Padčas paŭtornaha naboru abituryjentaŭ u VNU nižnija parohavyja značeńni CT buduć źnižany
Padčas dadatkovaha naboru abituryjentaŭ, jaki z 2014 hoda budzie pravodzicca ŭ VNU pry najaŭnaści vakantnych miescaŭ paśla pieršaha zaličeńnia, nižnija parohavyja značeńni centralizavanaha testavańnia, nieabchodnyja dla padačy dakumientaŭ u VNU, buduć źnižany na 5 bałaŭ. Ab hetym paviedamiŭ ministr adukacyi Siarhiej Maskievič na pres-kanfierencyi 2 maja.
Pavodle jaho słoŭ, takaja miera praduhledžana dla stvareńnia konkursu padčas dadatkovaha adboru abituryjentaŭ. «Byvajuć vypadki, i takich šmat, kali pa adnym pradmiecie abituryjent atrymaŭ bał nižejšy za toj, jaki dazvalaje jamu ŭdzielničać u konkursie — naprykład, nie 10, a 9 (pa ruskaj abo biełaruskaj movie), a pa inšych pradmietach — profilnych — atrymaŭ vielmi vysokija bały. Jon nie moža ŭdzielničać u konkursie, chacia suma bałaŭ u jaho była b vielmi vysokaja i dazvalała b nie tolki ŭdzielničać u konkursie, ale i pastupić na prestyžnyja śpiecyjalnaści», — skazaŭ Maskievič.
Jon padkreśliŭ, što rašeńnie ab źnižeńni nižnich parohavych značeńniaŭ CT pry praviadzieńni dadatkovaha naboru ŭ VNU «poŭnaściu adpaviadaje novym praviłam pryjomu ŭ VNU».
Nahadajem, dla padačy dakumientaŭ u pryjomnuju kamisiju nieabchodna nabrać nie mienš čym 10 bałaŭ pa ruskaj abo biełaruskaj movie, 15 — pa matematycy, fizicy, chimii, bijałohii, 20 — historyi Biełarusi, suśvietnaj historyi najnoŭšaha času, hramadaznaŭstvie, hieahrafii i zamiežnych movach.
Sioleta centralizavanaje testavańnie budzie pravodzicca ŭ 58 ustanovach adukacyi z 14 pa 28 červienia. U paraŭnańni ź minułym hodam kolkaść punktaŭ praviadzieńnia CT źniziłasia na 15, što, jak patłumačyŭ Maskievič, źviazana z pamianšeńniem kolkaści abituryjentaŭ.
Rehistracyja na CT pravodzicca z 2 maja pa 1 červienia. Ź pieralikam ustanoŭ adukacyi, jakija zabiaśpiečvajuć rehistracyju abituryjentaŭ dla ŭdziełu ŭ CT, možna aznajomicca na sajcie Ministerstva adukacyi.
Reziervovym dniom dla praviadzieńnia CT vyznačana 5 lipienia, samo testavańnie ŭ reziervovy dzień budzie pravodzicca ŭ Biełaruskim dziaržaŭnym univiersitecie. Rehistracyja abituryjentaŭ dla ŭdziełu ŭ CT u reziervovy dzień budzie prachodzić z 27 červienia pa 1 lipienia.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym1
Kamientary