Biełaruś patrabuje ad Rasii admovy ad pošlin na ekspart naftapraduktaŭ. U Rasii ŭ adkaz jość niekalki varyjantaŭ dziejańniaŭ.
Samy prosty ź ich — pajści na sastupku, zapatrabavaŭšy kampiensacyi ŭ vyhladzie prodažu biełaruskich NPZ, ličać rasijskija analityki.
Biełaruś spadziajecca, što intehracyja z Rasijaj u ramkach JeŭrAzES pryniasie joj vialikija bonusy ŭ vyhladzie admieny ŭsich abmiežavańniaŭ u handli.
Bolš za ŭsio naša kraina čakaje admieny vymańniaŭ ekspartnych pošlin, jakija Biełaruś płacić pry prodažy naftapraduktaŭ za miežy MS.
Rasija rabić heta nie śpiašajecca, adnak apošnim časam biełaruski bok usio bolš nastojliva źviartaje ŭvahu susiedki na jaje intehracyjnyja abaviazańni.
Kiraŭnik Biełarusi jašče ŭ minułym hodzie kazaŭ: «Pucin abiacaŭ — z 1 studzienia 2014 prybirajem usie kanfiskacyi i abmiežavańni ŭ handli… U advarotnym vypadku my Mytny sajuz nie paciahniem, kali nie budziem bačyć ad jaho ekanamičnaha efiektu». Pavodle słovaŭ Łukašenki, kali b Biełaruś nie pieraličvała ŭ biudžet RF myty ad ekspartu naftapraduktaŭ, «my b užo Emiraty tut mahli b pabudavać».
Pra toje, što źbirajecca rabić Maskva, rasijskija analityki razvažali 8 krasavika ŭ Minsku na kanfierencyi «Naftapierapracoŭka i ekspart naftapraduktaŭ», arhanizavanaj kampanijaj Confidence Capital.
Ci paciahnie Rasija svabodny rynak?
Prosta admovicca ad vypłaty Biełaruśsiu pošlin Rasii niavyhadna. Zdavałasia b, suma hetych pošlin dla Rasii nievialikaja — kala 3 młrd dalaraŭ. Adnak rasijski Minfin kaža, što pry takim scenary mahčymy reekspart biełaruskich naftapraduktaŭ, što pryviadzie da strat u 40 młrd. A heta ŭžo vielizarnaja suma.
Kab paźbiehnuć hetych strat, Rasija moža całkam admianić pošliny dla ŭsich hulcoŭ i pačać pracavać na ŭmovach svabodnaha rynku. Maŭlaŭ, raz užo admianiać dla Biełarusi abmiežavańni, to admianiać i pryvilei. Pra takuju mahčymaść zajaŭlaŭ namieśnik ministra finansaŭ RF Siarhiej Šatałaŭ: «Pakul damoŭlenaści nie dasiahnutyja i razhladajucca roznyja scenary. U zaležnaści ad taho, jakija buduć rašeńni, my možam albo pastupova praciahvać madyfikavać PZKV i ekspartnuju pošlinu, albo iści na bolš rezkija kroki». Scenar «bolš rezkich krokaŭ» rasijskija ekśpierty ŭžo prazvali «Vialikim padatkovym manieŭram».
Praŭda, dla Rasii hety scenar toić vialikuju niebiaśpieku.
Pa słovach śpiecyjalistaŭ, paśla admieny pošliny PZKV vyraście ŭ trochrazovym pamiery, što pryviadzie da rostu cen na ŭnutranym rynku da ŭzroŭniu rynku suśvietnaha. U hetym vypadku možna źnizić akcyzy na prodaž, ale da istotnaha patańnieńnia dla rasijskich spažyŭcoŭ heta nie pryviadzie.
Mała taho, u hetym vypadku naftavym kampanijam stanie bolš vyhadna ekspartavać naftu nie z Rasii, a ź Biełarusi i Kazachstana.
Treci šlach — pa canie biełaruskich NPZ
Siarhiej Ahibałaŭ, śpiecyjalist Instytuta enierhietyki i finansaŭ RF, ličyć ryzykoŭnym dla Rasii iści pa vyšejapisanym scenary. Jon, jak i mnohija ekśpierty, prapanuje inšy varyjant. «Možna prosta skazać, što ŭ nas družba i my hatovyja i dalej padtrymlivać biełaruskuju ekanomiku. U takim vypadku prosta admovicca ad viartańnia pošliny ź biełaruskich naftapraduktaŭ. Try miljardy — nievialikaja strata, zatoje nie daviadziecca pieravorvać uvieś aharod».
Adnak za takuju dabryniu Rasii «darečna zapatrabavać kampiensacyju inšaha rodu». Havorka idzie ab prodažy biełaruskich NPZ rasijskim inviestaram.
Pa słovach ekśpierta, takija hutarki z dvuch bakoŭ viaducca daŭno, i Biełaruś užo zrabiła sustrečnuju prapanovu, acaniŭšy Mazyrski NPZ u 4 młrd dalaraŭ ź inviestycyjnaj nahruzkaj plus 10 młn ton mahutnaściaŭ.
Rasijskim analitykam hetaja cana zdajecca zavyšanaj.
U dokaz jany kivajuć u bok padobnych uhodaŭ na suśvietnym rynku. Naprykład, «Rasnafta» pry kupli aktyvaŭ vieniesuelskaj kampanii addała za tonu pierapracoŭki kala 80 młn dalałaraŭ. U hetym hodzie «Łukojł» kupiŭ reštu akcyj sicylijskich NPZ pa canie kala 160 młn za tonu pierapracoŭki. Samuju darahuju ŭhodu pravioŭ «Surhutnaftahaz», jaki pradaŭ svaje vienhierskija aktyvy pa canie kala paŭmiljarda dalaraŭ. «Ale heta byli vielmi raźvityja NPZ, jakija pracujuć na pierśpiektyŭnych rynkach, ź vialikim pakietam u rytejle (u ich šmat ułasnych zapravak), — padkreśliŭ Siarhiej Ahibałaŭ. — U Mazyrskaha NPZ takoha pryjemnaha dapaŭnieńnia niama, tamu jamu łahična vystavić canu chacia b u 150 młn dalaraŭ za tonu». U hetym vypadku ahulny košt nie pavinny pieravysić 1,7 młrd dalaraŭ. Što vidavočna daloka ad zapytanych 4 młrd ź inviestycyjnym ciažaram.
Infarmacyja pa spravie
Zhodna ź mižuradavym pahadnieńniem RB i RF, z 2011 hoda pošliny na pastaŭki nafty ŭ Biełaruś admianiajucca. Zatoje Biełaruś abaviazvajecca addavać Rasii pošlinu ŭ vypadku ekspartu praduktaŭ z rasijskaj nafty za miežy MS.
Pavodle padlikach ekśpiertaŭ, u 2013 hodzie biazmytny ŭvoz nafty i ekspart naftapraduktaŭ dazvoliŭ biełaruskaj ekanomicy atrymać 8,3 młrd dalaraŭ dadatkovaha prybytku, ź jakich 3,3 młrd daviałosia pieraličyć u rasijski biudžet.
Stała viadoma pra śmierć 22-hadovaha chłopca, jakoha asudzili pa palityčnaj kryminałcy2
Kamientary