Rasija skaraciła kuplu ŭkrainskich vahonaŭ na 85%

U vyniku na fonie ahulnaj stahnacyi vahonnaha rynku vytvorčaść ukrainskich zavodaŭ ŭpała na 85% praz adsutnaść ekspartnych kantraktaŭ.

Miesca pastaŭščykoŭ z Ukrainy daŭno raźličvali zaniać ajčynnyja zavody, ale vytvorčaść bolšaści ź ich, za vyklučeńniem najbujniejšych hulcoŭ, taksama praciahvaje padać, piša «Kommiersant».

Vytvorčaść hruzavych vahonaŭ u SND u studzieni — lutym źniziłasia na 24%, da 11 tys. štuk, vynikaje z dadzienych ahienctva «Infoline-Analityka». Bolš za ŭsio (na 76%) upaŭ vypusk ukrainskich zavodaŭ, aryjentavanych u asnoŭnym na ekspart u Rasiju. Padzieńnie zakranuła amal usich: «Azoŭmaš» (na 85%), Krukaŭskaha vahonabudaŭničaha zavoda (na 80,6%), Stachanaŭskaha vahonabudaŭničaha zavoda (na 81,9%).

Rezkaje padzieńnie vytvorčaści vahonaŭ va Ukrainie źviazanaje sa strataj rasijskaha rynku praz paharšeńnie ŭzajemaadnosinaŭ pamiž dźviuma dziaržavami, tłumačyć kiraŭnik «Infoline-Analityki» Michaił Burmistraŭ.

Pavodle jaho słovaŭ, usiaho ŭ 2014 hodzie z Ukrainy było ekspartavana tolki 700 vahonaŭ, na 85% nižej, čym u 2013 hodzie. U hrašovym ekvivalencie źnižeńnie jašče macniejšaje — na 88,5%, da $40,1 młn, bo siaredniaja cana na ekspart za adzin vahon źniziłasia z $75 tys. da $57 tys. Asnoŭnymi pakupnikami ŭkrainskich vahonaŭ da hetaha času byli «VEB-Lizinh», Dziaržaŭnaja transpartnaja lizinhavaja kampanija, «Tranśfin-M» i apieratary — «Śpiecenierhatrans», «Improm», Fiederalnaja hruzavaja kampanija.

Zrešty, krynicy «Kommiersanta» na rynku zapeŭnivajuć, što źnižeńnie abjomaŭ zakupak ukrainskich vahonaŭ źviazanaje «ŭ pieršuju čarhu z ahulnym pieranasyčeńniem vahonnaha rynku». Hiendyrektar «Śpiecenierhatransa» Maksim Miranienka taksama paćvierdziŭ «Kommiersantu», što zakupki va ŭkrainskich zavodaŭ byli spynienyja «nie pa palityčnych pryčynach», a ŭ suviazi z adsutnaściu nieabchodnaści papaŭnieńnia parku va ŭmovach praźmiernaści vahonaŭ.

Pavodle słovaŭ Michaiła Burmistrava, ciapier zakupki va ŭkrainskich vytvorcaŭ ažyćciaŭlajuć u nievialikich abjomach tolki afilavanyja ź imi struktury. Pavodle jaho acenki, situacyja moža abiarnucca dla pradpryjemstvaŭ «prastojami vytvorčaści, skaračeńniem piersanału i paharšeńniem finansavaha stanovišča». Pa słovach krynicy «Kommiersanta» siarod rasijskich vahonabudaŭnikoŭ, niekalki tydniaŭ tamu «Azoŭmaš» prypyniŭ šerah vytvorčaściaŭ i adpraviŭ u adpačynak častku supracoŭnikaŭ. U «Azoŭmašy» i inšych ukrainskich zavodach na pytańni «Kommiersanta» nie adkazali.

• 0
• 0
• 0
• 0
• 0
• 0
• 0
• 0