Łukašenka: Uvaha da zachavańnia abjektaŭ kulturnaj spadčyny sadziejničaje ŭmacavańniu dziaržaŭnaści
Uvaha da zachavańnia abjektaŭ kulturnaj spadčyny sadziejničaje ŭmacavańniu dziaržaŭnaści. Taki punkt hledžańnia vykazaŭ Alaksandr Łukašenka siońnia na sustrečy z hienieralnym dyrektaram JUNIESKA Irynaj Bokavaj.
Kiraŭnik dziaržavy źviarnuŭ uvahu na važnaść zachavańnia abjektaŭ kulturnaj spadčyny. «Dla nas vielmi važna znajści ŭ našym minułym toje, što źviazvaje nas z sučasnym. My nie chacieli b zabyvać, adkul my rodam, tamu vialikuju ŭvahu ŭdzialajem hetym abjektam. Tym bolš što jany sadziejničajuć umacavańniu našaj dziaržaŭnaści i lišni raz dakazvajuć, što Biełaruś — staražytnyja ziamla, roznyja dziaržavy tut byli, pa-roznamu składaŭsia los.
Ale siońnia jość Biełaruś — samastojnaja niezaležnaja dziaržava, jakaja karaniami idzie ŭ minułaje», — skazaŭ jon.
Łukašenka padkreśliŭ, što toje, čym zajmajecca JUNIESKA, vielmi simvalična i važna. Jon źviarnuŭ uvahu, što adna sa statutnych met arhanizacyi — supracoŭnictva dziaržavy ŭ metach biaśpieki praz navuku, adukacyju i kulturu. «Nam pryjemna, što JUNIESKA zajmajecca mienavita takoj prablematykaj», — padkreśliŭ kiraŭnik dziaržavy.
Jon adznačyŭ, što Biełarusi jość što skazać u suviazi z 60-hodździem členstva ŭ JUNIESKA, asabliva ŭ śfierach adukacyi i navuki. Alaksandr Łukašenka raskazaŭ, što 5 pracentaŭ VUP krainy tracicca na adukacyju. Nie tak daŭno adbyłasia jaho sustreča z vučonymi, dzie razmova išła ab pryjarytetach biełaruskaj navuki na dalokuju i na siarednieterminovuju pierśpiektyvy.
Što datyčycca kultury, to, pavodle słoŭ Alaksandra Łukašenki, Iryna Bokava sama zmoža ŭbačyć znakavyja abjekty ŭ Biełarusi, u tym liku ŭniesienyja ŭ Śpis Suśvietnaj spadčyny JUNIESKA.
Łukašenka padziakavaŭ hienieralnamu dyrektaru JUNIESKA za vizit, adznačyŭšy, što kiraŭniki arhanizacyi naviedvali Biełaruś. «Było b niespraviadliva, kali b vy nie pryjechali da nas, budučy hienieralnym dyrektaram, — adznačyŭ jon. — Vy zaŭsiody možacie na nas raźličvać u arhanizacyi — my zaŭsiody budziem padtrymlivać vašy inicyjatyvy. Tym bolš što jany vielmi patrebnyja i vyhadnyja nie tolki nam, ale i ŭsiamu čałaviectvu».
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym5
Kamientary