Uzbrojenaja prysutnaść Rasii na miažy z Ukrainaj nie słabieje, zajaŭlajuć u NATA.
U adkaz na rasijskuju vajennuju pahrozu ŭ dačynieńni da Ukrainy NATA moža razharnuć amierykanskija vojski na terytoryi krain Uschodniaj Jeŭropy, jakija ŭvachodziać u aljans.
Pra heta zajaviŭ hałoŭnakamandujučy Abjadnanymi ŭzbrojenymi siłami NATA ŭ Jeŭropie hienierał VPS ZŠA Filip Brydłaŭ u intervju Associated Press.
Sa słovaŭ hienierała, uschodniejeŭrapiejskija členy NATA taksama adčuvajuć siabie pad pahrozaj, i jon «nie moža vyklučyć udziełu (u razhortvańni vojskaŭ) ni adnoj armii, u tym liku Złučanych Štataŭ».
«My razhladajem kompleks naziemnych, pavietranych i marskich mier, jakija nadaduć upeŭnienaści našym uschodnim sajuźnikam, — zajaviŭ Brydłaŭ. — Mnie daručana raspracavać jaho da nastupnaha tydnia, i ja maju namier vykanać hetaje daručeńnie ŭ samyja karotkija terminy».
Vystupajučy na kanfierencyi NATA ŭ Paryžy, Brydłaŭ skazaŭ, što ŭzbrojenaja prysutnaść Rasii na miažy z Ukrainaj nie słabieje. «Pavodle našych acenak, kolkaść (vojskaŭ RF u rehijonie) składaje kala 40 tys. čałaviek. Inšymi słovami, heta armija, u jakoj jość reziervy i ŭsio, što patrabujecca dla vykanańnia vajennych zadač, kali takija buduć pastaŭleny», — padkreśliŭ Brydłaŭ.
Pa śćviardžeńni hienierała, rasijskaja armija na ŭkrainskaj miažy ŭkamplektavana samalotami i viertalotami, artyleryjaj, palavymi špitalami, srodkami suviazi i sistemami radyjoelektronnaj baraćby.
Hałoŭnakamandujučy Abjadnanymi ŭzbrojenymi siłami NATA ŭ Jeŭropie ličyć, što mety Rasii «zastajucca niajasnymi». Pavodle jaho słoŭ, rasijskija ŭzbrojenyja siły mohuć zastavacca na miažy, kab svajoj prysutnaściu zapałochvać Ukrainu, nakiravacca na poŭdzień dla ŭstanaŭleńnia suchaputnaha złučeńnia z Krymam, ździejśnić kidok u napramku Adesy i Prydniastroŭskaj Małdaŭskaj Respubliki pa Čarnamorskim uźbiarežžy ci ž uvarvacca va ŭschodnija vobłaści Ukrainy, dzie ruskaje nasielnictva vystupaje z patrabavańniem ŭźjadnańnia z Rasijaj. U lubym vypadku rasijskija vojski znachodziacca ŭ bajavoj hatoŭnaści i mohuć prystupić da vykanańnia pastaŭlenaj zadačy na praciahu 12 hadzin, padkreśliŭ Brydłaŭ.
ZŠA i šerah inšych krain Zachadu abvinavačvajuć Maskvu ŭ zasiarodžvańni vojskaŭ na miažy z Ukrainaj z metaj cisku na Kijeŭ i, mahčyma, uzbrojenaha ŭmiašańnia ŭ situacyju va Ukrainie. Ministry zamiežnych spraŭ dziaržaŭ-siabroŭ NATA zapatrabavali ad hałoŭnakamandujučaha prapanavać miery, jakija dazvolili b krainam aljansu, jakija miažujuć z Rasiejaj, pierakanacca ŭ padtrymcy sajuźnikaŭ.
Kamientary