Chanter Bajden — małodšy syn vice-prezidenta ZŠA Džo Bajdena — staŭ členam praŭleńnia naftahazavaha chołdynhu Burisma, jaki zajmajecca zdabyčaj vuhlevadarodaŭ va Ukrainie.
Ab hetym paviedamlajecca na sajcie kampanii.
Bajden-małodšy vykazaŭ nadzieju, što jaho viedy pasłužać na karyść naroda Ukrainy.
Chanter budzie zajmacca prasoŭvańniem kampanii ŭ mižnarodnych arhanizacyjach.
Jaho asnoŭnym miescam pracy zastaniecca jurydyčnaja firma Schiller & Flexner LLP, jakaja znachodzicca ŭ Ńju-Jorku.
Akramia taho, Bajden-małodšy zajmaje pasadu staršyni Kaalicyi ZŠA pa pytańniach hłabalnaha lidarstva, Centra palityki biaśpieki i nacyjanalnaha demakratyčnaha instytuta.
Raniej jon pracavaŭ staršym vice-prezidentam banka MBNA, a ŭ 2006 hodzie ŭvajšoŭ u radu dyrektaraŭ amierykanskaj čyhunačnaj kampanii AMTRAK. Bajden uvachodzić u kalehiju advakataŭ štata Kaniektykut i fiederalnaj akruhi Kałumbija, a taksama Viarchoŭnaha suda ZŠA i Suda pa fiederalnych pazovach (US Court of Federal Claims). Adnačasova jon uznačalvaje amierykanskaje padraździaleńnie Suśvietnaj charčovaj prahramy.
Chołdynh Burisma ŭklučaje ŭ siabie niekalki ŭkrainskich naftahazazdabyŭnych kampanij, siarod jakich «Eska-Piŭnič» i «Pary».
Kampanija była zarehistravanaja na Kipry ŭ 2002 hodzie, a jaje asnoŭnym ułaśnikam źjaŭlajecca były ministr ekałohii Ukrainy, namieśnik sakratara Rady nacyjanalnaj biaśpieki i abarony Ukrainy za časami Janukoviča Mikałaj Złačeŭski.
Ciapier kampanija zajmajecca raspracoŭkaj radoviščaŭ u Dniaproŭska-Danieckim, Karpackim i Azova-Kubanskim basiejnach.
Kamientary