U Minsku ludzi nie dali amonaŭcam zatrymać chłopca za biełaruskuju movu

Žychary Minska i zaŭziatary Čempijanatu śvietu pa chakieju siońnia nočču nie dali zatrymać aktyvista Ruchu «Za Svabodu» Mikitu Siemianienku.

«Nočču na fan-zonie na Niamizie (u centry Minska) adbyłosia niekalki bojek pamiž rasijskimi zaŭziatarami i biełarusami. Paśla hetaha tudy prybyli prykładna 15 čałaviek AMAPu, udzielniki bojki da hetaha času paśpieli raźbiehčysia chto kudy. I milicyjanty pačali hladzieć na ludziej, jakija stajali pobač», - raspavioŭ sajtu Pyx.by Mikita Siemianienka.

Pa jahonych słovach, jon i jašče niekalki čałaviek uvieś hety čas stajali i razmaŭlali z chłapcami z Dokšycaŭ pra biełaruskuju movu. «Milicyjanty praviali pravierku dakumientaŭ va ŭsich nas. Potym uziali maje, pierapisali ŭsie dadzienyja. Potym kažuć, chadziem z nami», — dadaŭ aktyvist.

Kali jon zapytaŭsia, za što jaho zatrymlivajuć, to atrymaŭ roznyja adkazy. «Pieršy amapaviec kaža, my ciabie nie zatrymlivajem. Druhi, što zatrymlivajem pa artykule 17.1 KoAP (drobnaje chulihanstva) za toje, što ty maciukaŭsia. A treci – pojdziem, parazmaŭlajem», —

raspavioŭ Siemianienka.

Ale ludzi, pa jahonych słovach, skazali: «Nie taho zatrymlivajecie». I chacia im pryhrazili, što, kali jany nie supakojacca, to taksama pajeduć ź milicyjaj, ale padyšło jašče bolš narodu. «Jašče adzin chłapiec patłumačyŭ, što ja nie mieŭ adnosinaŭ da bojki», — dadaŭ moładzievy aktyvist. 

Pa jahonych padlikach,

padyšli jaho abaraniać bolš za dziesiać čałaviek, absalutna da hetaha času jamu nieznajomych. A sami «razborki» ciahnulisia blizu hadziny, za jakija milicyjaniery praviarali dakumienty i łajalisia…

«Padčas sproby zatrymańnia, amapaŭcy šmatrazova kazali: «Ch*li ty vy**vaješsia, hovori normalno». Kali ja moviŭ, što amapaŭcy, jak pradstaŭniki ŭłady, musiać adkazvać mnie na movie zvarotu, jany zajavili: «Zabirajem jeho, na *uj»», — dadaŭ aktyvist Ruchu «Za Svabodu».

Potym supracoŭniki milicyi viarnuli jamu dakumienty i skazali, kab na hetaj fan-zonie jaho bolš nie bačyli.

«Dziakuju, što šlacham cisku biełaruskich hramadzianaŭ, što časam lubiać pabałakać pa- biełarusku, atrymałasia viarnuć maje dakumienty j vyzvalić z-pad varty», - zaklučyŭ Mikita Siemianienka.

Aktyvist Ruchu «Za Svabodu» Mikita Siemianienka braŭ udzieł u kampanii pa vybarach deputataŭ miascovych savietaŭ. Paśla hetaha jon byŭ adličany z fakultetu žurnalistyki Biełaruskaha dziaržaŭnaha ŭniviersitetu. Jon padkreśliŭ, što jaho adličyli za hramadskuju aktyŭnaść.

• 0
• 0
• 0
• 0
• 0
• 0
• 0
• 0