U Kalininhradzie sud źmiaściŭ pad vartu na dva miesiacy traich hramadzian Rasii, jakich padazrajuć u tym, što jany ŭźniali ściah FRH nad budynkam abłasnoha ŭpraŭleńnia Fiederalnaj słužby biaśpieki.
Ściah FRH byŭ ŭźniaty ŭ noč z 12 na 13 sakavika, a padazravanych — Aleha Savina, Michaiła Fieldmana i Dźmitryja Fanarova — zatrymali ŭ chutkim časie, paviedamlaje internet-vydańnie «Russkaja płanieta». Spačatku suprać ich była administracyjnaja sprava, i ich adpuścili, ale 24 krasavika spravu pierakvalifikavali ŭ kryminalnuju, i ciapier im pahražaje vialiki štraf albo da siami hadoŭ pazbaŭleńnia voli.
«Na budynku FSB raźmiaścili ściah FRH jak simvał nieabchodnaści vychadu Kalininhradskaj vobłaści sa składu RF i dałučeńnia da ES, čym hruba parušyli hramadski paradak», — havaryłasia ŭ pastanovie ab uzbudžeńni kryminalnaj spravy.
28 krasavika sud na čas śledstva nakiravaŭ padazravanych u śledčy izalatar na dva miesiacy.
Pavodle vydańnia «Russkaja płanieta», spačatku zatrymanyja kazali, što vyviesili niamiecki ściah u adkaz na anieksiju Kryma, ale ciapier jany ŭvohule admaŭlajuć svaju datyčnaść da vyviešvańnia ściaha.
Da 4 lipienia 1946 hodu Kalininhrad byŭ niamieckim horadam Kionihśbierham. U 1946 hodzie pavodle rašeńnia Patsdamskaj kanfierencyi horad i navakolle byli časova pieradadzienyja SSSR. Paźniej, pry padpisańni damovaŭ ab miežach, Kalininhradskaja vobłaść była całkam pryznanaja terytoryjaj Savieckaha Sajuzu.
Kamientary