The Telegraph: Izalacyja Pucina fatalnaja, Rasii niadoŭha zastałosia

Lubaja nadzieja na viarboŭku Piekina ŭ jakaści sajuźnika, jaki dapamoža prytupić bol sankcyj Zachadu, asudžanaja na pravał — a razam ź joj i šancy Kramla na biazbolnuju pieramohu i na pieramohu naohuł.

Pucin u svajoj pieramožnaj pramovie pa Krymie paśpiašaŭsia padziakavać kitajskamu palitbiuro za nibyta akazanuju padtrymku. Ministr zamiežnych spravaŭ Siarhiej Łaŭroŭ z ułaścivaj jamu ełastyčnaściu paviedamiŭ pra «supadzieńnie acenak Rasii i Kitaja pa situacyi va Ukrainie».

Heta, viadoma ž, adčajnaja chłuśnia. Kitaj nie stajaŭ za Rasijaj padčas hałasavańnia pa Krymie ŭ Radzie Biaśpieki, jak heta było ŭ vypadku ź Siryjaj. Jon demanstratyŭna ŭstrymaŭsia.

Jaho ministerstva zamiežnych spravaŭ zajaviła, što «Kitaj zaŭsiody prytrymlivajecca pryncypaŭ nieŭmiašańnia va ŭnutranyja spravy luboj dziaržavy i pavažaje niezaležnaść, suvierenitet i terytaryjalnuju cełasnaść Ukrainy».

My nie viedajem dakładna, što skazaŭ Si Czińpin padčas sustrečy z prezidentam Abamam u Haazie, ale toje, što jon skazaŭ, nie maje ničoha ahulnaha z varjackimi acenkami Kramla. Namieśnik daradcy pa nacyjanalnaj biaśpiecy ZŠA Ben Rods zachopleny chodam hetych pieramovaŭ i paśla ich śćviardžaŭ, što Rasija bolš nie moža spadziavacca na «tradycyjnaha sajuźnika».

Kali heta tak, to Pucina abduryli.

Jamu nie ŭdasca paźbiehnuć finansavaha zadušvańnia amierykanskimi finansavymi muskułami — i ŭ vypadku, kali jon pašle sałdat va Uschodniuju Ukrainu, i ŭ vypadku, kali jon prosta abmiažujecca raździmańniem tam chaosu z dapamohaj rasijskich ahientaŭ-pravakataraŭ.

Niama ŭ jaho nadziej i na toje, što ŭdasca źmiašać usie karty Zachadu, stvaryŭšy z Kitajem Jeŭrazijski błok — lihu aŭtarytarnych režymaŭ, što kantraluje hihanckija zapasy pryrodnych resursaŭ. Taki vynik — absesija «špienhlerytaŭ», samanienaviśnikaŭ Zachadu, upeŭnienych u tym, što z Amierykaj skončana i što dalar budzie zamienieny na jeŭrazijski załaty dukat.

Realnaść u tym, što Kitaj pastajanna i niastomna razburaje manapoliju Rasii na kantrol nad hazavymi zapasami Siaredniaj Azii.

Turkmienski haz zaŭsiody išoŭ na poŭnač i byŭ zakładnikam cenavaj palityki Hazprama. Ciapier jon idzie na ŭschod. Prezident Si asabista źjaviŭsia ŭ vieraśni 2013 na adkryćcio 1800-kiłamietrovaha hazapravoda ŭ Kitaj z radovišča Hałkiniš, druhoha pa abjomach ŭ śviecie (26 trłn kubamietraŭ).

Pa hazapravodzie budzie pastaŭlacca da 62 miljardaŭ kubamietraŭ hazu ŭ hod. Heta pałova taho, što Hazpram pastaŭlaje Jeŭropie. Toje samaje adbyvajecca ŭ Kazachstanie, dzie kitajskija kampanii ŭstalavali kantrol nad bolšaj častkaj enierhietyčnaj industryi. Toje, što adbyvajecca, źjedliva apisana ŭ sieryi dypłamatyčnych telehram ź Siaredniaj Azii, apublikavanych Wikileaks. Brytanski dypłamat u 2010 paviedamlaŭ, što ruskija «z bolem» nazirajuć za tym, jak ich enierhietyčnaje daminavańnie ŭ Siaredniaj Azii vyparajecca.

