19 śniežnia, na pres-kanfierencyi ŭ Maskvie Pucinu zadali pytańnie ci dapuskaje jon ŭvod rasiejskich vojskaŭ va Ukrainu, u pryvatnaści ŭ Krym dla abarony svaich suajčyńnikaŭ, jak heta było zroblena ŭ Paŭdniovaj Asiecii i Abchazii ŭ 2008 hodzie.
«My budziem zmahacca za roŭnaść pravoŭ (rasijskich suajčyńnikaŭ) — heta tyčycca ŭsich dziaržaŭ. Heta zusim nie značyć, što my budziem machać šaškaj i ŭvodzić vojski. Heta poŭnaje hłupstva, poŭnaja łuchta. Ničoha padobnaha niama i być nie moža», — padkreśliŭ Pucin.
Jon padkreśliŭ, što paraŭnoŭvać situacyju ŭ Paŭdniovaj Asiecii i Abchazii ź situacyjaj u Krymie niekarektna.
Raniej deputat harsavieta Sievastopala Siarhiej Smaljaninaŭ zaklikali Pucina uvieści rasijskija vojski va Ukrainu.
Cikava, što jašče 14 śniežnia Usieŭkrainskaje abjadnańnie «Svaboda» zajaŭlała, što prarasijskija siły ŭ Krymie rychtujuć śpiecapieracyju, jakaja pahražaje terytaryjalnaj cełasnaści i nacyjanalnaj biaśpiecy Ukrainy.
Pa źviestkach «Svabody», adnačasova z praviadzieńniem krymskaha «antyMajdanu», uličvajučy adsutnaść na paŭvostravie asnoŭnych sił ukrainskich pravaachoŭnych padraździaleńniaŭ, unutranych vojskaŭ, pierakinutych u Kijeŭ na zdušeńnie Majdanu, praduhledžvajecca praviadzieńnie ŭ pieryjad ad 23 da 27 śniežnia 2013 h. tak zvanych «antyterarystyčnych vučeńniaŭ» asabistym składam z pryciahnieńniem marskoj piachoty Čarnamorskaha fłotu Rasijskaj Fiederacyi, dysłakavanaj u Sievastopali.
«Padčas nazvanych «antyterarystyčnych vučeńniaŭ» rasiejskija marskija piachotniki nibyta dla zabieśpiačeńnia abarony abjektaŭ ČF RF u Sievastopali voźmuć pad kantrol horad i zabłakujuć ŭkrainskija dziaržaŭnyja orhany i miesca raźmiaščeńnia VMS Ukrainy», — zajaŭlali ŭ «Svabodzie».
