Užo ŭ pieršy dzień sudovych słuchańniaŭ pa spravie byłoha namieśnika staršyni kancerna «Biełnaftachim» stała viadoma šmat padrabiaznaściaŭ taho, jak u Biełarusi funkcyjanuje naftavy biznes. «Ježiednievnik» pasprabavaŭ vyśvietlić, chto i jak zarablaje na biełaruskaj naftancy.
U paniadziełak 14 krasavika ŭ sudzie Maskoŭskaha rajona Minska pačalisia sudovyja słuchańni pa kryminalnaj spravie byłoha namieśnika staršyni kancerna «Biełnaftachim» Uładzimira Vołkava. Pieršapačatkova jaho abvinavačvali ŭ atrymańni 22 tysiač dalaraŭ u jakaści chabaru ad kampanii «Tera», jakaja zajmałasia prodažam naftapraduktaŭ, ale zatym karupcyjnaja historyja była krychu skarektavana.
Jak vyrašajecca naftavaje pytańnie
Kampanija «Tera» źjaviłasia na rynku naftapierapracoŭki niadaŭna. Jana zaniałasia prodažam naftapraduktaŭ, vyrablenych z syraviny rasijskich pastaŭščykoŭ. Dla hetaha, jak i mnohija inšyja kampanii, «Tera» vykarystoŭvała mahutnaści dvuch biełaruskich naftapierapracoŭčych zavodaŭ: AAT «Naftan» i AAT «Mazyrski NPZ». Adnak dla padpisańnia kantraktaŭ z zavodami pryvatnym davalnickim kampanijam patrabujecca dazvoł kancerna «Biełnaftachim». Hetaje praviła i stała pryčynaj karupcyi.
TAA «Tera» nie zmahło adrazu atrymać dazvoł ad kancerna dla pierapracoŭki mazuty na Mazyrskim NPZ. Kab vyrašyć prablemu, śpiecyjalist pa prodažach kampanii nakiravaŭsia ŭ kabiniet namieśnika staršyni kancerna Uładzimira Voŭkava, jaki padpisvaŭ takija dazvoły. U kabiniecie jon, raspavioŭšy ab svajoj prablemie, pakłaŭ na stoł časopis, u jakim znachodzałasia try tysiačy dalaraŭ.
Na nastupny dzień prablema była vyrašana — kancern dazvoliŭ zavodu padpisać kantrakt z TAA «Tera». Adnak, jak śćviardžaje dziaržabvinavačańnie, los kampanii pa-raniejšamu znachodziŭsia ŭ rukach namieśnik staršyni «Biełnaftachima». Bo kožnaja pastaŭka naftapraduktaŭ na ekspart pavinna supravadžacca dazvołam kancerna.
Tamu vizity śpiecyjalista pa prodažach u kabiniet Voŭkava paŭtaralisia praktyčna kožny miesiac ź lutaha pa kastryčnik 2013 hoda. Na dopycie pry zatrymańni jon śćviardžaŭ, što kožny raz nasiŭ jamu pa try tysiačy dalaraŭ, uzbahaciŭšy čynoŭnika na 19 tysiač dalaraŭ. Hrošy na chabary jamu vydzialaŭ zasnavalnik kampanii Jaŭhien Danišeŭski.
Praŭda, jašče padčas rasśledavańnia śviedka źmianiŭ svaje pakazańni.
Novyja pakazańni śviedki
Na sudzie śviedka skazaŭ, što pry zatrymańni daŭ niedakładnyja pakazańni — z-za chvalavańnia i drennaha samaadčuvańnia.
Supracoŭniki HUBEZ, jakija zatrymali chabaradavalnika, nibyta skazali, što Vołkaŭ ŭžo va ŭsim pryznaŭsia, a taksama ŭ ich jość pakazańni jašče piaci śviedak. Paśla čaho paraili zatrymanamu napisać zajavu, u jakoj jon prosić pryciahnuć Voŭkava da kryminalnaj adkaznaści za vymahalnictva chabaraŭ. Što i było zroblena chabaradavalnikam. Na nastupnym dopycie supracoŭnik TAA «Tera» ŭkazaŭ sumu chabaru ŭ 19 tysiač dalaraŭ i ŭdakładniŭ, što davaŭ chabar z adabreńnia kiraŭnika kampanii. Ale potym chabaradavalnik źmianiŭ svaje pakazańni i admoviŭsia ad svaich słoŭ.
Spačatku jon napisaŭ zajavu, u jakoj havaryłasia, što kiraŭnik «Tery» Jaŭhien Danišeŭski ničoha nie viedaŭ pra zaniesienych Vołkavym hrošach. Maŭlaŭ, dalary jon braŭ z ŭłasnaj premii i addavaŭ ich u kancern pa svajoj inicyjatyvie.
Na pytańnie dziaržabvinavaŭcy, chto skłaŭ tekst hetaj zajavy, śviedka skazaŭ, što nie pamiataje, mahčyma, Danišeŭski abo jaho advakat.
Praź niekalki dzion paśla padačy zajavy chabaradavalnik źviarnuŭsia da śledčaha z asprečańniem jašče niekatorych pakazańniaŭ. Ciapier jon śćviardžaŭ, što Voŭkaŭ nie vymahaŭ u jaho hrošy. Jany ź im nikoli navat nie abmiarkoŭvali temu hrošaj, nijakija prośby ab rašeńni niejkaha pytańnia ŭsłych nie ahučvalisia, a sam namieśnik staršyni nie praviaraŭ, što znachodzicca ŭ padniesienych časopisach.
Pa-druhoje, suma ŭznaharodžańnia, pa śćvierdžańni śviedki, nasamreč značna mienšaja — jon davaŭ u asnoŭnym pa adnoj tysiačy, tolki niekalki razoŭ — dźvie i try. Pierabraŭšy padčas tłumačeńniaŭ u sudzie niekalkich varyjantaŭ, śviedka spyniŭsia na ličbie 10500 dalaraŭ.
Pry hetym śviedka ŭ sudzie pačaŭ nastojvać na tym, što nie razhladaŭ dadzienyja ŭznaharodžańni Voŭkavu jak chabar. Dapamoha ŭ vyrašeńni dziełavoha pytańnia jamu była patrebna tolki adnojčy — pry atrymańni dazvołu na pierapracoŭku mazuty. Z nahody dazvołaŭ na ekspart, jon śćviardžaŭ, što pryniesienyja im hrošy nijak nie ŭpłyvali na rašeńnie hetych pytańniaŭ. A ŭznaharodžańni pieradavalisia Voŭkavu prosta tak — «u znak padziaki i dla padtrymańnia dziełavych suviaziej».
Losavyznačalnyja pakazańni
Jak užo paviedamlałasia, kali novyja pakazańni śviedki buduć pakładzieny ŭ asnovu prysudu, to heta kardynalna paŭpłyvaje los jaho fihurantaŭ: Voŭkavu pahražaje kudy mienšy termin, a zasnavalnik TAA «Tera» Jaŭhien Danišeŭski akažacca i zusim niedatyčnym da spravy. Słuchańni spravy praciahnucca siońnia, 15 krasavika.
Kamientary