Palityki z partyi zrynutaha prezidenta Viktara Janukoviča adzin za adnym i cełymi hrupami abjaŭlajuć ab łajalnaści da novaj ułady, pryvodziačy ŭ zasmučeńnie svaich radavych prychilnikaŭ i rasijskich prarokaŭ raskołu Ukrainy.
Adzin z samych pałymianych praciŭnikaŭ Jeŭramajdanu, mer Charkava Hienadź Kiernies, u niadzielu viarnuŭsia ŭ horad paśla niadoŭhaha znachodžańnia za miažoj i zajaviŭ, što prezident Janukovič — «heta ŭžo historyja», a jon hatovy plonna supracoŭničać z novaj uładaj u Kijevie na karyść žycharoŭ Charkava.
Usiaho za dzień da hetaha ŭ Charkavie prajšoŭ arhanizavany Kierniesam i hubiernataram Charkaŭskaj vobłaści Michaiłam Dobkinym źjezd deputataŭ usich uzroŭniaŭ Paŭdniova-Uschodu Ukrainy, jaki abviaściŭ, što da adnaŭleńnia paradku i zakonnaści ŭ Kijevie miascovyja administracyi ruskamoŭnaj častki krainy biaruć «usiu paŭnatu ŭłady ŭ svaje ruki».
Adrazu paśla źjezdu Dobkin i Kiernies vyjechali ŭ Rasiju, ale na nastupny dzień viarnulisia, i pa pieršych zajavach Kierniesa možna było zdahadacca, što, ź jaho punktu hledžańnia, «zakonnaść i paradak» u Kijevie ŭžo adnoŭleny.
«Siońnia ŭžo farmujecca ŭłada, jość užo niekatoryja ministry, jość kiraŭnik Viarchoŭnaha savieta — my pavinny supracoŭničać na karyść hramadzian [ …] Ja liču, što toje, što tyčycca prezidenta Janukoviča, — heta ŭžo historyja. Davajcie ruchacca dalej, davajcie hladzieć napierad», — skazaŭ Kiernies u aeraporcie Charkava, kudy prylacieŭ, pavodle jaho słoŭ, ź dziełavoj sustrečy ŭ Ženievie.
«Nijakaha sieparatyzmu, nijakaha fiederalizmu ŭ mianie i ŭ dumkach nikoli nie było!» — zapeŭniŭ Hienadź Kiernies.
Uvieś čas, pakul pieramoha Majdanu zdavałasia praktyčna niemahčymaj, Kiernies i jaho siabar i paplečnik, hubiernatar Dobkin, byli samymi biaźlitasnymi vorahami apazicyi. Dobkin prychodziŭ na pasiadžeńnie abłasnoha savieta ŭ majcy z «łahatypam» śpiecnaza milicyi «Bierkut», Kiernies u intervju kazaŭ, što na Majdanie sabralisia «adny admarozki», što pałova lidaraŭ Jeŭramajdanu — hiei, i nośbity «inšych kaštoŭnaściaŭ», ź imi nie pa šlachu, abodva zajaŭlali pra hatoŭnaść mabilizavać svaich prychilnikaŭ na baraćbu z Majdanam.
U Charkavie ž hetyja prychilniki źbivali apazicyjanieraŭ i razhaniali ich mitynhi.
Hienadź Kiernies zusim nie samotny ŭ svajoj hatoŭnaści supracoŭničać z tymi, z kim jašče dva dni tamu byŭ hatovy zmahacca biaźlitasna i da kanca.
Bolšaść deputataŭ ad partyi Janukoviča — Partyi rehijonaŭ — u Viarchoŭnaj Radzie ŭžo try dni pasłuchmiana hałasujuć za ŭsie prapanavanyja niadaŭniaj apazicyjaj rašeńni. U niadzielu ž Partyja rehijonaŭ vystupiła z zajavaj, u jakoj uskłała ŭsiu vinu za krovapralićcie ŭ Kijevie źbiehłaha prezidenta.
«Ukrainie zdradzili, a ludziej sutyknuli łbami. Usia adkaznaść za heta lažyć na Janukovičy i jaho bližejšym atačeńni», — zajaviŭ kiraŭnik frakcyi PR u parłamiencie Alaksandr Jafremaŭ, jakoha adpravili začytać zajavu partyi na kamieru.
U zajavie, jakaja sprabuje vyratavacca ad poŭnaha źniščeńnia ŭčorašniaj « partyi ŭłady», śćviardžajecca, što mnohija členy partyi sprabavali paŭpłyvać na Janukoviča, ale heta akazałasia niemahčymym.
Hubiernatar Danieckaj vobłaści Andrej Šyšacki ŭ publičnym zvarocie zapeŭniŭ, što jon, a taksama ŭpłyvovy aliharch Rynat Achmietaŭ i inšyja «pavažanyja ludzi Danbasa» — za adzinuju Ukrainu.
