Maćviej Hanapolski: nikčemnaść rasijskaha TV i ahałciełaja chłuśnia pra Ukrainu
Prapahandyscki katok, jakim rasijskaje telebačańnie prachodzicca pa Ukrainie, usio bolš nabiraje mocy (i naŭrad ci jon spynicca paśla zakliku da abjektyŭnaści ad kiraŭnikoŭ ukrainskich Miedyjahrup).
Uładzimir Sałaŭjoŭ u apošnim «Niadzielnym viečary» dajšoŭ da ručki: ekśpierty, jakija padtrymlivajuć uvod rasiejskich vojskaŭ u Krym, «dyskutavali» z «apanientami», jakija stajać na tych ža pazicyjach.
Časopis «Sobiesiednik» vyrašyŭ razabracca: a na ŭkrainskim TB z acenkami padziej usio taksama adnaznačna? Za adkazam źviarnulisia da Maćvieja Hanapolskaha — žurnalista, jaki pracuje i ŭ Rasii, i va Ukrainie.
— Pačniom z taho, što va Ukrainie jość tolki adzin dziaržaŭny kanał, jaki hladziać usie, — heta Pieršy nacyjanalny kanał. Viadoma, jość jašče kanał «Rada» (kanał parłamienta) i kanał «Kultura», ale palityčnaja mahčymaść telebačańnia pramyvać mazhi ŭkrainskim hledačam u dziaržavy źviedziena da minimumu. Tamu hałoŭnaje adroźnieńnie pamiž rasijskim i ŭkrainskim telebačańniem u tym, što rasijskaje TB — TB dziaržavy, a ŭkrainskaje TB — TB, za jakim stajać aliharchi, jakija naležać tamu ci inšamu palityčnamu kłanu. Ale! Tut vielmi važny momant!
Telekanały dla aliharchaŭ — heta nie tolki mahčymaść pravodzić svaje idei ŭ masy, ale jašče i kamiercyjny prajekt.
Tamu na ŭkrainskim TB niemahčyma tak ašaleła chłusić (ja kažu heta słova biez usialakaha soramu — kanstatuju fakt), jak chłusiać na rasijskich dziaržaŭnych kanałach z nahody ŭkrainskich padziej abo, naprykład, z nahody apazicyi.
Ukrainskaje TB, na moj subjektyŭny pohlad, adroźnivajecca bolšaj adkrytaściu, značnym zvarotam da hledača. Na ŭkrainskim TB niama spłanavanaj biezahladnaj antyrasiejskaj prapahandy. Jaje prosta nie isnuje! Niama čałavieka, jaki (jak heta adbyvajecca na rasijskim TB) kožny dzień vychodzić u efir i kaža, što ŭ Rasiei — złačynny režym. Navat ciapier jaho niama, padčas trahičnych padziej, pry tym napružańni, jakoje ŭźnikła pamiž Ukrainaj i Rasijaj. Usiaho adzin prykład: u niadzielu 2 sakavika adbyŭsia hrandyjozny efir, jaki bačyła ŭsia kraina. Pieršy (dziaržaŭny) kanał pravioŭ jaho sumiesna z samym jarkim apazicyjnym kanałam — «Hromadśka TV», i šou Savika Šustera. Na hetym šou byli pradstaŭleny ŭsie punkty hledžańnia. I mahu vas zapeŭnić: nijakich krykaŭ pra toje, što Rasija vorah, i blizka nie było. Choć va ŭkraincaŭ ciapier davoli śpiecyfičnaje staŭleńnie da RF.
U rasiejskich hledačoŭ, na dumku Hanapolskaha, jość tolki adzin varyjant daviedacca alternatyŭnaje dziaržaŭnamu mierkavańnie pa Ukrainie, — uklučyć kanał «Dožd́». Adnak jaho viaščańnie, jak viadoma, abmiežavana ź niadaŭnich časoŭ mahčymaściami Internetu.
— «Dožd́» — adzinaja placoŭka, kudy mohuć pryjści choć pravyja, choć levyja, i skazać, što dumajuć. Usio astatniaje infarmacyjnaje pole składajecca albo z adkrytaj, hrubaj prapahandy, albo z tych kanałaŭ, jakija pierapužanyja, i navat u svaich tak zvanych «śmiełych» tok-šou staranna redahujuć śpis haściej.
Ale nie ŭ adnych «čornych śpisach» kamientataraŭ zaklučajecca ŭdzieł dziaržavy ŭ farmiravańni palityki kanałaŭ. Nam užo śpiešna pakazali «Tarasa Bulbu», i Uładzimir Bortka ŭ śpiecyjalnym intervju «Viestiam» patłumačyŭ, čamu nieabchodna hladzieć hetaje kino. Zaraz telekanał «Rasija» paŭtaraje «Biełuju hvardyju»… Arkadź Mamantaŭ daŭno pierajšoŭ sa svaim «Śpiecyjalnym karespandentam» na pazaŭročny režym pracy. Taksama i «Voskriesnyj viečier», jaki, niahledziačy na nazvu, moža źjavicca ciapier u efiry ŭ luby dzień. Siońnia stała viadoma, što «Pojedinok» Uładzimira Sałaŭjova pierasunuli z čaćviarha na piatnicu (pa novym hrafiku prahrama pačnie vychodzić z 7 sakavika) i pastavili na bolš zručny, rańnieviečarovy čas — 21.00.
Adnak kali ŭsie vyšejpieraličanyja miery z punktu hledžańnia dziaržpalityki vytłumačalnyja, to admova «Pieršaha kanała» tranślavać cyrymoniju ŭručeńnia kinapremii «Oskar», čaho z Ernstam raniej nie zdarałasia, vyklikała spačatku ździŭleńnie. Čym «najvažniejšaje z mastactvaŭ» pieraškodziła Kramlu? Tym bolš u taki čas, kali televizar amal nichto i nie hladzić? Bo pačatak pramoj tranślacyi z Łos-Andželesa pavinien byŭ pačacca 3 sakavika ŭ 4 hadziny ranicy!
— Mabyć, kiraŭniki «Pieršaha» ci adniekul daviedalisia, ci to z bolšaj dolaj vierahodnaści vykazali zdahadku, što na «Oskary» buduć kazać pra Ŭkrainu, — praciahvaje Hanapolski. — I sapraŭdy! Va ŭstupnym słovie viadučyja pieradali pryvitańnie narodam, jakija zmahajucca za svaje pravy: narodam Ukrainy i Vieniesueły.I tolki z-za taho, kab nie prahučała hetaja fraza, kanał u apošni momant bajaźliva admoviŭsia vieści žyvuju tranślacyju ŭračystaści! Praz sutki ŭručeńnie, viadoma, pakažuć, ale hetaj frazy ŭ skaročanaj «viersii» ŭžo, zrazumieła, nie budzie …
Prychodzicca kanstatavać: rasijskaje TB jak žurnaliscki instytut, jak sumlenny instrumient adlustravańnia intaresaŭ hramadzianskaj supolnaści — jon nie abmiežavany, jon nikčemny. Praŭda abo jość, abo jaje niama. Kali jaje pačynajuć abrazać, krucić, to heta ŭžo nie praŭda, a tak … hłupstva.
Kamientary