Žycharka Baranavič pisała palitviaźniu Aŭtuchoviču ŭvieś termin jaho źniavoleńnia

Pa słovach Volhi Fiłonavaj, pieršy raz jana napisała Aŭtuchoviču, kali ŭbačyła ŭ «Narodnaj voli» zvarot «Pavinšujcie palitviaźniaŭ z Novym hodam» z adrasami kałonij. Jana napisała ŭsim, ale pierapiska zaviazałasia tolki sa Źmitrom Daškievičam, Paŭłam Sieviaryncam i Mikałajem Aŭtuchovičam.

— U mianie šmat volnaha času, ja adzinokaja piensijanierka — što mnie jašče rabić? Padpracoŭvaju dvornikam, tamu niačasta apošnim časam vypadaje pahutaryć z razumnymi ludźmi, – śmiajecca Volha Fiłonava.

Aŭtuchovič vyzvaliŭsia apošnim z usich źniavolenych, tamu pierapiska ź im była samaj praciahłaj. Pa słovach žančyny, kožny miesiac jana atrymlivała pa 2–3 listy z-za krataŭ.

U listach Aŭtuchovič cikaviŭsia palityčnymi i hramadskimi navinami, jakija adbyvalisia na voli. Sam jon pra svaje prablemy nie paviedamlaŭ. Pra niepryjemnaści ŭ jaho žančyna daviedvałasia nie ź listoŭ, a sa ŚMI.

Volha Fiłonava kaža, što Aŭtuchovič — spraviadlivy i mocny, jak kamień, čałaviek, sa sfarmavanymi žyćciovymi pryncypami, jaki navat canoj žyćcia nie źbiraŭsia adstupać.

— Mnie było cikava ź im pierapisvacca, — kaža žančyna. — Jon dobra analizuje, šmat da čaho ŭ žyćci dajšoŭ sam. Mikałaj — šmatbakovaja asoba.

Asabista Aŭtuchoviča Volha Fiłonava nie viedaje. U 2010 hodzie, kali jaho druhi raz asudzili (na 5 hadoŭ i 2 miesiacy), žančyna jeździła na pasiedžańnie Viarchoŭnaha suda ŭ Minsku.

Volha ličyć, što paśla vyzvaleńnia Aŭtuchoviča im nie treba bolš listavacca ci sustrakacca.

— Ja padtrymlivała jaho, kali jon mieŭ abmiežavanyja kantakty i jamu patrebna była padtrymka z voli. Ciapier ža Mikałaju treba zabycca pra toje, što jon pieražyŭ, kab i znaku ŭ dumkach pra byłoje nie zastałosia, — kaža jana.

Pavialičyć

* * *
Mikałaj Aŭtuchovič, vieteran vajny ŭ Afhanistanie, kavaler ordena Čyrvonaj Zorki i miedaloŭ «Za advahu» i «Za bajavyja zasłuhi». Zajmaŭsia biźniesam u Vaŭkavysku. Baraćbit z karupcyjaj. U kastryčniku 2005 hoda byŭ aryštavany pa abvinavačvańni ŭ niavypłacie padatkaŭ. Asudžany na try z pałovaj hady. U znak pratestu haładaŭ 93 dni. Razam z šaściu palitviaźniami ŭ pačatku 2008 hoda vyzvaleny pad ciskam ZŠA i Jeŭrasajuza.

U lutym 2009 hoda znoŭ aryštavany. Za pieravozku i zachoŭvańnie piaci patronaŭ da palaŭničaj vintoŭki byŭ asudžany da piaci hadoŭ i dvuch miesiacaŭ pazbaŭleńnia voli va ŭmovach strohaha režymu. Abvinavačvańnie ŭ teraryźmie było źniata dziakujučy 90 dniam jaho haładoŭki.

Pravaabaroncy pryznali Aŭtuchoviča palitviaźniem, asudžanym za svaju aktyŭnuju hramadskuju dziejnaść i baraćbu z karupcyjaj. U studzieni 2012 hoda sud zrabiŭ bolš žorstkimi ŭmovy adbyvańnia pakarańnia Aŭtuchoviču, pryznaŭšy jaho «złosnym parušalnikam režymu».

• 0
• 0
• 0
• 0
• 0
• 0
• 0
• 0