Štrych da jaho bijahrafii
Z Hienadziem Buraŭkinym mnie daviałosia sustrakacca i razmaŭlać nie adzin raz – kali-niebudź pastarajusia napisać pra heta padrabiaźniej. Farmalnaje naša znajomstva, adnak, pačałosia tolki ŭviesnu 1990 hoda, kali ja ŭžo byŭ abrany narodnym deputatam BSSR, a Hienadź Mikałajevič źbiraŭsia adjazdžać u Ńju-Jork, kudy jaho nakiravali pastajannym pradstaŭnikom tahačasnaj savieckaj respubliki pry AAN. Nabiŭsia ŭ znajomyja ja tady nievypadkova. Reč u tym, što paśla taho, jak ja byŭ vyłučany kandydatam u deputaty Viarchoŭnaha Savieta 12-ha sklikańnia pa Navapołackaj – Maładziožnaj vybarčaj akruzie, partyjnyja stratehi vyrašyli zrabić Hienadzia Buraŭkina maim supiernikam. Partyjnaja dyscyplina – reč žorstkaja, i vydatnamu paetu i Čałavieku daviałosia schitravać. Jon nie davaŭ svaim šefam ani stanoŭčaha, ani admoŭnaha adkazu da dnia napiaredadni zakančeńnia terminu rehistracyi kandydataŭ. A ŭ hety samy apošni dzień raptam… pahadziŭsia bałatavacca na adnoj z połackich akruh. Paŭtaraju: asabista mianie jon tady nie viedaŭ, ale viedaŭ, što ja idu na vybary pry padtrymcy Biełaruskaha Narodnaha Frontu (u Navapołacku heta byli Uładzimir Arłoŭ, Siaržuk Sokałaŭ-Vojuš, Vinceś Mudroŭ, staršynia tamtejšaj Rady inžynier Anatol Kulik…).
Ščyra skažu: ja tady sam chacieŭ by, kab Hienadź Mikałajevič staŭ deputatam, bo jon byŭ nie tolki cudoŭnym paetam, a i daśviedčanym dziaržaŭnym dziejačam, i biełaruščynie nikoli b nie zdradziŭ. Ale ŭ mocna zrusifikavanym Navapołacku jon vybary moh by nie vyjhrać. Čamu ich vyjhraŭ ja? Miž inšaha i tamu, što na aficyjnych pieradvybarčych płakatach, što visieli kala kožnaha navapołackaha doma, było paznačana, što ja, pavodle nacyjanalnaści, ruski. Nu i papularnaść kandydataŭ-členaŭ KPSS u toj čas u maim horadzie była, miakka kažučy, nievialikaj.
A toj učynak Hienadzia Mikałajeviča varty pierajmańnia. Asabliva siarod ciapierašniaha pakaleńnia palitykaŭ…
P. S. Na tych vybarach u Połacku Hienadź Buraŭkin istotna apiaredziŭ usich kankurentaŭ. Ale partyjnaja namienkłatura ŭžo jamu pomściła i zrabiła ŭsio, kab u druhim tury hałasavańnia jaŭka vybarščykaŭ akazałasia mienšaj za vymahanyja piaćdziasiat pracentaŭ.
Kamientary