Rašeńnie suda ŭ Sankt-Pieciarburhu adchilić apielacyju antydyskryminacyjnaha centra «Miemaryjał» na rašeńnie suda nižejšaj instancyi ab pryznańni arhanizacyi «zamiežnym ahientam» źjaŭlajecca jurydyčnym ciskam na ŭsiu hramadzianskuju supolnaść u Rasii.
Pra heta zajaviła Amnesty International.
ADC «Miemaryjał» — adna z najbujniejšych pravaabarončych NKA, jakaja dapamahaje achviaram rasizmu i ksienafobii, — vyrašyła prypynić svaju dziejnaść u Rasii, nie žadajučy nasić jarłyk «zamiežnaha ahienta» abo padviarhać svajho kiraŭnika pahrozie kryminalnaha pieraśledu za admovu ad rehistracyi.
«U suda było dźvie mahčymaści, adnak vyniesienaje rašeńnie akazałasia zusim nie na karyść spraviadlivaści i pravoŭ čałavieka.
Hetaje niedalnabačnaje rašeńnie idzie ŭ nahu z pryhniotam rasijskimi ŭładami lubych prajavaŭ hramadzianskaj supolnaści. Jano źjaŭlajecca niebiaśpiečnym precedentam, jaki mohuć vykarystoŭvać suprać inšych NKA», — zajaviŭ Siarhiej Nikicin, dyrektar pradstaŭnictva Amnesty International u Maskvie, dadaŭšy:
«Rasijskija ŭłady metanakiravana pazbaŭlajuć hramadstva mahčymaści pačuć jaki-niebudź alternatyŭny punkt hledžańnia i rujnujuć samu mahčymaść kantrolu raboty ŭrada z boku hramadstva. Mišeńniu robicca kožny, u kaho chapiła advahi krytykavać uładu».
Pieraśled ADC «Miemaryjał» pačaŭsia bolš za hod tamu, kali prakuratura abviaściła dakład «Cyhanie, mihranty, aktyvisty: achviary palicejskaha samavolstva», pradstaŭleny Kamitetu AAN suprać katavańniaŭ u listapadzie 2012 hoda, dokazam taho, što ADC «Miemaryjał», nie zarehistravaŭšysia ŭ jakaści «zamiežnaha ahienta», zajmajecca «palityčnaj dziejnaściu», što źjaŭlajecca parušeńniem pryniataha niezadoŭha da hetaha zakona ab zamiežnych ahientach.
U traŭni i lipieni 2013 NKA paśpiachova vyjhrała abiedźvie spravy, zaviedzienych suprać jaje z padačy prakuratury. Adnak 12 śniežnia 2013 pieciarburhski sud zadavoliŭ novaje chadajnictva prakuratury pryznać usie dziejańni ADC «Miemaryjał» «palityčnaj dziejnaściu» i abaviazać jaho zarehistravacca ŭ jakaści «zamiežnaha ahienta».
Stefanija Kułajeva, kiraŭnik ADC «Miemaryjał», vykazała škadavańnie z nahody siońniašniaha rašeńnia suda, razmaŭlajučy z pradstaŭnikami Amnesty International.
«Sudovy praces nie byŭ abjektyŭnym, — raskazała Amnesty International Stefanija Kułajeva. — Našych abaroncaŭ pastajanna pierabivali, a bok abvinavačvańnia moh dziejničać svabodna».
Zakon ab «zamiežnych ahientach», pryniaty bolš za hod tamu, daje rasijskim uładam prava nakładać bujnyja štrafy i pryciahvać da surjoznaj administracyjnaj adkaznaści arhanizacyi, jakija finansujucca z-za miažy i jakija zajmajucca, zhodna z davoli raspłyvistym vyznačeńniem, «palityčnaj dziejnaściu», ale nie zarehistravalisia ŭ jakaści «arhanizacyi, jakaja vykonvaje funkcyi zamiežnaha ahienta».
Rašeńnie suda pa spravie ADC «Miemaryjał» pryniataje ŭ toj ža dzień, kali Kanstytucyjny sud RF pastanaviŭ, što zakon ab «zamiežnych ahientach» nie supiarečyć kanstytucyi krainy. Ceły šerah NKA i ŭpaŭnavažany pa pravach čałavieka Uładzimir Łukin apratestavali hety zakon na toj padstavie, što jon abmiažoŭvaje svabodu samavyjaŭleńnia i svabodu asacyjacyj, choć majecca na ŭvazie, što i toje, i druhoje harantujecca rasijskaj kanstytucyjaj.
«Stanovicca ŭsio bolš vidavočnym, što rasijskija ŭłady z djabalskaj upartaściu imknucca luboj canoj zdušyć hramadzianskuju supolnaść», — zajaviŭ Siarhiej Nikicin.
Stała viadoma pra śmierć 22-hadovaha chłopca, jakoha asudzili pa palityčnaj kryminałcy2
Kamientary