I sprava tut nie tolki ŭ asabistym zachapleńni kiraŭnika dziaržavy, jakoje ŭžo ŭvajšło ŭ biełaruski falkłor. «Sport daŭno staŭ vialikaj palitykaj, i vielmi časta, navat, ryzyknu skazać, u bolšaści svajoj palitykaj brudnaj i nieprystojnaj», — adznačyŭ Łukašenka na pasiadžeńni.
Ladovaje paboišča z dyktaturaj nie adbudziecca
Adčuvajecca, što biełaruski aficyjny lidar pierachvalavaŭsia za los miłaha sercu mierapryjemstva, prava na jakoje Minsk atrymaŭ jašče ŭ 2009 hodzie. I navat ciapier, kali ŭžo jasna, što bajkotu nie budzie, Łukašenka lišni raz prajšoŭsia pa apazycyjanierach i zachodnich palitykach, jakija sprabavali, jak jany kazali, «sapsavać dyktataru śviata».
Prezident, jon ža kiraŭnik NAK, padkreśliŭ, źviartajučysia da siłavikoŭ: «Hałoŭnaje — nie dapuścić nijakich pravakacyj». Padobna, što jak u vadu hladzieŭ apazicyjny lidar Uładzimir Niaklajeŭ, kali pradkazaŭ dniami, što «pierad čempijanatam śvietu pa chakiei, jaki projdzie z 9 pa 25 maja ŭ Minsku, ułady pojduć da previentyŭnych zatrymańniaŭ demakratyčnych aktyvistaŭ».
Ale i tych aktyvistaŭ, što zastanucca na svabodzie, achoŭniki ŭ formie i ŭ cyvilnym buduć hatovyja adłavić na dalokich podstupach da ladovych aren i inšych hramadskich miescaŭ.
A naohuł płany kštałtu «rasprapahandavać» zaŭziataraŭ, svaich i zamiežnych, kab jany prasiaknulisia niepryjaznaściu da dyktatury i pačali machać na trybunach apazicyjnaj simvolikaj, adpačatku vyhladali, na dumku šmatlikich ahladalnikaŭ, jak chistkimi ŭ arhanizacyjnym płanie, tak i nie zanadta razumnymi z palityčnaha punktu hledžańnia.
Reč nie tolki ŭ tym, što heta chvory mazol Łukašenki, i, adpaviedna, elemientarna prahnazujecca toje, što orhany atrymajuć zahad biaźlitasna krucić buntaŭnikoŭ. Hałoŭnaje ž — na chakiei ludzi, navat tyja, što nie adčuvajuć simpatyi da režymu, chočuć rassłabicca i atrymać zadavalnieńnie. Heta nie toj momant, kali treba machać ahitkami.
Vialiki sport, hetaje mahnietyčnaje šou, chutčej hurtuje masu vakoł pravadyra, niezdarma Pucin stolki ŭkłaŭ u sočynskuju alimpijadu i naohuł aŭtarytarnyja lidary imknucca da vidoviščaŭ na arenach.
I dziŭna, što raspracoŭščyki hetych płanaŭ nasalić dyktataru nie razumiejuć, što takim šlacham elektaralnuju bazu nie pašyryš. Naadvarot, tolki ŭzmocnicca niehatyŭny imidž tych, chto viečna sunie pałki ŭ koły. Kali čempijanat sapraŭdy projdzie pryhoža, dziaržprapahanda jašče nie raz skaža zadavolenym jak słany prostym biełarusam: voś bačycie, a «piataja kałona» chacieła ŭsiu hetuju malinu abhadzić!
Krym zžare biełaruskuju pajku
Kali abmierkavańnie chakiejnaha pytańnia na Radzie Biaśpieki aficyjnyja krynicy vykłali padrabiazna, to pra ŭkrainskija ŭroki dali tolki paru abzacaŭ ahulnych słovaŭ.
Pry hetym Łukašenka ŭzmocniena padkreślivaŭ: «…My zusim čahości tam nie spałochalisia». Takija starannyja zapeŭnivańni, na dumku znaŭcaŭ jaho psichałohii, zaŭsiody varta čytać dakładna naadvarot.
«Dumaju, što emacyjna režym napałochała rasijskaja ahresija va Ukrainie. Adnak strach prachodzić, i vidać, što vynikam palityki Kramla mohuć stać prablemy dla ekanomiki Biełarusi», — skazaŭ u kamientary dla Naviny.by Andrej Parotnikaŭ, kiraŭnik analityčnaha prajekta Belarus Security Blog.
