Abłvykankamu i Minskamu harvykankamu daručana zrabić «efiektyŭnyja zachady dla zamacavańnia kadraŭ va ŭstanovach achovy zdaroŭja, u pieršuju čarhu ŭ ambułatorna-palikliničnym źvianie».
Takoje daručeńnie było dadziena na pasiadžeńni prezidyuma Savieta ministraŭ 8 krasavika ŭ Minsku, na jakim razhladałasia pytańnie «Ab udaskanaleńni pracy pa miedycynskim absłuhoŭvańni i lekavym zabieśpiačeńni nasielnictva Respubliki Biełaruś».
«Siońnia vielizarny niedakamplekt uračoŭ, siaredniaha i małodšaha miedycynskaha piersanału, asabliva ŭ paliklinikach nievialikich nasielenych punktaŭ. Nam treba hetyja pytańni vyrašać», — zajaviŭ premjer-ministr Biełarusi Michaił Miaśnikovič, paviedamlaje pres-słužba ŭrada.
«Važna, jak aceńvajuć uzrovień biełaruskaj achovy zdaroŭja ludzi», — ličyć Miaśnikovič. Kiraŭnik urada adznačyŭ, što kolkaść zvarotaŭ hramadzian pa pytańniach miedycyny nie źnižajecca. U Ministerstva achovy zdaroŭja Biełarusi letaś źviarnulisia bolš jak 9,6 tys. čałaviek. «Heta ŭsio śviedčyć pra toje, što ludzi šmat u čym nie zadavolenyja stanoviščam spraŭ u našaj achovie zdaroŭja», — zaŭvažyŭ premjer.
Najbolšy lik zvarotaŭ pastupiŭ z Bresckaj i Viciebskaj abłaściej, a taksama ź Minska.
U svaju čarhu Ministerstva achovy zdaroŭja Biełarusi prapanuje padniać zarabotnuju płatu ŭsim miedrabotnikam.
«Prašu padtrymać našu prapanovu ab pavyšeńni zarabotnaj płaty z 1 lipienia dla ŭsich miedycynskich rabotnikaŭ», — źviarnuŭsia da ŭrada ministr achovy zdaroŭja Vasil Žarko. Jon adznačyŭ, što «ciapier vielmi važna zrabić zachady dla zamacavańnia śpiecyjalistaŭ u krainie».
Jak adznačyła pres-słužba ŭrada, taksama na pasiadžeńni prezidyuma pastaŭlena zadača zaviaršyć u 2014—2015 hadach rekanstrukcyju i madernizacyju materyjalna-techničnaj bazy arhanizacyj achovy zdaroŭja abłasnoha, haradskoha i rajonnaha ŭzroŭniaŭ.
Akramia hetaha daručana ŭnieści va ŭstanoŭlenym paradku ŭ płan padrychtoŭki zakonaprajektaŭ na 2015 hod prapanovy ab raspracoŭcy prajektaŭ zakonaŭ Biełarusi ab zdarovym ładzie žyćcia i ab zaściarozie zdaroŭja nasielnictva ad nastupstvaŭ spažyvańnia tytuniu i ŭździejańnia tytuniovaha dymu.
Ministerstvu achovy zdaroŭja daručana «zabiaśpiečyć dastupnaść dla nasielnictva vysokatechnałahičnych mietodyk, jakija robiać značny uniosak u palapšeńnie demahrafičnych pakazčykaŭ, zabiaśpiečyć praviadzieńnie jakasnaj dyspansieryzacyi i skryninhaŭ sardečna-sasudzistych, ankałahičnych zachvorvańniaŭ, cukrovaha dyjabietu i faktaraŭ ryzyki ŭ metavych hrupach nasielnictva.
A taksama zrabić nieabchodnyja zachady dla naroščvańnia abjomaŭ vytvorčaści i realizacyi ajčynnych lekavych srodkaŭ na ŭnutranym i źniešnim rynkach, pašyreńnia asartymientu farmaceŭtyčnaj pradukcyi i zabieśpiačeńnia nasielnictva krainy dastupnymi i jakasnymi lekavymi srodkami».
Prezidyum Savieta ministraŭ daručyŭ raspracavać paradak testavańnia i psichasacyjalnaha ankietavańnia navučencaŭ i studentaŭ na pradmiet spažyvańnia ałkaholu, narkatyčnych i psichaaktyŭnych rečyvaŭ. Nieabchodna taksama raspracavać kompleks mierapryjemstvaŭ pa praduchileńni raspaŭsiudžvańnia narkatyčnych srodkaŭ i ich anałahaŭ siarod školnikaŭ i moładzi.
Kiraŭnik urada kanstatavaŭ tendencyju rostu pakazčykaŭ časovaj niepracazdolnaści nasielnictva i raschodaŭ na vypłatu adpaviednych dapamoh. Letaś raschody na apłatu balničnych listoŭ skłali 5,1 trłn. rubloŭ, prytym što na ŭsiu achovu zdaroŭja było vydzielena kala 25 trłn.
«Ja staŭlu zadaču pierad členami prezidyuma ŭrada vyjavić niedachopy ŭ sistemie achovy zdaroŭja, biezumoŭna, nie dla taho, kab pasypać hałavu popiełam, a dla vypracoŭki kompleksu mier, jakija buduć pracavać na ŭchileńnie pryčyn, jakija sparadžajuć niehatyŭnyja źjavy», — skazaŭ premjer-ministr.
Stała viadoma pra śmierć 22-hadovaha chłopca, jakoha asudzili pa palityčnaj kryminałcy2
Kamientary