans z ZŠA, jakija mieli bolšyja finansavyja mahčymaści.
Ciapier čytajuć
U zahinułaj u Ślapiancy dziaŭčynie apaznali Janu Kastrankovu2
Kamientary