Były daradca Pucina Iłaryjonaŭ: Ja nie biarusia prahnazavać niezaležnaść Biełarusi paśla 25 maja

Andrej Iłaryjonaŭ, starejšy navukovy supracoŭnik Instytuta Katona (Vašynhton), u intervju Radyjo Svaboda apavioŭ, jak Uładzimir Pucin płanuje zachapić uschodniuju Ukrainu i kali Biełaruś moža stracić niezaležnaść.

— Jakaja rola ŭ hetych padziejach adviedziena Biełarusi, i nakolki jana samastojnaja?

— Pakul situacyja nie da kanca zrazumiełaja. Mnie zdajecca, što rašeńnie pra vykarystańnie ŭzbrojenych siłaŭ Biełarusi prymajecca Łukašenkam.

Vykarystańnie rasiejskich vojskaŭ z terytoryi Biełarusi taksama nie moža być biez toj ci inšaj zhody z boku Łukašenki. 

Pry hetym Łukašenka nadzvyčaj nie zacikaŭleny ŭ toj ci inšaj stupieni ŭdziełu Biełarusi, jaje ŭzbrojenych siłaŭ i terytoryi ŭ luboj atacy na Ukrainu. Jon nakolki moh aściarožna dystancyjavaŭsia ad svajho mahutnaha ŭschodniaha susieda z tym, kab nie pravakavać ahresiŭnuju reakcyju suprać jaho samoha, ale kab i pakazać, što ŭ jaho jość dystancyja. I dla Biełarusi, i dla Łukašenki asabista luby ŭdzieł Biełarusi ŭ apieracyjach suprać Ukrainy vielmi niebiaśpiečny.

— Toje, što vy kažacie, pakazvaje Alaksandra Łukašenku jak absalutna niezaležnaha, samastojnaha palityka…

— Nie. Nichto nie źjaŭlajecca całkam niezaležnym, ale Łukašenka dastatkova samastojny, kab nie paddavać samoha siabie vialikaj kolkaści ryzykaŭ. A ryzyki tut źviazanyja najpierš z nadzvyčajnym paharšeńniem stasunkaŭ pamiž im i luboj inšaj ukrainskaj uładaj. 

Bo, pa-pieršaje, heta adrazu pieratvaraje ŭsiu biełaruska-ukrainskuju miažu ŭ miažu patencyjnaha kanfliktu.

Druhoje. Heta adrazu psuje jahonyja i tak nie bliskučyja stasunki z Zachadam i bolšaj častkaj źniešniaha śvietu. Jon vyrakaje siabie na zusim inšy ŭzrovień izalacyi. Choć jon i zaraz nie moža pachvalicca nadta dobrymi stasunkami sa źniešnim śvietam, ale ŭsio toje, što było i jašče budzie prymienienaje ŭ dačynieńni da Rasii, budzie dakładna skarystanaje i suprać Biełarusi, ale tolki pamnožanaje na dziesiać. Kali zachodnija krainy jašče ŭ čymści aścierahajucca ci saromiejucca prymianić takija miery da Pucina, to ŭžo dakładna ich nie budzie ničoha strymlivać u dačynieńni da Biełarusi i Łukašenki.

I treciaje — samaje hałoŭnaje. Puskajučy rasiejskija vojski na terytoryju Biełarusi i dajučy im mahčymaść dziejničać, Łukašenka adkryvaje im mahčymaść paśla maršu na Kijeŭ zrabić marš na Miensk.

Ułasna kažučy, nichto ž nie moža vyklučać, što «raptoŭna» nie znojducca vypadki pieraśledu rasiejskamoŭnych na terytoryi Biełarusi, (abo voś) i niejkija paciarpiełyja hramadzianie Rasii.

Łukašenka takim rašeńniem na pustym miescy adkryŭ by try novyja franty. Pryčym treci front nakiravany niepasredna suprać jaho samoha.

Niahledziačy na ŭsie jahonyja ekzatyčnyja zajavy, jon nie jość nastolki nieadekvatnym.

— Na dadzieny momant vy bačycie varyjanty, pry jakich Biełaruś stała b častkaj Rasii — ci praz palityčnaje rašeńnie, ci praz vajskovaje ŭvarvańnie?

— Kaniečnie, moža stać. Kali Pucin prymie rašeńnie, to zachop Biełarusi — heta mahčymaja apieracyja.

— A jon choča?

— Kaniečnie, choča. Naturalna.

— Jak mocna i jak chutka?

— Viadoma ž, mocna, a voś jak chutka, to heta ŭžo treba hladzieć na situacyju. Naturalna, što heta ŭvachodzić u jahonyja płany. Ale płany niemahčyma ažyćciavić usie adrazu.

— To bok «płan Pucina» pa dałučenini Biełarusi da Rasii jość?

— Hladzicie, jon ža pra heta skazaŭ 18 sakavika ŭ svajoj znakamitaj pramovie. Tam šmat jość adsyłak, ale u adnym ź pieršych abzacaŭ jon kaža pra toje,

što «chryščeńniem kniazia Uładzimira była stvorana baza dla adzinaha narodu Rasiei, Ukrainy i Biełarusi». I nieadnarazova było skazana, što vialiki i adziny narod praciahvaje zastavacca raźjadnanym.

Tamu jaho zadača, jak jon jaje bačyć, palahaje ŭ tym, kab abjadnać raźjadnany narod.

— Ci jość pahroza niezaležnaści Biełarusi z boku Rasii ŭ samy blizki čas?

— Davajcie padzielim vašaje pytańnie na dźvie častki. Pieršaja: «Ci jość pahroza niezaležnaści Biełarusi?» Tak, jość.

Druhaja. Davajcie vyznačymsia, jaki časovy haryzont vy stavicie?

— Adzin hod. U 2015-m u nas prezydenckija vybary.

— Heta vy doŭhi peryjad prapanujecie. Voś Jaŭhien Marčuk [eks-ministr abarony Ukrainy, jaki ŭ čaćvier zajaviŭ, što ŭ najbližejšyja dva dni mahčymaja rasijskaja nastupalnaja apieracyja na ŭschodzie Ukrainy] ličyć dvuma dniami. Ja b tak skazaŭ — ciaham dvuch dzion pahrozy niezaležnaści Biełarusi niama.

Ja b navat ryzyknuŭ vykazacca, što, mahčyma, da 25 maja (dzień daterminovych prezidenckich vybaraŭ va Ukrainie) u vas jość jašče paŭza. A voś dalej ja b nie staŭ prahnazavać.

• 0
• 0
• 0
• 0
• 0
• 0
• 0
• 0