Pa słovach analityka, tut moža spracavać kompleks niespryjalnych faktaraŭ, u pryvatnaści, adabjucca «prasadka ekanomiki Ukrainy, upłyŭ sankcyj Zachadu na inviestycyjnyja płany rasijskich kampanij, što moža adbicca na biełaruskim eksparcie».
Sapraŭdy, usio bolš simptomaŭ taho, što, nie majučy vialikaj achvoty bicca za Ukrainu, Zachad patrochu namacaŭ bolevyja kropki pucinskaha režymu.
Rasija ŭžo stračvaje na krymskaj avantury šalonyja hrošy (škoda ad sankcyj, adtok kapitału, padzieńnie fondavaha rynku i inšaje). Kali zaŭtra Štaty na paru z saudaŭcami abvalać ceny na naftu, Maskva atrymaje finansavuju praboinu nižej za vaterliniju.
I ŭ lubym vypadku ŭ Kramla ŭžo nie budzie dla Biełarusi stolki piernikaŭ, uklučajučy bonusy za ŭvachodžańnie ŭ Jeŭrazijski sajuz, jak heta jašče niadaŭna ŭjaŭlałasia chitrym intehrataram u Minsku.
Jak Rasija budzie brać Biełaruś
Paśla Kryma stała da bolu jasna, što intehracyja ź impieryjaj — mienavita toj vypadak, jaki ruskija apisvajuć prykazkaj: pajšoŭ pa voŭnu, a viarnuŭsia stryžany. Pryčym pad nuloŭku mohuć padstryhčy samu niezaležnaść.
Chutčej za ŭsio, Rasija budzie brać Biełaruś biez tankavych udaraŭ, cichaj sapaj. Tak ličyć, u pryvatnaści, palitołah, dyrektar Centra jeŭrapiejskaj transfarmacyi (Minsk) Andrej Jahoraŭ.
U kamientary dla Naviny.by jon abmalavaŭ imavierny scenar padparadkavańnia Kramlom «małodšaj siastry».
Pa-pieršaje, heta «adciskańnie funkcyj kiravańnia krainaj na nadnacyjanalny ŭzrovień, naprykład, praz delehavańnie ich orhanam Jeŭrazijskaha sajuza».
Pa-druhoje, razbureńnie kansalidacyi biełaruskaj namienkłatury: praz podkup, abiacańnie dabrotaŭ i pasadaŭ pry źmienie ŭłady (takija mietady Maskvy prasočvajucca siońnia va Ukrainie). Piataja kałona (sapraŭdnaja, a nie prydumanaja antyzachodniaj prapahandaj) budzie kamplektavacca taksama za košt «kiravanych hramadskich arhanizacyj».
Pa-treciaje, havoryć Jahoraŭ, Kreml budzie bolš žorstka cisnuć, prymušajučy da prodažu aktyvaŭ. Pryčym tut dla Rasii važna avałodać nie stolki samimi zavodami, nie takimi ŭžo i prybytkovymi, kolki ludskimi resursami i terytoryjami (kali havorka idzie pra horada- i biudžetaŭtvaralnyja pradpryjemstvy). Bo siońnia ŭłada Łukašenki šmat u čym trymajecca na kantroli nad adziaržaŭlenaj ekanomikaj.
Biełaruski prezident vydatna bačyć hetyja niebiaśpieki, ale resurs supracivu ŭ jaho vyčarpaŭsia daščentu.
Tolki za pieršy kvartał zołatavalutnyja reziervy skaracilisia jašče biez małoha na miljard dalaraŭ. Biez padsiłkoŭvańnia z Maskvy, prodažu ŭłasnaści nie abyścisia.
«Siońnia robicca vidavočnym, što biełaruskaja ŭłada ŭsie hetyja hady nie dziejničała ŭ intaresach Biełarusi. U vypadku rasijskaj interviencyi my stracim terytoryju jašče cišej, čym heta było z Krymam. A kali zaŭtra buduć padpisanyja niejkija pahadnieńni, to ŭvohule nichto nie budzie hatovy štości hetamu supraćpastavić — ni ŭ apazicyi, ni ŭ hramadstvie, ni siarod šyrokich słajoŭ nasielnictva. Prosta pračniemsia ŭ novaj hieapalityčnaj realnaści», — taki nieviasioły varyjantny prahnoz Jahorava.
I kali najhoršy varyjant nie spraŭdzicca, to nie dziakujučy mahutnym aporam biełaruskaj niezaležnaści (ułada za 20 hadoŭ ich tak i nie stvaryła), a tolki z toj pryčyny, što Maskva nadarviecca na «ŭkrainskim pytańni».