Košt adnaho novaha elektronnaha kampościera ŭ hramadskim transparcie stalicy składaje 7,206 młn rubloŭ, abo 727 dalaraŭ pa kursie nacyjanalnaha banka. Takaja suma atrymlivajecca ŭ vyniku prostych aryfmietyčnych dziejańniaŭ ź ličbami, jakija znachodzim u tendarnaj dakumientacyi (1730 štuk za prykładna 12,5 młrd rubloŭ) na sajcie dziaržzakupak, i ŭ vynikovym pratakole pracedury.
«Na miescy sučasnych kampościeraŭ mahli raźmiaścić płanšetnyja kamputary firmy Apple, i «Minsktrans» zekanomiŭ by», — skazaŭ u efiry prahramy «Amplituda» pra dziaržzakupki kiraŭnik prajekta «Srodki urada» u ramkach prajekta BIPART Uładzimir Kavałkin.
Ekśpiert adznačaje, što, pa ŭmovach tendaru, kampościery pavinny być sumiaščalnymi z peŭnymi prahramnym zabieśpiačeńniem, što značna abmiažoŭvaje patencyjnych udzielnikaŭ aŭkcyjonu. U vyniku, u im pryniali ŭdzieł zakrytaje akcyjaniernaje tavarystva «Mižnarodny dziełavy aljans» (IBA) i tavarystva z abmiežavanaj adkaznaściu «NIIEVMsiervis». Na sajcie apošniaj kampanii havorycca: «NIIEVMsiervis ŭvachodzić u hrupu kampanij IBA, padtrymlivaje ciesnaje dziełavoje supracoŭnictva z usimi členami hetaj hrupy, aktyŭna ŭdzielničaje ŭ sumiesnym prajekcie».
«Faktyčna ŭ tendary ŭdzielničali daččynaja i matčyna kampanii, što prymušaje zadumacca pra jakaść tendarnaj pracedury», — kaža Kavałkin i padkreślivaje, što zakupka kampościeraŭ prajšła za srodki padatkapłacielščykaŭ.
Kavałkin taksama kaža pra toje, što da 11 krasavika prymajucca zajaŭki na ŭdzieł u tendary na zakupku inšaha abstalavańnia dla ŭdaskanaleńnia sistemy apłaty za prajezd u hramadskim transparcie.