Hety bank trapiŭ u sankcyjny śpis ZŠA.
Prezident RF Uładzimir Pucin, jak i abiacaŭ, adkryŭ rachunak u banku «Rasija», paviedamiŭ u paniadziełak pres-sakratar kiraŭnika dziaržavy Dźmitryj Piaskoŭ.
Paśla taho jak na minułym tydni byŭ apublikavany sankcyjny śpis ZŠA, u jakim siarod šerahu bujnych rasijskich čynoŭnikaŭ apynuŭsia bank «Rasija», prezident zajaviŭ, što abaviazkova padtrymaje finansavuju ŭstanovu i adkryje tam rachunak. «Što da finansavaj ustanovy, nakolki ja razumieju, heta taki siaredni bank», — skazaŭ Pucin, vysłuchaŭšy ŭ piatnicu dakład kiraŭnika MZS Siarhieja Łaŭrova ab uviadzieńni Vašynhtonam sankcyj suprać Rasii. «U mianie asabista tam rachunku nie było, ale ja abaviazkova ŭ paniadziełak adkryju», — paabiacaŭ prezident. Bolš za toje, Pucin daŭ ukazańnie Upraŭleńniu spravami, kab tudy pieravodzili jaho zarabotnuju płatu.
Pry hetym kiraŭnik dziaržavy adrazu padkreśliŭ, što bank «Rasija» nie maje nijakaha dačynieńnia da padziej vakoł Ukrainy i Kryma. Jon dadaŭ, što «my, biezumoŭna, pavinnyja ŭziać nie tolki pad abaronu i ŭsialak akazvać sadziejničańnie klijentam hetaha banka i samoj finansavaj ustanovie», «kab nie było niehatyŭnych nastupstvaŭ — ni dla ŭstanovy, ni dla klijentaŭ banka». Uśled za prezidentam ab svaim namiery adkryć rachunak u hetym banku zajaviŭ kiraŭnik prezidenckaj administracyi Siarhiej Ivanoŭ.
U svaju čarhu, kiraŭnik praŭleńnia banka «Rasija» Jaŭhien Łahavinski zajaviŭ pra hatoŭnaść banka absłuhoŭvać vip-klijentaŭ, u tym liku prezidenta Rasii Uładzimira Pucina. Pra heta havorycca ŭ aficyjnym paviedamleńni kredytnaj arhanizacyi.
Kamientary