Alaksandr Łukašenka 21 krasavika ŭnios na razhlad u Pałatu pradstaŭnikoŭ Nacyjanalnaha schodu prajekt zakona «Ab amnistyi ŭ suviazi z 70-hodździem vyzvaleńnia Biełarusi ad niamiecka-fašysckich zachopnikaŭ», paviedamlaje pres-słužba kiraŭnika dziaržavy.
Pavodle papiarednich raźlikaŭ MUS, pry realizacyi zakona miarkujecca poŭnaściu vyzvalić ad pakarańnia prykładna 2.730 čałaviek, u dačynieńni da prykładna 5.500 čałaviek budzie skaročany termin pakarańnia na hod.
Dakumient padrychtavany ź inicyjatyvy Łukašenki. Metaj raspracoŭki zakonaprajekta «źjaŭlajecca zabieśpiačeńnie sacyjalnaj spraviadlivaści pry vykanańni kryminalnych sankcyj šlacham prymianieńnia da asudžanych, jakija dakazali svajo vypraŭleńnie, amnistyi jak vyšejšaha prajaŭleńnia humanizmu z boku dziaržavy», paviedamlaje pres-słužba.
Zaznačajecca, što z ulikam papiaredniaha vopytu praviadzieńnia amnistyj u Biełarusi prajektam zakona praduhledžana vyzvaleńnie ad kryminalnaj adkaznaści i pakarańnia katehoryj asob, jakija ŭ najbolšaj stupieni zasłuhoŭvajuć pabłažki. Heta, u pryvatnaści, niepaŭnaletnija, ciažarnyja žančyny, asoby piensijnaha ŭzrostu, invalidy, vieterany bajavych dziejańniaŭ, hramadzianie, jakija paciarpieli ad katastrofy na Čarnobylskaj AES. Amnistyi buduć padlahać tyja sa zhadanych asob, što ŭčynili złačynstvy, jakija nie adnosiacca da katehoryi ciažkich i asabliva ciažkich.
Asobnyja katehoryi asudžanych, jakija nie padlahajuć vyzvaleńniu ad adbyvańnia pakarańnia poŭnaściu, zhodna z prajektam zakona vyzvalajucca ad pakarańnia častkova terminam na adzin hod.
Amnistyja nie budzie raspaŭsiudžvacca na asob, jakija ŭčynili najbolš ciažkija złačynnyja dziejańni, takija jak naŭmysnaje zabojstva, zhvałtavańnie, handal ludźmi, stvareńnie złačynnaj arhanizacyi, bandytyzm, teraryzm, a taksama jakija nie vykanali praduhledžanyja prajektam zakona ŭmovy dla vyzvaleńnia ad kryminalnaj adkaznaści i pakarańnia.
Z 1991 hoda ŭ Biełarusi było pryniata 12 zakonaŭ ab amnistyi. Kampanii byli prymierkavanyja, u pryvatnaści, da 50-hodździa, 60-hodździa, 65-hodździa Pieramohi ŭ Vialikaj Ajčynnaj vajnie, a taksama da 65-hodździa vyzvaleńnia Biełarusi ad niamiecka-fašysckich zachopnikaŭ. Apošniaja amnistyja pravodziłasia ŭ lipieni—studzieni 2012 hoda. Pad jaje trapili 18.737 asudžanych.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym1
Kamientary