Daniecki žurnalist: Danbas zdali

U Daniecku nieviadomyja złačyncy abstralali dom hałoŭnaha redaktara onłajn-vydańnia «Ostrov» Siarhieja Harmaša.

Stralbu pa voknach Harmaša, jaki taksama kaardynuje dziejnaść Kamitetu patryjatyčnych sił Danbasu (KPSD), adkryli ŭ paniadziełak uviečary. U hety čas u haściach u hałoŭnaha redaktara partała byŭ narodny deputat ad partyi «UDAR» i siabra KPSD Jahor Firsaŭ, jaki taksama moh być cellu napadnikaŭ.

Nieviadomyja schavalisia paśla taho, jak z domu Harmaša pa ich pačali stralać u adkaz. Nichto nie paciarpieŭ.

Ciapier Harmaš i Firsaŭ u Kijevie.

Siarhiej Harmaš raspavioŭ Radyjo Svaboda pra svaje ŭražańni ad taho, što ciapier adbyvajecca ŭ Danieckaj vobłaści.

— Jak tolki ŭ Danbasie pačali vykradać ludziej, stała zrazumieła, što heta pieratvorycca ŭ tendencyju. Separatysty albo rychtujuć žyvy ščyt, albo vykradajuć ludziej dla dalejšaha abmienu ich na niejkija ŭmovy dla siabie.

Zrazumieła, što my, kiraŭniki Kamitetu patryjatyčnych sił Danbasu, pierajšli na paŭlehalny, paŭkanservatyŭny režym, staralisia trymacca ŭ cieni, tym bolš što ŭ narodnaha deputata Jahora Firsava jość zarehistravanaja zbroja. Učora ŭ ofis partyi «UDAR», miascovuju filiju jakoj Jahor Firsaŭ uznačalvaje, prychodzili ŭzbrojenyja ludzi — čatyry aŭtamatčyki ŭ bałakłavach. Na ščaście, u ofisie nikoha nie było, tamu jany zmahli tolki razhramić ofis. A ŭčora ŭviečary, kala 23 hadziny, my siadzieli ź Jahoram Firsavym u maim domie i viačerali. Raptam pačałasia stralba pa šybie. My nia bačyli, kolki tam było ludziej, ale było 4–5 strełaŭ. Vielmi hučnyja, što śviedčyć pra toje, što stralali z aŭtamatyčnaj zbroi, chutčej za ŭsio z aŭtamata Kałašnikava. My pahasili śviatło, zaryjentavalisia i pačali stralać u adkaz sa zbroi Firsava. My heta zrabili ŭ pieršuju čarhu dla taho, kab pakazać, što ŭ nas taksama jość zbroja. Vidać, napadniki nie čakali, što ŭ nas jana jość, tamu što davoli chutka źnikli. My pačakali niejki čas, sieli ŭ mašyny i źjechali. Ciapier my ŭžo ŭ Kijevie.

— Vy ŭznačalvajecie niezaležny sajt «Ostrov». Jak vam pracujecca va ŭmovach akupacyi terarystami?

— Žurnalistam vielmi niebiaśpiečna ciapier pracavać. Ich usich viedajuć u tvar. Uzbrojenyja ludzi chodziać pa redakcyjach, adkryta pahražajuć. Na mierapryjemstvy, jakija ładzić «Danieckaja narodnaja respublika», niezaležnyja žurnalisty ŭžo nia chodziać. Bo tam naŭprost pahražajuć fizyčnaj raspravaj. Takim čynam, praca niezaležnaha žurnalista i žurnalista ŭkrainskich ŚMI ciapier niebiaśpiečnaja na ŭzroŭni pahrozy žyćciu čałavieka.

— Jak vy ličycie, ci jość šaniec viarnuć Danbas?

— Sytuacyja stanovicca ŭsio bolš i bolš bieskantrolnaj. Milicyi niama. Uzbrojenyja ludzi zajmajucca adkrytym bandytyzmam.

Naprykład, zachodziać u aŭtamabilnyja salony i nachabna zhaniajuć adtul mašyny. Adkryta rabujuć banki. Šantažujuć biznes, patrabujučy hrošy. Vykradajuć ludziej. Raniej na vulicach vykradali, ciapier stali prychodzić u chaty da ludziej. Idzie teror.

Ci zmožam my adbić Danbas, budzie zaležać ad pazycyi miascovaj elity. Ciapier jana zdaje Danbas u adkrytuju. Dziela čaho? Albo dziela taho, kab tarhavacca z Kijevam, a taksama z Bruselem i Vašynhtonam.

Albo dziela taho, kab nie puścić siudy Pucina, tamu što kali «Danieckaja narodnaja respublika» pieramoža, to, zdajecca, užo i niama sensu siudy Pucinu iści, i tady faktyčna rehijon zastaniecca ŭ składzie Ŭkrainy. Ciažka skazać, što tam adbyvajecca ŭ vyšejšych kołach, ale ciapier u mianie ŭražańnie, što Danbas zdali.

— Što dumajuć pra hety bandytyzm žychary Danbasu, jakija chočuć dałučeńnia da Rasiei?

— Ludzi vidavočna stamilisia ad bandytyzmu, chočuć paradku. Navat tyja, chto byŭ za Rasieju na pačatku kanfliktu, ciapier pabačyli, što heta nie Rasieja, a prosta terarysty i ŭzbrojenyja bandyty. Tamu chočuć stabilnaści.

• 0
• 0
• 0
• 0
• 0
• 0
• 0
• 0