Makiej daŭ intervju niezaležnaj infarmacyjnaj kampanii BiełaPAN

U Biełarusi nie adčuvajuć ejfaryi z nahody padpisańnia dahavora ab stvareńni Jeŭrazijskaha ekanamičnaha sajuza (JEAES), zajaviŭ ministr zamiežnych spraŭ Uładzimir Makiej u intervju BiełaPAN.

«Ejfaryi z hetaj nahody my nie adčuvajem, tamu što dahavor u toj formie i ŭ tym vyhladzie, u jakim jon ciapier byŭ padpisany, nie adpaviadaje tamu dahavoru, jaki byŭ pradekłaravany ŭsimi bakami raniej», — adznačyŭ jon. 

«Mierkavałasia, što heta budzie dahavor biez usiakich vyklučeńniaŭ i abmiežavańniaŭ u šerahu adčuvalnych śfier — heta nafta, haz, miedycynskija i lekavyja srodki, aŭtapieravozki, pasłuhi, šerah inšych važnych śfier, dzie pakul zachavalisia vyklučeńni i abmiežavańni. Biełaruś była hatovaja pajści na adpaviednyja kroki nasustrač našym partnioram. Ale, na žal, našy partniory nie byli hatovyja da taho, kab pajści na likvidacyju ŭsich vyklučeńniaŭ i abmiežavańniaŭ va ŭzajemnym handli», — kanstatavaŭ Makiej. 

Jon źviarnuŭ uvahu na toje, što ahulnaj ekanamičnaj prastory ŭ miežach hetaha dahavora pakul jašče nie isnuje:

«Pakul havorka idzie pra asobnyja rynki troch krain z adpaviednymi vyklučeńniami i abmiežavańniami. Tamu zamiest taho, kab adbić hetyja damoŭlenaści na trochbakovaj asnovie, my vymušany byli pajści na zaklučeńnie damoŭlenaściaŭ na dvuchbakovaj asnovie». U toj ža čas, adznačyŭ Makiej, nichto nie moža harantavać, što ŭ budučyni nie adbudziecca jakich-niebudź zbojaŭ. «Ale ŭ nas jość vyraznyja damoŭlenaści, uvasoblenyja ŭ pravavuju jurydyčnuju formu, jakija dazvalajuć nam spakojna hladzieć na naša supracoŭnictva va ŭsich adčuvalnych śfierach», — zajaviŭ jon. 

Tłumačačy, čamu Biełaruś padpisała dahavor, jakim była niezadavolenaja, Makiej adznačyŭ: «Hutarki nie mohuć praciahvacca biaskonca.

U hetaj situacyi važna było pajści na padpisańnie hetaha dahavora. Sam fakt jaho padpisańnia byŭ važny, tamu što heta aznačała praciah dalejšych našych intehracyjnych pracesaŭ. My nie mahli tarmazić hetyja pracesy. My ŭbačyli, što na hetym etapie, skažam, pieraadoleć pazicyju našych partnioraŭ pa tych ci inšych pytańniach niemahčyma. Tamu była znojdzienaja kampramisnaja formuła na hetym etapie». 

«Kali b my ŭpierlisia łbom u ścianu i demanstratyŭna zajavili ab nieprymańni pazicyi našych partnioraŭ, to heta było b absalutna niapravilna, — padkreśliŭ kiraŭnik MZS.

— My, liču, u hetaj situacyi znajšli kampramisnyja raźviazki adčuvalnych pytańniaŭ. Biełaruś pastupiła absalutna karektna i pravilna ŭ hetaj situacyi, zychodziačy znoŭ-taki z našych nacyjanalnych intaresaŭ». 

Makiej padkreśliŭ, što ŭ dahavory ab stvareńni JEAES «vyrazna prapisanyja etapy stanaŭleńnia i vyrašeńnia adčuvalnych pytańniaŭ, u tym liku pa supracoŭnictvie na rynkach nafty i hazu». Na dumku kiraŭnika MZS, Biełaruś pavinna być kroŭna zacikaŭlenaja ŭ tym, «kab być aktyŭnym udzielnikam intehracyjnych pracesaŭ, atrymlivać prefierencyi i dyvidendy ad hetaha i raźvivać svaju ekanomiku». 

«Siońnia try čverci (pavodle danych AAN) suśvietnaha handlu ažyćciaŭlajecca praz rehijanalnyja abjadnańni, — adznačyŭ ministr. — Kali my, nievialikaja dziaržava, chočam vyžyć, my nie pavinny zastavacca ŭ baku ad intehracyjnych pracesaŭ, tym bolš tych pracesaŭ, jakija tut u nas lažać na pavierchni. Dumaju, što heta aksijoma — my abaviazany ŭdzielničać u Mytnym sajuzie i Adzinaj mytnaj prastory, u budučym Jeŭrazijskim ekanamičnym sajuzie. Tady heta pryniasie peŭnuju addaču dla našaj krainy». 

Pavodle słoŭ Makieja, Biełaruś raźličvaje, što ŭ budučyni «i na Uschodzie, i na Zachadzie zrazumiejuć nieabchodnaść uzajemapraniknieńnia ekanomik i ES, i budučaha Jeŭrazijskaha ekanamičnaha sajuza, tamu što heta pryniasie karyść narodam našych krain».

Kiraŭnik MZS nie padzialaje tryvohi niekatorych ekśpiertaŭ nakont taho, što paśla padpisańnia dahavora ab stvareńni JEAES biełaruskija pradpryjemstvy pavykuplaje rasijski aliharchičny biźnies. «My nie majem namieru addavać na vodkup nijakim aliharcham — niachaj heta budzie rasijskija, jeŭrapiejskija ci amierykanskija — toje dabro, jakoje było nažyta šmatlikimi pakaleńniami biełaruskaha naroda. Heta — pryncypovaja pazicyja kiraŭnika dziaržavy. Dumać, što siudy ŭ adzin momant pryjdzie rasijski kapitał i pavykuplaje ŭsio na korani, absalutna niapravilna», — padkreśliŭ Makiej. 

Pavodle jaho słoŭ, sutnaść dahavora ab stvareńni JEAES zaklučajecca ŭ farmiravańni roŭnych umoŭ dla subjektaŭ haspadarańnia krain. «Pra kankurentazdolnaść dumać treba, ale havaryć ab tym, što našy tavary drennyja, — heta zusim nie tak. Zadača zaklučajecca ŭ tym, kab pastajanna ŭdaskanalvacca i nie stajać na miescy. Kankurentazdolnaść — heta takaja katehoryja, pra jakuju treba dumać uvieś čas i ŭsiudy, niachaj heta budzie Biełaruś, ZŠA ci Rasija», — pierakanany kiraŭnik źniešniepalityčnaha viedamstva. 

• 0
• 0
• 0
• 0
• 0
• 0
• 0
• 0