Sprava pamierłaha ŭ SIZA Ihara Pcičkina: Pravodzicca novaja pravierka
4 śniežnia praviali ekshumacyju cieła Ihara Pcičkina. Rodnyja jašče nie majuć vynikaŭ paŭtornaha ŭskryćcia.
«Zaklučeńnie ekśpierta hatovaje. Ale mamie pakul nie dajuć pačytać: maŭlaŭ, u śledčaha nie chapaje času sustrecca — paralelna viadzie jašče adnu spravu», — raskazała siastra pamierłaha Iryna.
Pradstaŭnik Śledčaha kamiteta Julija Hančarova paviedamiła, što pa vynikach paŭtornaj ekśpiertyzy ciapier pravodzicca pravierka pravilnaści akazańnia miedycynskaj dapamohi supracoŭnikami SIZA. Vyniki buduć paźniej.
Rodnyja Pcičkina taksama adznačyli, što paśla śmierci Ihar staŭ fihurantam jašče adnaho rasśledavańnia — pa spajsach.
«Vyklikajuć u Śledčy kamitet siabroŭ Ihara, cikaviacca ŭ ich, na jakich mašynach brat jeździŭ i kudy. Jany skazali, što na Andreja N. zaviali kryminalnuju spravu. I jon nibyta śviedčyŭ, što Ihar pradavaŭ spajsy. Ale my adšukali Andreja, i jon skazaŭ, što prachodzić tolki jak śviedka. Brat moj miortvy — i na jaho možna skazać što zaŭhodna. Mamu taksama vyklikali davać pakazańni. Heta my tak razumiejem, što na Ihara zaviali kryminalnuju spravu. Na kaho jašče, kali ŭsie prachodziać śviedkami?»
— raskazvaje Iryna.
«U vas niedakładnaja infarmacyja. Ni pa jakoj spravie jon nie prachodzić», — paviedamiŭ pradstaŭnik upraŭleńnia Śledčaha kamiteta pa Minsku Alaksandr Hierasimaŭ.
21-hadovy Ihar Pcičkin pamior u SIZA na Vaładarskaha 4 žniŭnia 2013. Chłopiec musiŭ adbyć trochmiesiačny aryšt: sieŭ za rul aŭto, chacia byŭ pazbaŭleny pravoŭ.
Na sustrečy z načalnikam SIZA rodnym chłopca paviedamili, što ŭ Ihara 3 žniŭnia pačałosia «psichamatornaje ŭzbudžeńnie». I jaho źmiaścili ŭ miedycynskuju čaść, «dzie daviałosia fiksavać jaho miakkimi ramianiami». Na fotazdymkach trupa Pcičkina zaŭvažnyja šmatlikija siniaki. Foty vykładzienyja ŭ ahulny dostup u internet.
U śmierci chłopca vinavaciać fielčara minskaha SIZA № 1, jaki dziažuryŭ u noč śmierci. Raspačata kryminalnaja sprava za nienaležnaje vykanańnie prafiesijnych abaviazkaŭ miedrabotnikam, što paciahnuła za saboj pa nieaściarožnaści śmierć pacyjenta.
Rodnyja Pcičkina praviali 14 vieraśnia kala SIZA na Vaładarskaha akcyju z patrabavańniem rasśledavańnia spravy, u vyniku jany byli zatrymanyja. Jany ličać, što Ihara bili pierad śmierciu.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym6
Kamientary