U Śledčym kamitecie pa horadzie Miensku paviedamili, što sprava Andreja Bandarenki aktyŭna raśśledujecca, i sud nad im budzie adkrytym.
«Pryznačanaja kompleksnaja psycholaha-psychijatryčnaja i narkalahičnaja ekspertyza abvinavačanaha. Iduć dopyty śviedak. Viadziecca aktyŭnaja praca. Miarkuju, praces budzie adkrytym».
Pravaabaroncu Andreju Bandarenku pahražaje da 7 hadoŭ źniavoleńnia. Heta maksymalnaje pakarańnie pavodle 3-j častki 339 artykułu pra złosnaje chulihanstva.
Pavodle dadzienych Śledčaha kamitetu pa Miensku, sprava suproć Andreja Bandarenki składajecca ź niekalkich epizodaŭ. U tym liku, u spravie jość epizod, dzie Andrej Bandarenka nibyta ŭdaryŭ žančynu. Videa hetaha epizodu raspaŭsiudžanaje Śledčym kamitetam razam z paviedamleńniem pra źmiaščeńnie Andreja Bandarenki pad vartu. «U materyjałach spravy jość i inšyja videazapisy», — skazała Jula Hančarova, ale nie ŭdakładniła, čaho jany tyčacca.
Toje, jak sam Andrej Bandarenka kamentuje vystaŭlenaje jamu abvinavačańnie: pryznaje siabie vinavatym, pryznaje častkova ci całkam admaŭlaje svaju vinu — supracoŭnica SK abiacała vyśvietlić i paviedamić pra heta paźniej.
Na videazapisie, jaki raspaŭsiudžany Śledčym kamitetam, bačny padobny na Andreja Bandarenku čałaviek, jaki siadzić na łavie ŭ vestybiuli Kastryčnickaha RAUS. Tam ža znachodziacca dźvie žančyny siaredniaha vieku. Adna ź ich vielmi ščylna nabližajecca da padobnaha na Bandarenku čałavieka i zdymaje jaho na fota — dvojčy vidać uspyški. Raptam čałaviek, nie padymajučysia ź miesca, nahoj vybivaje fotaaparat z ruk žančyny. Vierahodna, pry hetym jon začaplaje i jaje tvar. Potym mužčyna šturchaje nahoj druhuju žančynu, jakaja schiliłasia, kab padniać z padłohi častki aparatu. Ci na videa sapraŭdy źniaty Andrej Bandarenka? Aktyvist «Platformy», były palitviazień Mikita Lichavid miarkuje, što heta jon:
Mikita Lichavid «Miarkuju, tak, heta jon. I tvar, i adzieńnie, kurtka jahonaja. Jak patłumačyć jahonyja dziejańni na hetym videa? Nia viedaju. Mnie 24 hady, jamu 42. Jak ja mahu patłumačyć dziejańni čałavieka, jaki nastolki za mianie starejšy».
Mikita Lichavid skazaŭ, što da aryštu Andreja Bandarenki jamu nieviadoma było pra incydent u Kastryčnickim rajadździele milicyi, jaki zdaryŭsia 27 sakavika. U «Platformie» taksama ničoha nia viedajuć pra žančyn, jakija źniatyja na videa razam z Andrejem Bandarenkam.
Ci moža być toje, što zdaryłasia z Andrejem Bandarenkam, źvianom u łancuhu pravakacyjaŭ suproć kiraŭnika «Platformy»? Supracoŭnica «Platformy» Alona Krasoŭskaja-Kaśpiarovič zhadvaje pra raniejšy incydent z udziełam Bandarenki, jaki adbyŭsia 5 lutaha:
Alona Krasoŭskaja-Kaśpiarovič «Ja była śviedkam hetaha. Padyšoŭ čałaviek, paprasiŭ zakuryć. Potym źniavažyŭ Andreja, schapiŭsia za adzieńnie. Uźnik incydent. My potym davali tłumačeńni adnosna hetaha zdareńnia, i dahetul nijakich vynikaŭ jaho nie było. Tamu my niejak zusim spakojna da jaho stavilisia. My paličyli, što heta było nievialikaj «padstavaj».
Uvosień minułaha hodu Andrej Bandarenka adbyŭ 10 sutak aryštu za arhanizacyju pikietu svajakami zahinułaha na Vaładarcy Ihara Pcičkina. Ci byŭ cisk na Bandarenku z taho času? Pavodle Alony Krasoŭskaj-Kaśpiarovič, apošnim časam Andrej Bandarenka nie kazaŭ pra toje, što jamu pahražali:
«Napeŭna, kožny čałaviek, jaki zajmajecca pracaj, źviazanaj z razdražnieńniem ułady, musić razumieć, što da jaho ŭvaha budzie bolš pilnaja. My razumieli, što mohuć być sproby nas ačarnić, spravakavać. Ale try hady adpracavali, i ničoha takoha nie było», — paviedamiła Alona Krasoŭskaja-Kaśpiarovič.
14 krasavika ŭ Andreja Bandarenki dzień narodzinaŭ. Siabry pieradali jamu praz advakata zakazanyja im pradukty, knihi, adpravili vinšavalnuju telehramu. Što da infarmacyi pra toje, jak jon stavicca da abvinavačańnia, źviestak pra heta niama. Mikita Lichavid patłumačyŭ, što hetaha nie paviedamlaje navat advakat, bo jana źviazanaja padpiskaj ab nierazhałošvańni materyjałaŭ spravy:
«U hetym sens padpiski. Bo ad faktu taho, pryznaje ci nie pryznaje svaju vinu, zaležyć chada śledztva. Maksymum, što advakat moža skazać, — što jon zdarovy i dobra siabie adčuvaje», — kaža Mikita Lichavid.
