BNF pahruziŭsia va ŭnutrypartyjnuju baraćbu ź pierachodam na asoby. Pretendent na pasadu staršyni partyi Viktar Ivaškievič u aŭtorak sklikaŭ svaju pieršuju pres-kanferencyju. Da jaho dałučylisia Chadyka i Smolikaŭ.
U subotu prajšoŭ čarhovy sojm Partyi BNF. Ničym asablivym jon nie vyłučaŭsia, aproč adnoj naviny — namieśnik staršyni partyi Viktar Ivaškievič ahučyŭ svoj namier balatavacca ŭ staršyni Partyi. Da hetaha mierkavałasia, što na źjeździe 8—9 śniežnia baraćbu za staršynski fatel paviaduć siońniašni kiraŭnik BNF Vincuk Viačorka i jahony namieśnik Aleś Michalevič.
Adrazu paśla zajavaŭ Viktara Ivaškieviča ŭ internecie źjaviłasia mnostva zdahadak i mierkavańniaŭ adnosna hetaha vyłučeńnia. Častka vykazvałasia, što niejkaja chitraja šmatchadoŭka Viačorki, inšyja havaryli pra raskoł u partyi.
Kab abvierhnuć ci paćvierdzić ludzkija zdahadki Viktar Ivaškievič u aŭtorak i sklikaŭ pres‑kanferencyju. Ivaškievič źjaviŭsia na joj u kampanii z prafesaram Jurjem Chadykam i kiraŭnikom Viciebskaha abłasnoj arhanizacyi PBNF Kastusiom Smolikavym.
Ivaškievič raskazaŭ, što pra namier balatavacca na staršynstva jon zajaviŭ Viačorku i Michaleviču jašče ŭ červieni, ale heta nie afišavałasia.
«Jak adnamu z zasnavalnikaŭ partyi, mnie nie abyjakavy za jaje los. U partyi siońnia vidavočnyja kryzisnyja źjavy. Vosiem hadoŭ — heta vielmi vialiki termin dla znachodžańnia na čale partyi, pryjšoŭ čas niešta mianiać. Razam z tym, kandydat na hetuju pasadu musić siabie niečym zarekamendavać. Ale, prabačcie, u kaho ja nie pytaŭsia, nichto nia viedaje, čym kankretna zajmajecca Michalevič, ja taksama nia viedaju. Čym bližejšy źjezd, tym macniej abvastrajecca baraćba miž hrupoŭkami Michaleviča i Viačorki. Hetyja chłopcy ŭžo apuścilisia da ŭzroŭniu persanalnych abraz. Siońnia ŭžo nie dla kaho nie źjaŭlajecca sakretam, što vypadku pieramohi luboha z kandydataŭ u partyi pačnucca začystki, a hetaha nielha dapuścić. Kali pieramoha akažacca za mnoj, to ja hatovy pradstavić lubuju pracu i Alesiu, i Vincuku. Hałoŭnaje, kab u ich było žadańnie pracavać. Za apošnija hady ja staŭ «Dyrektaram BNF». Čałaviekam, jaki braŭ na siabie roznyja arhanizatarskija funkcyi. Ź jakimi, liču, niabłaha spraŭlaŭsia. Ja staŭ lideram Partyi BNF, siońnia ja maju šaniec stać jaje staršyniom», — adznačyŭ V.Ivaškievič.
Ivaškievič skazaŭ, što dla jaho siońnia asabliva baluča toje, što Partyja BNF ź viadučaj palityčnaj siły krainy pieratvaryłasia ŭ šarahovaha člena ADS.
«Maja zadača pieratvaryć BNF u najbujniejšuju partyju krainy, lidera demakratyčnych sił, jaki moh by ŭznačalić šyroki hramadzki ruch za pieramieny ŭ krainie. Ja nikoli nie zajmaŭsia intryhami, nie zajmajusia i ciapier. Ja vyłučajusia na staršyni tolki z toj metaj, kab stać staršynioj, a nie źniać svaju kandydaturu na karyści inšaj. Ja nie zajmajusia drobnymi hiešeftami», — adznačyŭ Ivaškievič.
Jury Chadyka pryznaŭsia, što pastaviŭsia da hetaj inicyjatyvy Viktara Ivaškieviča ź vialikaj sympatyjaj.
«Viktar nieadnarazova zarekamendoŭvaŭ siabie jak vydatnaha arhanizatara. Niadaŭni «Eŭrapiejski marš» heta tolki paćvierdziŭ, upieršyniu za doŭhi čas suprać jaho ŭdzielnikaŭ nie była ŭžytaja fizyčnaja siła. Ivaškievič dakładna nie pryviadzie partyi da raskołu, jon razumieje, što adzinstva — heta vialikaja kaštoŭnaść, jakuju nielha buryć», — skazaŭ Ju.Chadyka.
Viktar Ivaškievič taksama zaklikaŭ presu pačać abmierkavańnie temy «Partyja BNF: učora i siońnia». «Nam važna zrazumieć, čym była, jość i budzie partyja dla krainy i ludziej», — ličyć Viktar Ivaškievič. Taksama jon zaklikaŭ svaich kankurentaŭ pravieści pierad źjezdam adkrytyja debaty ŭ prysutnaści presy.
Inšyja kandydaty na pasadu staršyni Partyi BNF na pres‑kanferencyju nie pryjšli, chacia Vincuk Viačorka ŭ toj momant znachodziŭsia ŭ budynku Ŭpravy.
![]() Kastuś Smolikaŭ, Viktar Ivaškievič, Jury Chadyka |
![]() |
![]() |
Kamientary