Tuzin śpievaŭ ad dziadźki Ryhora AŬDYJO

2 sakavika 2014 hodu pajšoŭ u inšy śviet vialiki paet Ryhor Baradulin. Na znak pamiaci i na daninu pašany da hetaha śvietłaha čałavieka Tuzin.fm sabraŭ 12 samych jaskravych piesień, napisanych na jaho słovy.

«Pieśnia — raŭnivaja panienka. Za ŭzajemnaść patrabuje dušu. Pieśnia — asoba samadastatkovaja i niepaŭtornaja ŭ svaim vyjaŭleńni!» Tak ličyŭ Ryhor Baradulin. Paet pakinuŭ pa-za saboj nia tolki kala sotni knihaŭ, ale i mnostva piesień. Jaho vieršy pakłali na muzyku bardy i rokiery, estradniki i viadučyja akademičnyja kampazytary. Abrany tuzin śpievaŭ ad dziadźki Ryhora vašaj uvazie.

1. «Treba doma byvać čaściej» (R. Baradulin — I. Łučanok, vykonvajuć Dančyk i Ł. Bartkievič)

Hety radok Ryhora Baradulina daŭno staŭ kryłatym. Jon znajomy, badaj, kožnamu biełarusu. Svaju rolu syhrała i muzyka Ihara Łučanka. Pieśnia stałasia sapraŭdnym šlahieram, a ŭ versii Dančyka i Bartkieviča ledź nie nacyjanalnym himnam. Zapis adbyŭsia ŭ 1989 hodzie ŭ Ńju-Jorku.

2. «Zorka bosaja» (R. Baradulin — A. Kamocki, vykonvaje A. Kamocki)

Ź imiem Baradulina źviazanaja praktyčna ŭsia dyskahrafija Alesia Kamockaha. Asobnyja albomy ŭvohule całkam pakładzienyja na słovy dziadźki Ryhora — «Zorka spahady», «Balažy», «Viarovica». U niekatorych albomach Kamockaha paet deklamuje ŭłasnyja vieršy — «Vino daždžoŭ», «Psalmy». Miž spadarami Ryhoram i Alesiem byŭ mocny nia tolki tvorčy, ale i siabroŭski źviaz. Jany navat supolna vydavali knihi. A siarod piesień adnym z najlepšych uzoraŭ supracy stała «Zorka bosaja». Novaja versija pieśni ŭpryhožyła kružełku Alesia Kamockaha «9» (2009). «U spadara Alesia šmat jakaściaŭ. Nazavu tolki dźvie: ščyraść i ścipłaść. Heta pa-kryvicku», — takuju acenku svajmu śpievaku i siabru daŭ Baradulin.

3. «A ŭ ciomnym lesie» (narodnaja, vykonvaje Ryhor Baradulin)

Mienavita z padačy Alesia Kamockaha byŭ zapisany adziny solny (!) dysk Ryhora Baradulina «Hojknuŭ baravik» (2000). Kružełka źmiaščaje ažno 56 trekaŭ i ličycca vialikim rarytetam. Zrešty, da šyrokaha raspaŭsiudu jana i nie pryznačałasia. Dziadźka Ryhor a capella vykonvaje pieśni dy prypieŭki z rodnaje Vušaččyny. U albomie demanstrujucca redkija ŭzory narodnaje eratyčnaje paezii.

4. «Pani troški ŭ hadach» (R. Baradulin — Źm. Vajciuškievič, vykonvaje Źm. Vajciuškievič)

Jak aŭtar usich tekstaŭ i čytalnik, Ryhor Baradulin byŭ zadziejničany ŭ zapisie alboma Źmitra Vajciuškieviča «Paravoz kachańnia» (2004). Paet prapanavaŭ karotkija vieršavanyja ŭstupy da kožnaje pieśni. Prykładna pałova alboma taksama maje seksualny padtekst (pieršy varyjant nazovu — «Kachańnie da zaikańnia»). Adnak asnoŭnym hitom kružełki stała mienavita «Pani troški ŭ hadach». Niekatoryja krytyki potym iranična zaznačali, što pieśnia ŭzrostava adpaviadaje asnoŭnaj aŭdytoryi Źmitra. Darečy, mienavita Baradulin daŭ imiony jašče dvum albomam Vajciuškieviča — «Paraviny hodu» (zamiest narmatyŭnaha «pory hodu») i «Toje, što treba». A jašče para śpievaŭ na słovy narodnaha paeta trapiła na kružełku «Kałychanki» (2007).

5. «Zorki» (R. Baradulin – Źm. Vajciuškievič, vykonvajuć Czeremszyna & Todar)

Jašče adnym paśpiachovym plonam Baradulina z Vajciuškievičam stała pieśnia «Zorki». Jana niečakana nabyła vialikuju viadomaść na Padlaššy. Da taho spryčyniŭsia miascovy folk-hurt Czeremszyna. U vyjšaŭ sumiesny albom «Čeremšyny» sa Źmitrom «Todaram» Vajciuškievičam. Pieśnia «Zorki» vydatna ŭpisałasia ŭ łemkoŭski i paleski falklor. «Dla mianie pracavać sa Źmitrom było vialikim honaram. Mnie zdajecca, to ciapier mienavita jon źjaŭlajecca ŭvasableńniem sučasnaje biełaruskaje muzyki», — kazaŭ Ryhor Ivanavič.

6. «Biełaja jabłynia hromu» (R. Baradulin — Ł. Volski, vykonvaje Ł. Volski)

Vierš Ryhora Baradulina 1977 hodu daŭ imia, peŭna, najlepšamu solnamu albomu Lavona Volskaha razam z hałoŭnym hitom kružełki. Paet pasłuchaŭ toj dysk adnym ź pieršych, jašče da prezentacyi. Lavon Volski ŭzhadvaje: «Dziŭna, što hetaja pieśnia — hit, bo jana atrymałasia niedzie pamiž valsam i bluzam. Daviałosia defarmavać vieršavany pamier. Ale Ryhor Ivanavič zastaŭsia vielmi zadavoleny». Na dumku Lavona, u vieršy zakadavanyja etapy čałaviečaha žyćcia. U hitarnym soła možna paznać «Biełavieskuju pušču» «Pieśniaroŭ».

Praciah čytajcie na sajcie «Tuzin hitoŭ».

• 0
• 0
• 0
• 0
• 0
• 0
• 0
• 0