Jašče bolš adkryvaje vočy na toje, što adbyvajecca, telehrama, u jakoj cytujecca pasoł KNR u Kazachstanie Džeń Huapin. Jon papiaredžvaje, što Kitaj i Rasija iduć kursam, jaki viadzie da sutyknieńnia, i bokam, jaki sastupić, budzie nie Kitaj. Pasoł zajaviŭ: «U budučyni adnosiny pamiž vialikimi dziaržavami ŭ Siaredniaj Azii buduć dalikatnymi i składanymi. Novyja nafta- i hazapravody rujnujuć rasijskuju manapoliju na enierhietyčny ekspart».

Spadar Džeń nie tolki pazityŭna acaniŭ amierykanskuju rolu ŭ rehijonie, ale i vykazaŭ mierkavańnie ab tym, što NATA musić uziać udzieł u jakaści naziralnika na pieramovach Šanchajskaj arhanizacyi supracoŭnictva — mierkavanym rasijska-kitajskim adkazie na voś ES/NATA — z metaj «razburyć rasijskuju manapoliju ŭ rehijonie».

Voś SSSR/Kitaj była adnym z ulubionych pudziłaŭ u 60-ja. Hienry Kisindžer, adnak, bačyŭ, što dźvie varožyja kultury na nažach na ŭsim praciahu ich miažy.

Jak trapna vykazaŭsia ŭ 2006 Akichiera Ivasita, «čatyry tysiačy kiłamietraŭ prablem».

Džordž Vałden vystaviŭ napakaz hłybokija karani hetaha ŭzajemnaha niedavieru ŭ svajoj maleńkaj knizie «China: A Wolf in the World?» Jon pracavaŭ dypłamatam i ŭ Rasii, i ŭ Kitai. Jon byŭ adnym ź vielmi niešmatlikich pradstaŭnikoŭ Zachadu, jakija žyli ŭ Kitai ŭ pieryjad kulturnaj revalucyi. Jon uščylnuju naziraŭ, jak hłyboka dźvie haliny bratoŭ-marksistaŭ nienavidzieli adno adnaho. I sapraŭdy, jany dajšli da miažy jadziernaj vajny. I CRU, i Dziarždepartament byli ašałomlenyja jaho spravazdačaj. U ich nie było krynic na miescach u epochu Maa.

Vałden kaža, što kitajcy nikoli nie darujuć rasijcam zachopu Uschodniaj Sibiry — jašče za carom.

Dla ich heta «stračanyja terytoryi». Jany chočuć viartańnia ułasnaści, i ŭ hetym ich padtrymlivaje etničnaje pierasialeńnie za Amur, što vielmi nahadvaje mieksikanskuju mihracyjnuju Rekankistu Kalifornii i Techasa.

Nasielnictva Uschodniaj Sibiry za 20 hadoŭ skaraciłasia z 8 młn da 6,3 młn čałaviek, i za hetymi ličbami stajać harady-pryvidy ŭzdoŭž Tranśsibirskaj mahistrali.

Rasija nie zmahła skarystacca plonam svajho ŭschodniaha mierapryjemstva. Z uzroŭniem naradžalnaści 1,4, chraničnym ałkahalizmam i čakanym skaračeńniem nasielnictva na 30 miljonaŭ — pavodle prahnozaŭ, da 2050 u Rasii budzie žyć nie bolš za 110 miljonaŭ čałaviek (pa statystycy AAN, a nie demohrafaŭ Pucina), nacyja niepaźbiežna adkocicca da jeŭrapiejskaha bastyjonu Staroj Maskvy. Pytańnie ŭ tym, nakolki chutka i nakolki mirna.

Ekśpiert pa Kitai Džonatan Fienbi kaža, što ŭ kitajskaj Radzie nacyjanalnaj biaśpieki jość frakcyja, hatovaja padtrymać Pucina pa Ukrainie, spadziejučysia naŭzamien vycisnuć ź jaho bolš vyhadnyja ŭmovy pastavak hazu, praduktaŭ charčavańnia i karysnych vykapniaŭ. Ale hetyja hałasy byli zahłušanyja Si Czińpinam. Jon hulaje stratehična.

Kitaj chutčej za ŭsio pojdzie pa tuha naciahnutym kanacie, «chavajučy svaju mahutnaść i kuplajučy čas». Heta stała ciažej z eskałacyjaj ukrainskaha kryzisu. Piekinu daviadziecca vybirać. Bolš čym vierahodna, što impierski Czińpiń nie vykinie vialiki pryz amierykanska-kitajskaj «Vialiki Dvojki» dziela vyratavańnia ŭbohaha i niekampietentnaha režymu ŭ Maskvie ad jaho ŭłasnaj nierazvažlivaści.

Pucin pavinien ciapier uśviadomić, nakolki fatalnaja jaho izalacyja i nakolki niebiaśpiečny kožny nastupny krok.

