Usienarodny ruch «Biełaja Ruś» paŭstanie ŭ listapadzie

Ustanoŭčy schod respublikanskaha hramadskaha abjadnańnia «Biełaja Ruś» adbudziecca ŭ siaredzinie listapada. Pra heta paviedamiŭ BiełaPAN staršynia Minskaha abłasnoha hramadskaha abjadnańnia «Biełaja Ruś», namieśnik kiraŭnika kamisii pa nacyjanalnaj biaśpiecy Pałaty pradstaŭnikoŭ Nacyjanalnaha schodu Biełarusi Viktar Huminski.

Nahadajem, 2 lipienia ŭ stalicy adbyłosia pasiadžeńnie inicyjatyŭnaj hrupy pa stvareńni respublikanskaha hramadskaha abjadnańnia «Biełaja Ruś». U im uziali ŭdzieł prykładna 40 čałaviek. U inicyjatyŭnuju hrupu ŭvašli, u pryvatnaści, staršynia praŭleńnia Nacyjanalnaha banka Piotr Prakapovič, staršynia Minharvykankama Michaił Paŭłaŭ, spartsmieny Ivan Cichan, Natalla Cylinskaja i Julija Nieściarenka, śpiavačka Iryna Darafiejeva, staršynia pastajannaj kamisii pa mižnarodnych spravach i nacyjanalnaj biaśpiecy Savieta Respubliki Mikałaj Čarhiniec.

Členy inicyjatyŭnaj hrupy prapanavali pravieści ŭstanoŭčy schod respublikanskaha HA «Biełaja Ruś» u vieraśni—kastryčniku 2007 hoda.

Pavodle słoŭ V.Huminskaha, terminy praviadzieńnia ŭstanoŭčaha schodu byli pieraniesieny «ŭ suviazi ź siezonam adpačynkaŭ i niekatorymi techničnymi prablemami».

U 2004 hodzie ŭ Hrodnie było stvorana abłasnoje abjadnańnie «Biełaja Ruś». Adnak u 2007 hodzie arhanizacyja vyrašyła vyjści na respublikanski ŭzrovień. Na praciahu leta hetaha hoda ŭ rehijonach prachodzili ŭstanoŭčyja schody abłasnych, haradskich i rajonnych arhanizacyj «Biełaja Ruś».

U zvarocie inicyjatyŭnaj hrupy pa stvareńni respublikanskaha hramadskaha abjadnańnia «Biełaja Ruś», pryniatym 2 lipienia, zaznačajecca:

«Uśviedamlajučy histaryčnuju adkaznaść za dalejšy los našaha naroda i niezaležnaj suvierennaj biełaruskaj dziaržavy, padtrymlivajučy dziaržaŭnuju palityku narodnaha prezidenta A.R.Łukašenki, skiravanuju na pavyšeńnie efiektyŭnaści ekanomiki, raźvićcio sacyjalnaj śfiery, navuki i kultury, my, pradstaŭniki ŭsich rehioinaŭ i roznych sacyjalnych hrup, źviartajemsia da hramadzian Biełarusi z prapanovaj abjadnać namahańni dla dalejšaha ŭmacavańnia i roskvitu Biełarusi i stvaryć hramadskaje dobraachvotnaje samakirujemaje respublikanskaje abjadnańnie «Biełaja Ruś».

BiełaPAN

• 0
• 0
• 0
• 0
• 0