Va Ukrainie zatrymany staršynia praŭleńnia «Naftahaza» Bakulin
U chodzie rasśledavańnia karupcyjnych schiem u hazavaj halinie ŭ centralnym ofisie kampanii siońnia prajšli pieratrusy; viedamstva aceńvaje minimalnuju sumu ŭronu dziaržavie ŭ $4 młrd.
Supracoŭniki ŭkrainskaha MUS zatrymali staršyniu praŭleńnia NAK «Naftahaz Ukrainy» Jaŭhiena Bakulina, paviedamiŭ kiraŭnik MUS Arsien Avakoŭ na svajoj staroncy ŭ Facebook. «Tolki pa troch epizodach dziejańniaŭ złačynnaj hrupy suma škody dziaržavie aceńvajecca ŭ sumu kala $ 4 młrd! I heta daloka nie poŭny pieralik sumnieŭnych schiem i apieracyj, što patrapili pad uvahu našych śledčych», — adznačyŭ ministr unutranych spraŭ.
Avakoŭ udakładniŭ, što pa vynikach rasśledavańniaŭ «mohuć być vyjaŭlenyja kałasalnyja straty dziaržavie i dačynieńnie da ich viadomych piersanalij, u tym liku ź ciapierašniaha palitykuma».
«Ja pryniaŭ rašeńnie ab pašyreńni śledča-apieratyŭnaj hrupy, jakaja pracuje ŭ hetym nakirunku. Ja papiaredžvaju palitykaŭ ab nieŭmiašańni ŭ rasśledavańnie. Papiaredžvaju, što budu žorstka, u tym liku publična, reahavać na lubyja sproby akazvać cisk na śledstva», — dadaŭ ministr.
Bakulin bolš za 20 hadoŭ prapracavaŭ na Lisičanskim naftapierapracoŭčym zavodzie. Ź lipienia 2001 pa travień 2003 h. jon uznačalvaŭ AAT «Lisičansknaftaorhsintez», jaki ekspłuatavaŭ Lisičanski NPZ. Z červienia 2003 h. pa sakavik 2005 hoda, a taksama ź vieraśnia 2006 h. — «Ukrhazbudoŭla». Bakulin staŭ staršyniom praŭleńnia «Naftahaz Ukrainy» ŭ sakaviku 2010 h.
Raniej u piatnicu stała viadoma, što hałoŭnaje śledčaje ŭpraŭleńnie MUS Ukrainy pravodzić śledčyja dziejańni ŭ centralnym ofisie «Naftahaza».
Kala ofisa i ŭ im znachodziacca ludzi ŭ maskach z ahniastrelnaj zbrojaj. Pradstaŭnik kancerna ŭdakładniŭ, što praca ofisa paralizavanaja, pravodziacca pieratrusy z kanfiskacyjaj dakumientaŭ.
«Naftahaz Ukrainy» abjadnoŭvaje najbujniejšyja naftahazazdabyvajučyja pradpryjemstvy krainy. Chołdynh źjaŭlajecca manapalistam pa tranzicie i zachoŭvańni pryrodnaha hazu ŭ padziemnych schoviščach, a taksama pa transparciroŭcy nafty trubapravodnym transpartam pa terytoryi krainy.
Kamientary