gazetaby.com
«Kožny, kamu nieabyjakavy los Baćkaŭščyny, pavinien dakładna razumieć: zachodnierusisty — heta «piataja kałona» susiedniaj dziaržavy. Zachodnierusisty niastomna viaduć prapahandu, jakaja stavić svajoj kančatkovaj metaj likvidacyju suvierenitetu Biełarusi i poŭnaje jaje padparadkavańnie Maskvie, — piša ŭ svaim novym artykule vydaviec, kandydat fiłasofskich navuk, a ŭ minułym śpiecnazaviec Minabarony Anatol Taras. — Jak vykazaŭsia adzin z maskoŭskich kurataraŭ hetaj publiki, «daŭno para skončyć ź niedarečnaj niezaležnaściu». Jon mieŭ na ŭvazie našu «siniavokuju». Nie maje pryncypovaha značeńnia, u jakoj formie płanujecca «kančatkovaje rašeńnie pytańnia». Nie vyklučana, što farmalna RB zachavajecca», — praciahvaje Taras.
«Kaliści isnavała BSSR», nahadvaje jon, ale ŭ hetym maryjanietkavym utvareńni za 10 hadoŭ (z 1930 pa 1939) savieckija śpiecsłužby vyniščyli ŭsie biełaruskija elity da apošniaha čałavieka.
«Praktyčnuju dziejnaść arhanizacyj zapadnarusistaŭ (naprykład, ich internet-sajtaŭ), — piša Taras, — kuryruje fiederalnaje ahienctva «Rassupracoŭnictva», jakoje maje hadavy biudžet zvyš 500 miljonaŭ dalaraŭ. U Biełarusi plonna pracujuć niekalki dziasiatkaŭ «śpiecyjalistaŭ», jakija skončyli kursy psichałahičnaj vajny, razhornutyja na bazie Novasibirskaj vyšejšaj vučelni pavietrana-desantnych vojskaŭ».
Taras zaklikaje źmianić staŭleńnie da zapadnarusistaŭ z pabłažlivaha na nieciarpimaje: «Jany raspracoŭvajuć i prapahandujuć ideałohiju poŭnaha pryhniotu Biełarusi. U Rasii maje miesca ekanamičny kryzis, tamu Maskvie vielmi patrebnyja pracavityja raby. A samy lepšy rab toj, chto pierakanany ŭ nieabchodnaści svajho rabstva. Mienavita takim pierakanańniem biełarusaŭ zajmajucca zapadnarusisty».
Taras abvinavačvaje ŭ zapadnarusiźmie internet-sajty «Zachodniaja Ruś» i «Impieryja».
Ciapier prarasijskija siły ažyvilisia. U vačach u ich źjaviŭsia drapiežny ahieńčyk, piša Taras. «Maŭlaŭ, dajcie tolki čas! Maskva raźbiarecca z Ukrainaj pa poŭnaj prahramie, a potym i inšymi zojmiecca. Što ž, padstava dla takoha rodu nastrojaŭ u ich sapraŭdy jość. Našy hienijalnyja kamandujučyja 20 hadoŭ zapar zaklikali narod być hatovym zasieści ŭ akopach na šlachu tankaŭ z krain NATA. A vychodzić, što akopy lepš by vykapać na ŭschodnich rubiažach», — miarkuje jon.
«Nastaŭ momant iściny», — śćviardžaje Taras.