Ab nieabchodnaści zachavać adzinstva Ukrainy i nieprymańni sieparatyzmu kazali amal usie pramoŭcy na subotnim Charkaŭskim źjeździe.
Charkaŭski «majdan» zaraz, paśla pieramohi kijeŭskaha Majdanu, milicyja achoŭvaje, a nie razhaniaje — jak i ŭ inšych haradach na ŭschodzie Ukrainy
Samyja aktyŭnyja šarahovyja prychilniki, umoŭna kažučy, prarasiejskaha kursu, uvasableńniem jakoha ŭ apošnija try miesiacy ličyŭsia prezident Janukovič, nie tak hnutkija, jak ich palityčnyja lidary. U subotu i niadzielu ŭ niekalkich vialikich haradach Uschodu i Poŭdnia Ukrainy praciahvalisia ich demanstracyi i — zredku — sutyknieńni z «revalucyjanierami».
Hienadź Kiernies adrazu z aeraporta ŭ niadzielu demanstratyŭna nakiravaŭsia supakojvać «majdan» i «antymajdan», jaki šumieŭ na roznych kancach vielizarnaj centralnaj płoščy Charkava.
«Davajcie budziem razumniejšymi, davajcie budziem dabrejšymi da hetych maładych ludziej, jakija schavali svaje tvary za maskami, napeŭna, vypili niejkaj vadkaści, nie razumiejuć, što robiać. My ž starejšyja, my ž razumniejšyja», — kazaŭ Kiernies svaim prychilnikam, pakazvajučy ŭ bok «majdanu» ŭ abłasnoj administracyi.
Maładyja ludzi ŭ zručnych trenirovačnych štanach, naŭrad ci starejšyja za siaredniaha ŭdzielnika «majdanu», niekatoryja dakładna napadpitku, ździŭlena hladzieli na mera.
«O, a što heta jon skazaŭ?» — źbiantežyŭsia adzin ź ich. «Kaža, majdanaŭcaŭ nielha bić», — pieravioŭ karespandent Bi-bi-si. «A što ž tady rabić?» — uražany tym małady čałaviek.
Da taho, jak pieramoh kijeŭski Majdan, takija maładyja ludzi pry papuščalnictvie ŭładaŭ źbivali apazicyjanieraŭ.
«Jon lubić pieramožcaŭ»
Adstaŭny pałkoŭnik Uładzimir Ivanoŭ nijakich dakładnych słoŭ u łajalnaści da novych uładaŭ u zajavach mera Kiernies nie pačuŭ.
«Jon paprasiŭ nas, kab nie było tut sutyčak. Ale kali hetaja banderaŭskaja bryda pojdzie siudy, to, naturalna, my, charkaŭčanie, staniem na abaronu našaha horada i budziem jaho tut abaraniać da apošniaj kropli kryvi. Našy baćki i dziady vajavali — i my budziem vajavać ź imi… Na našaj ziamli, vielikaruskaj ziamli, jakaja raspaścirajecca ad Karpat da Kuryłaŭ, im rabić niama čaho», — skazaŭ Uładzimir Ivanoŭ Ruskaj słužbie Bi-bi-si.
Pamiž zvarotami da svaich prychilnikaŭ Hienadź Kiernies ŭ supravadžeńni achovy chadziŭ razmaŭlać i z «majdanam» — i znajšoŭ jašče mienš parazumieńnia.
«Ja prašu vas spynić destabilizavać situacyju», — sprabavaŭ Kiernies pierakryčać «majdan», jaki zablakavaŭ abłasnuju administracyju. Ale jaho było čuvać tolki ŭ radyusie troch mietraŭ.
« Hiepu - na nary!» — roŭ Charkaŭski «majdan» kolkaściu ŭ niekalki sotniaŭ čałaviek. Mianušku Hiepa, jak raspaviadajuć chaŕkaŭčanie, Hienadź Kiernies atrymaŭ u maładości ŭ peŭnych kołach. U 1992 hodzie jon byŭ sudzimy za machlarstva i pieraprodaž kradzienaha.
«U mianie niejkija sumnyja ŭspaminy pra toje, jak jon užo pierachodziŭ z adnaho łahiera ŭ inšy. Jon lubić, viadoma, pieramožcaŭ. Hetaja jaho ślizkaja natura mnie nie pa dušy», — skazaŭ Bi-bi-si ŭdzielnik charkaŭskaha «majdanu», žychar horada Ivan.
Kiernies «pierachodziŭ z adnaho łahiera ŭ inšy» paśla minułaj revalucyi. U 2004 hodzie jon stajaŭ na scenie «aranžavaha» Majdanu. Mnohija ŭkrainskija palityki z tahačasnych «aranžavych» paśla lohka źmianiali łahiery — mnohija mianiajuć i ciapier.
Biełaruskaja błohierka pakazała, jaki žach moža adbyvacca z vusnami, kali chočaš ich pavialičyć — a potym pamienšyć7
Kamientary