Biełaruś sprabavała błakiravać prapanovy ES, pryniatyja na naradzie bakoŭ kanviencyi Espaa Jeŭrapiejskaj ekanamičnaj kamisii AAN, jakija praduhledžvali zaprašeńnie MAHATE da supracoŭnictva ź Biełaruśsiu dla acenki vybaru placoŭki Astravieckaj AES, a taksama vyvučeńnia prajektavańnia i ekspłuatacyi stancyi.
Pra heta BiełaPAN paviedamiła ekołah Taćciana Novikava, jakaja pradstaŭlała na naradzie hramadskaje abjadnańnie «Ekadom».
Narada bakoŭ kanviencyi Espaa na siehmiencie vysokaha ŭzroŭniu prachodziła ŭ Ženievie 2—5 červienia. U im, aprača aficyjnaj biełaruskaj delehacyi, uziali ŭdzieł aktyvisty niaŭradavych arhanizacyj «Ekakłub», «Ekadom», Greenpeace, Green Network.
U vyniku z-za pazicyi biełaruskaj delehacyi ŭpieršyniu za ŭsiu historyju kanviencyi Espaa rašeńnie narady bakoŭ, što tyčyłasia boku-ŭdzielnika i ŭtrymlivała sprečnyja dla Biełarusi prapanovy ES, było pryniata šlacham hałasavańnia. Pracedura hałasavańnia praduhledžana miechanizmami pryniaćcia rašeńniaŭ, adnak nikoli raniej nie prymianiałasia, bo ŭsie pytańni vyrašalisia kansiensusam, što źjaŭlajecca asnoŭnym pryncypam AAN.
Kiraŭnik aficyjnaj biełaruskaj delehacyi, pastajanny pradstaŭnik Biełarusi pry mižnarodnych arhanizacyjach u Ženievie Michaił Chvastoŭ nastoiŭ na tym, kab hałasavańnie było tajnym, a ŭ padlikovuju kamisiju ŭvajšli pradstaŭniki Rasii i SAAZ, jakija nie źjaŭlajucca bakami pieramoŭnaha pracesu. Śpiecyjalna dla pracedury była pabudavanaja impravizavanaja skrynia i nadrukavanyja biuleteni.
U vyniku hałasavańnia rašeńnie było pryniata sa značnaj pieravahaj hałasoŭ nie na karyść Biełarusi — 31 suprać 4. Hetaja pracedura abaviazvaje Biełaruś pryznać i vykanać punkty, jakija joj nie padabajucca.
«Vynik hałasavańnia byŭ pradvyznačany, bo ŭ krain ES było bolš jak try čverci hałasoŭ, niezaležna ad pracedury hałasavańnia. Biełaruś u adzin viečar straciła imidž krainy, jakaja surjozna stavicca da svaich abaviazacielstvaŭ», — tak prakamientavaŭ situacyju ekołah Andrej Andrusievič.
U svaju čarhu Taćciana Novikava miarkuje: prapanovy ES byli nastolki miakkimi i niaznačnymi, što radykalnyja pavodziny biełaruskaj delehacyi nie mieli pad saboj nijakich padstaŭ.
«Patrabavańnie tajnaha hałasavańnia pa pytańniach, adno ź jakich Biełaruś sama dzień tamu łabiravała (pryznańnie fakta pryniaćcia kančatkovaha rašeńnia ab budaŭnictvie Biełaruskaj AES), a druhoje adpaviadała štatnamu pijaru biełaruskich atamščykaŭ i było źviazana ź misijaj MAHATE, mieła dvajaki vynik», — zaznačyła jana ŭ kamientaryi BiełaPAN.
«Majo hłybokaje škadavańnie vyklikaje toj fakt, što aficyjnaja Biełaruś pakazała svaju niezhavorlivać i niesurjoznaść, publična pierakreśliŭšy svaje pazityŭnyja dasiahnieńni, jakija raniej prajavilisia ŭ častkovym vykanańni rekamiendacyj Kamiteta i palapšeńnia zakanadaŭstva. Inšy vynik takich pavodzin — dyskredytacyja idei budaŭnictva AES na mižnarodnym uzroŭni, chutčej, pazityŭny dla Biełarusi, pakolki realizacyju hetaha niebiaśpiečnaha prajekta treba spynić jak maha raniej», — padkreśliła Novikava.
Miž tym Michaił Chvastoŭ arhumientavaŭ dziejańni aficyjnaj delehacyi Biełarusi tym, što jana nie była hatova da źmianieńniaŭ u prajekt rašeńnia, jakoje prapanoŭvałasia kamitetam pa ažyćciaŭleńni Kanviencyi Espaa. U dakumiencie vykazvałasia nadzieja na toje, što dalejšy razbor zdymie pytańni da Biełarusi nakont nievykanańnia Kanviencyi.
Biełaruś ratyfikavała kanviencyju Espaa ab acency ŭździejańnia na navakolnaje asiarodździe ŭ tranśmiežavym kantekście 10 listapada 2005 hoda. 16 červienia 2011-ha Kamitet pa ažyćciaŭleńni kanviencyi Espaa pryniaŭ skarhu Litvy na Biełaruś nakont nievykanańnia Kanviencyi pry budaŭnictvie AES. Z 2009 hoda Kamitet vioŭ razbor pa budaŭnictvie Biełaruskaj AES u adpaviednaści sa skarhaj ukrainskaj hramadskaj arhanizacyi «Ekakłub».
