Skryvaŭlenyja mužčyny paśla katavańniaŭ raskazvali rasijskim žurnalistam pra toje, jak ich zachapili ŭ pałon.
Troch skryvaŭlenych mužčyn biez štanoŭ prymusili adkazvać na pytańni rasijskich ŚMI, paviedamlaje TSN.ua.
U Kramatorsk ekstremisty ŭziali ŭ pałon troch aficeraŭ śpiecnaza «Alfa» SBU. Pra heta paviedamlaje šerah rasijskich ŚMI. Akramia taho, u internecie źjavilisia fota i videa zachoplenych bajevikami ŭkrainskich aficeraŭ, jakija jany pryznajucca ŭ tym, što pryjechali ŭ horad u ramkach śpiecapieracyi.
Jak paviedamlajuć rasijskija ŚMI, danbaskija sieparatysty zachapili aficeraŭ SBU ŭ Kramatorsku, pa darozie ŭ Horłaŭka. Paśla čaho ich pieravieźli ŭ Słaviansk.
Na videa, jakoje źjaviłasia na sajcie «Komsomolskoj pravdy», troje skryvaŭlenych mužčyn biez štanoŭ, ź pieramatanymi skotčam vačyma, adkazvajuć na pytańni rasijskich žurnalistaŭ i raskazvać ab tym, jak patrapili ŭ pałon da bajavikoŭ. Usio heta adbyvajecca, kali vieryć vydańniu, u zachoplenym terarystami budynku SBU ŭ Słaviansku.
Sami terarysty pry hetym demanstrujuć žurnalistam paśviedčańni i žetony troch ukrainskich aficeraŭ na imiony majora Siarhieja Paciomskaha, kapitana Jaŭhiena Viarynskaha i padpałkoŭnika Raścisłava Kijaška. Akramia taho, žurnalistam pakazvajuć zbroju, jakaja nibyta była ŭ zachoplenych supracoŭnikaŭ SBU.
Pa słovach adnaho z skryvaŭlenych mužčyn, ich hrupa składałasia ź siami čałaviek. U Kramatorsk ich pierakinuli viertalotam z horada Izium Charkaŭskaj vobłaści. Zadačaj hrupy byccam było vykradańnie adnaho ź sieparatystaŭ Ihara Bieźlera, jaki ŭžo kala dziesiaci dzion kiruje utrymańniem budynka UMUS u Horłaŭcy.
Lidar sieparatystaŭ Słavianska Ihar Stralcoŭ abviaściŭ ich vajennapałonnymi.
«My prapanujem Kijevu pamianiać ich na našych paplečnikaŭ, zatrymanych ŭładami», - zajaviŭ Stralcoŭ.
Paźniej u SBU paćvierdzili źniknieńnie niekalki ich supracoŭnikaŭ, praŭda, nie nazyvajučy proźviščy.
