Na Homielščynie 150-hadovuju carkvu ratujuć ad razbureńnia

U 2015 hodzie carkvie ŭ vioscy Čaracianka, što pad Homielem, spaŭniajecca 150 hadoŭ. Za hety čas chram pieražyŭ usie navalnicy i viry historyi, ale ciapier ryzykuje nie dačakacca svajho jubileju: praciakaje dach, mur u raskolinach, pavyvalvalisia vokny… Tałkovaha ramontu nie było ŭžo bolej za paŭstahodździa, asnoŭnaja pryčyna, jak zaŭsiody, prazaičnaja – niama hrošaj.

U vioscy žyvie blizu 600 žycharoŭ, paśpiachova pracuje miascovaje pradpryjemstva, ale dać rady prablemie nichto nie sprabuje. Ubaku zastajucca i ŭłady. Hramadski aktyvist z Homiela Kastuś Žukoŭski aburajecca: «Uładu nie cikavić carkva, jakaja pa svajoj architektury nie maje roŭnych va ŭsim Homielskim rajonie! Heta amal adziny pomnik architektury 19 stahodździa, jaki zastaŭsia niekranuty i nie pierabudoŭvaŭsia całkam u savieckija časy pad kaniušniu ci humno. Va ŭłady «niama hrošaj». Tamu carkva pavinna zhinuć, jak sotni cerkvaŭ pa ŭsioj Homielščynie?»

Ale ŭsio ž znajšlisia ludzi, jakija chočuć uratavać chram ad zaniadbańnia i razbureńnia. Heta niešmatlikija vierniki z tamtejšym śviatarom, vierniki i hramadskija aktyvisty, pradstaŭniki roznych inicyjatyŭ i arhanizacyj z Homiela («Chopić pić – treba žyć!», «Tałaka» i inš.). U płanach hetych nieabyjakavych biełarusaŭ praviadzieńnie infarmacyjna-kulturnickaha letnika ŭ Čaraciancy, kab nahadać žycharam pra harotny stan carkvy, infarmacyjnaja kampanija, nakiravanaja na zbor srodkaŭ praź ŚMI i zvaroty da pradstaŭnikoŭ bujnych pradpryjemstvaŭ i pryvatnaha biźniesu Homielščyny.

Pa słovach Kastusia Žukoŭskaha, «kali kožny žychar sielsavieta, jaki ŭžyvaje ałkahol, zamiest nabyćcia butelki harełki (50 tysiač) hrošy pieraličyć na rachunak carkvy, to prablema z ramontam budzie vyrašanaja».

Bližejšaje vałanciorskaje mierapryjemstva maje nazvu «Tałaka-vandroŭka pa Homielščynie» i adbudziecca 24 traŭnia.

U papiaredniaj prahramie vandroŭki:

- Vandroŭka ŭ vioski Čaracianka, Prakopaŭka, Markavičy, Hadzičava;
- Pryborka i ŭparadkavańnie terytoryi vakoł carkvy ŭ vioscy Čaracianka;
- Etnahrafičny kvest «ČARY ČARAcianki» na terytoryi v.Čaracianka;
- Naviedvańnie reštak staroha parku i šlachieckaj siadziby ŭ v. Prakopaŭka i carkvy ŭ v. Hadzičava;
- Pasiadziełki z muzykami kala vohnišča.

Arhanizatary rajać udzielnikam mieć z saboj kubak, videlec, pracoŭnuju vopratku i dobry nastroj. Dałučycca da mierapryjemstva, a taksama zrabić svoj čynny ŭniosak u spravu vyratavańnia carkvy, moža kožny achvočy!

Padrabiaznaści pra vandroŭku 24 traŭnia – tut  i pa telefonie: +37529 329 61 69 (Kastuś)

Rekvizity dla achviaravańniaŭ na ramont chrama:

Prychod Uśpieńnia Praśviatoj Baharodzicy Homielskaj jeparchii Biełaruskaj pravasłaŭnaj Carkvy 247017 Homielskaja vobłaść, Homielski rajon, v.Čaracianka, vuł. Pieramohi, 2

r/r 3015038175494 u CBU № 305 filijała № 302 AAT «ASB Biełarusbank», MFO 151501664 h. Homiel, vuł. Barykina, 94 UNP 400226754

• 0
• 0
• 0
• 0
• 0
• 0
• 0
• 0