Na šmattysiačnym mitynhu ŭ Daniecku adstaŭki hubiernatara vobłaści Andreja Šyšackaha patrabavali pryjezdžyja rasijanie, čas ad času skažajučy proźvišča kiraŭnika abłdziaržadministracyi.
Pra heta UNIAN zajavili ŭ pres-słužbie Danieckaj abłdziaržadministracyi.
U šerahach mirnych mitynhoŭcaŭ znachodziłasia kala 70 čałaviek z rasiejskimi ściahami, jakija ŭvieś čas pierakrykvali vystupoŭcaŭ na mitynhu.
Kali abviaścili chvilinu maŭčańnia pa zahinuŭšych u Kijevie, ź ich boku razdavalisia cyničnyja vykryki. Čas ad času jany skandavali «Bierkut! Bierkut!», Ale navat kali vystupaŭ pradstaŭnik hetaha padraździaleńnia, jaho taksama nie słuchali i pierakrykvali, demanstrujučy tym samym poŭnuju niepavahu da žycharoŭ danieckaha rehijonu, da jaho duchoŭnych kaštoŭnaściaŭ, padkreślena ŭ paviedamleńni.
Ludzi, jakija stajali ź imi pobač, śćviardžali, što heta nie žychary Danieckaj vobłaści, a pryjezdžyja «turysty» z Rasii. «Danieck — ruski horad», — vykrykvali jany i patrabavali adstaŭki hubiernatara, čas ad času skažajučy proźvišča kiraŭnika abłdziaržadministracyi, padkreślena ŭ paviedamleńni.
Paśla mitynhu kiraŭnik rehijonu daŭ karotki bryfinh žurnalistam. Jon jašče raz zajaviŭ pra svaju pazicyju, sutnaść jakoj u nastupnym:
«Ukrainie nie być biez Danbasa, a Danbasu biez Ukrainy. Razmovy pra fiederalizacyju ciapier nie svoječasovyja, tamu što kraina asłablenaja».
Adnak Šyšackij adznačyŭ, što Danbas budzie adstojvać svajo zakonnaje prava razmaŭlać i malicca na rasiejskaj movie. Hubiernatar taksama ličyć, što Daniecki rehijon maje prava na pašyreńnie paŭnamoctvaŭ orhanaŭ miascovaha samakiravańnia, asabliva ŭ častcy kantrolu za adličeńniem padatkaŭ.
Padčas bryfinhu, jaki prachodziŭ u viestybiuli abłdziaržadministracyi radykalna nastrojenyja mitynhoŭcy, jakija pryjšli pad rasiejskimi ściahami, pačali kidać pradmiety, padobnyja na dymavyja šaški i praryvacca ŭ budynak administracyi.
Ich nie prapuścili supracoŭniki milicyi, tady mitynhoŭcy i źniali z fłahštoka ściah Ukrainy i ŭźniali rasijski trykałor.