Jak paviedamlajecca ŭ aficyjnym pres-relizie akademii (terytaryjalnaha adukacyjnaha departamienta) Nanta, u piatnicu 16 maja chłopčykam-navučencam i mužčynam-vykładčykam 27 licejaŭ nastojliva rekamiendujecca pryjści na zaniatki ŭ spadnicach.
Tłumačycca, što akcyja pad nazvaj «Što pad spadnicaj» (Ce que soulève la jupe) nakiravana na baraćbu z dyskryminacyjaj žančyn i zaklikanaja palepšyć adnosiny pamiž mužčynam i žančynaj i adradzić dyskusiju pra raŭnapraŭje.
Akcyja projdzie ŭ šerahu licejaŭ haradoŭ akruhi, siarod jakich Nant, Šatabryjan, Le Man, Anže, Łaval. Jak adznačajecca ŭ pres-relizie, tym navučencam i supracoŭnikam navučalnych ustanoŭ mužčynskaha połu, jakija nie zachočuć prychodzić u takim vyhladzie, rekamiendujecca 16 maja nasić stykier «Ja zmahajusia suprać seksizmu, a ty?»
Pa dadzienych The Local, prapanova akademii Nanta, sankcyjanavanaja ministerstvam adukacyi Francyi, sioleta vyklikała abureńnie siarod miascovych žycharoŭ i francuzskich palitykaŭ. Tak, staršyni kansiervatyŭnaj partyi UNI Aliŭje Vijal nazvaŭ akcyju «biazhłuździcaj, jakaja, zamiest taho kab dapamahčy žančynam vykazać svaju žanockaść, nakiravana na admaŭleńnie i žanočaj i mužčynskaj identyfikacyi».
Viadomaja francuzskaja hramadskaja aktyvistka i praciŭnicaj adnapołych šlubaŭ Fryžyd Baržo spytała ŭ svaim Twitter ministra adukacyi Francyi, ci nie źbirajecca jon zaklikać zaadno dziaŭčynak u hety dzień pryjści ŭ škołu z baradoj. Hetym jana namiaknuła na pieramožcu Jeŭrabačańnia, aŭstryjca Tomasa Nojvirta, bolš viadomaha jak Kančyta Vurst.
Francuzskija ŚMI adznačajuć, što praviadzieńnie akcyi supała z płanami minadukacyi Francyi ŭvieści ŭ navučalnych ustanovach ŭroki hiendarnaj teoryi, źmieściva jakich mnohim baćkam zdałosia nieprystojnym. Pa dadzienych The Local, 16 maja ŭ Nancie płanujecca praviadzieńnie akcyj pratestu suprać «dnia spadnicy» u miascovych licejach.
U toj ža čas, piša hazieta, u minułym hodzie anałahičnaje mierapryjemstva krytyki nie vyklikała i prajšło paśpiachova.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym1
Kamientary