Navat usiodaravalnaja kancler Hiermanii Anhieła Mierkiel straciła ciarpieńnie i horka skardzicca na «niepaźbiežnuju stratu davieru». Dastatkova jeŭrapiejskich trubapravodaŭ, pačynajučy z 2009 hoda, było pieraabstalavana dla padačy paliva ŭ dvuch napramkach z metaj, u vypadku nieabchodnaści, dapamahčy ŭraźlivym prymiežnym dziaržavam. Vosiem dziaržavaŭ ES majuć terminały LNG. Jašče dźvie — Polšča i Litva — dałučacca da kłuba sioleta.

Samit ES na minułym tydni byŭ zaklikam da zbroi. Čynoŭnikam zahadana ciaham 90 dzion raspracavać płan razryvu zaležnaści ad «Hazprama». Navat kali «praniasie» hetym razam, Jeŭropa zrobić radykalnyja kroki z metaj pošuku inšych krynic enierhii. Impart z Rasii skarocicca napałovu ciaham 10 hadoŭ.

Ucioki kapitału z Rasii ŭ pieršym kvartale dasiahnuli 70 miljardaŭ dalaraŭ. Rasijski Centrabank nie moža abaranić rubiel biez uzmacnieńnia žorstkaści manietarnaj palityki, u pracesie paharšajučy recesiju. Rasijskim bankam i pradpryjemstvam treba budzie ŭ najbližejšyja 12 miesiacaŭ zakryć kredyty na 155 miljardaŭ dalaraŭ — na varožym rynku, dapłaty na jakim užo ciapier pavysilisia na 200 bazisnych punktaŭ.

Pucin pačynaje ŭśviedamlać, što hłabalnyja rynki bolš napałochanyja amierykanskaj kamisijaj pa kaštoŭnych papierach, čym rasijskimi tankami T-90.

Lubaja sankcyja suprać luboha rasijskaha aliharcha, źviazanaha z rasijskaj kampanijaj, vybivaje hetuju kampaniju z hłabalnaha rynku i patencyjna viadzie da defołtu. Kredytory na Zachadzie paharać. Ale nichto nie prymie heta ŭ raźlik, kali havorka idzie pra intaresy nacyjanalnaj biaśpieki.

Pucin taksama vybraŭ nie samy ŭdały momant dla svajoj avantury. U Jeŭropy ciapier niezvyčajna vialikija zapasy hazu.

Ceny na naftu — pry inšych roŭnych umovach — pavinnyja ŭpaści. Irak dasiahnuŭ maksimalnaha ŭzroŭniu vytvorčaści za apošnija 35 hadoŭ, Amieryka štodnia dadaje na rynak pa niekalki socień barelaŭ słancavaj nafty, a Livija adnaŭlaje ekspart. Pavodle statystyki International Energy Agency, suśvietnaja zdabyča ŭ minułym miesiacy padskočyła na 600 tysiač barelaŭ u dzień. Deutsche Bank pradkazvaje pieranasyčeńnie rynku. Toje ž samaje pradkazvaje kitajski Sinopec. Pucinu pad jaho biudžet patrebnaja cana 110 dalaraŭ za barel. Vielmi chutka jon moža sutyknucca z realnaściu ŭ 80 dalaraŭ za barel.

Urešcie, jon asudziŭ Rasiju na pastku siaredniaha dachodu. Niečakanyja bahaćci naftavaha bumu rastračanyja.

Rasijskija inžyniernyja navyki atrafiravalisia. Pramysłovaść spustošanaja hałandskaj chvarobaj (deindustryjalizacyja krainy, jakaja pierajšła na ekspart adnaho vidu syraviny): praklonam pieraacenki valuty i zaležnaściu ad prodažu syraviny.

Jon pabieh papieradzie paravoza da taho, jak pierachodny ŭrad paśpieŭ narabić čahości surjoznaha abo rastracić kredyt dobraj voli mižnarodnaj supolnaści.

Havorka idzie pra niepadrychtavany i paśpiešlivy vystup — KDBist śpiašaŭsia.

Jon pryniaŭ Hiermaniju za maryjanietku i pryniaŭ Kitaj za niešta samo saboj zrazumiełaje. Jon atrymaŭ Krym, ale pieratvaryŭ Kreml u paryju — jašče na adno dziesiacihodździe, kali nie pakaleńnie, i chutčej za ŭsio nazaŭždy straciŭ Ukrainu. Havorka idzie pra ŭ najvyšejšaj stupieni niaŭdałuju ŭhodu.

• 0
• 0
• 0
• 0
• 0
• 0
• 0
• 0