Naviny.by: Pucin nie dačakaŭsia padtrymki pa Ukrainie ad Nazarbajeva i Łukašenki
«Uładzimir Pucin nie atrymaŭ ad partnioraŭ pa Mytnaj trojcy padtrymki svajoj palityki na ŭkrainskim kirunku. Heta stała zrazumieła paśla ekstrannaha samitu 5 sakavika ŭ Nova-Aharovie, — piša ŭ internet-vydańni Naviny.by Alaksandr Kłaskoŭski. — Farmalna lidary Rasiei, Biełarusi i Kazachstana abmiarkoŭvali damovu ab Jeŭrazijskim ekanamičnym sajuzie (JEAES), ale, viadoma, u pavietry visieła ŭkrainskaje pytańnie».
Hetaje pasiadžeńnie Najvyšejšaj Jeŭrazijskaj ekanamičnaj rady na ŭzroŭni kiraŭnikoŭ dziaržavaŭ prajšło na šeść dzion raniej płanavaha terminu, pryčym napiaredadni Nursułtan Nazarbajeŭ nie chavaŭ, što heta jaho inicyjatyva, bo «abstanoŭka va Ukrainie niepasredna zakranaje ŭzajemaadnosiny krain u ramkach SND i ŭskosna tyčycca dziaržaŭ Mytnaha sajuza».
Mnohija naziralniki adznačajuć, pišuć Naviny.by, što pavodziny Maskvy ŭ Krymie, zakamuflavanyja pad abaronu «ruskamoŭnych», absalutna nie spadabałasia lidaru Kazachstana, dzie cełyja vobłaści — ruskamoŭnyja.
U Biełarusi taksama niama ni adnaj racyi psavać adnosiny z Ukrainaj, kab dahadzić vialikadziaržaŭnym ambicyjam Kramla.
«Hałoŭnym vynikam hetaj sustrečy stała toje, što na joj nie prahučała», — zajaviŭ u kamientary dla Naviny.by palityčny analityk Juryj Drakachrust.
U situacyi kanfliktu z Ukrainaj, kali Kreml apynuŭsia praktyčna ŭ izalacyi, jamu krytyčna važna było atrymać padtrymku sajuźnikaŭ. Ale hetaha nie ŭdałosia. Kali b kazachstanski i biełaruski kiraŭniki skazali ŭ pryjaznym duchu choć paru słoŭ, to ich pazicyja była b kidka adlustravana ŭ rasijskich paviedamleńniach pa vynikach samitu. Adnak, miarkujučy pa ŭsim, Maskva nie atrymała navat ŭskosnaj padtrymki, kaža analityk.
«I heta — surjoznaje paražeńnie Pucina», — zaklučaje surazmoŭca Naviny.by.
Hrošy na zabojstva rasijskaha lotčyka ŭ Ispanii, jaki pierahnaŭ va Ukrainu viertalot Mi-8, pieradali rasijskija dypłamaty8
Kamientary