9 maja maje stać apahiejem aktyvizacyi prarasijskich aktyvistaŭ u Ukrainie. Mienavita tady Maskva choča zavieršyć druhi etap apieracyi pa rasčlanieńni Ukrainy. Rasii treba paśpieć da prezidenckich vybaraŭ 25 maja, jakija daduć susiedniaj dziaržavie ŭsienarodna abranaha prezidenta z mocnym mandatam. Taki prahnoz na svajoj staroncy ŭ Facebook zrabiŭ kiraŭnik ukrainskaha Centra vajenna-palityčnych daśledavańniaŭ Dźmitryj Tymčuk.
«Pačynajecca novaja chvala aktyvizacyi sieparatysckich ruchaŭ. Ahulnaja meta — apafieoz sieparatysckaha šabašu da 9 maja. Ale heta pa ich scenary. Ciapierašniaja praca ŭkrainskich pravaachoŭnikaŭ i śpiecsłužbaŭ stavić pad vialiki sumnieŭ realizacyju hetych płanaŭ», — adznačyŭ jon.
Tymčuk paviedamiŭ, što Hałoŭnaje vyviedvalnaje kiraŭnictva RF adklikaje svaich supracoŭnikaŭ z Kryma, pierakidvaje ich na ŭschod Ukrainy.
«Kaardynacyjnym centram sieparatystaŭ u Rasii pryniata rašeńnie ŭzmacnić sietku kaardynataraŭ HRU Hienštaba Rasii, jakija dziejničajuć na ŭkrainskaj terytoryi. Z hetaj metaj z Kryma adklikany supracoŭniki rasijskaha HRU, pry niepasrednym udziele jakich byŭ realizavany scenar abviaščeńnia «niezaležnaści» i adłučeńnia Kryma ad Ukrainy», — napisaŭ Tymčuk.
Nahadajem, 8 krasavika Tymčuk adznačaŭ, što sieparatysty ŭ paŭdniova-ŭschodnich abłaściach Ukrainy atrymali zadańnie «arhanizoŭvać pravakacyi z achviarami» ŭ haradach rehijona, kab Rasieja mahła heta interpretavać jak « teror ukrainskaj ułady suprać narodu» i ŭvieści svaje vojski na ŭkrainskuju terytoryju.
Kamientary