Pracent tych, chto admoviŭsia pa suśvietnych mierkach standartny. Bolš za 2 tys. čałaviek u Biełarusi aficyjna napisali admovu stać donarami orhanaŭ i tkanak.
Kiraŭnik Respublikanskaha navukova-praktyčnaha centra transpłantacyi orhanaŭ i tkanak Aleh Rumo ličyć, što heta ŭ pracentnych adnosinach z ahulnaj kolkaściu nasielnictva «standartnyja ličby, jak va ŭsim śviecie».
«2100 čałaviek pa respublicy — heta nie mnoha, u nas u krainie amal 10 młn nasielnictva. Pracent tych, chto admoviŭsia, standartny, nie bolš i nie mienš, čym u inšych krainach».
Raniej paviedamlałasia, što ludziej, jakija napisali admovu być donarami orhanaŭ i tkanak paśla śmierci, było kala 50. U suviazi z hetym Rumo rastłumačyŭ, što paśla pryniaćcia adpaviednaha zakona, u krainie pačaŭ farmiravacca adziny rehistr donaraŭ orhanaŭ, kudy i zanosicca infarmacyja pra ludziej, jakija napisali admovu.
«Zaraz usia infarmacyja z paliklinik pra admovu sabranaja, voś i atrymałasia ličba 2100 admoŭnikaŭ. Heta infarmacyja za ŭsie hady. A śviežych zajaŭ ab tym, što čałaviek nie zhodny, kab jaho orhany paśla śmierci možna było vykarystoŭvać jak donarskija, u hod byvaje kala 100», — rastłumačyŭ jon.
Hałoŭny transpłantołah Ministerstva achovy zdaroŭja adznačyŭ, što z razumieńniem stavicca da pazicyi ludziej, jakija napisali admovu stać donarami orhanaŭ paśla śmierci.
«U vypadku nieabchodnaści i jany buduć pastaŭleny ŭ list čakańnia na praviadzieńnie im apieracyj pa transpłantacyi orhanaŭ i tkanak», — dadaŭ jon.
Za apošnija 6 hadoŭ u Biełarusi vykanana 244 pierasadki piečani, 125 pierasadak serca, bolš za 1 tys. apieracyj pa transpłantacyi nyrki.
U Biełarusi, u adpaviednaści z zakanadaŭstvam, u śfiery transpłantacyi orhanaŭ i tkanak dziejničaje pryncyp prezumpcyi zhody.
Relihijnyja arhanizacyi nie vystupajuć suprać vykarystańnia čužych orhanaŭ. Da prykładu ŭ Homieli pa inicyjatyvie prychadžan i pry padtrymcy parafii Naradžeńnia Najśviaciejšaj Baharodzicy ŭ kaściole prajšła akcyja: kataliki padpisali dobraachvotnuju zhodu na vykarystańnie paśla śmierci svaich unutranych orhanaŭ u transpłantałohii.
