Alaksandr Łukašenka zahadaŭ Nacyjanalnamu banku Biełarusi raspracavać kompleks mier, jakija prymusiać ŭsie banki krainy, asabliva stvoranyja z udziełam zamiežnaha kapitału, padzialicca z APK svaim «niemałym prybytkam».
Narada pa prablemach ahrapramysłovaha kompleksu Biełarusi, jakaja prajšła ŭ aŭtorak, pavinna była stać zvyčajnym budzionnym mierapryjemstvam. Nichto nie čakaŭ ni ŭzrušeńniaŭ, ni jakich-niebudź niečakanych zakanatvorčy inicyjatyŭ. Cichi chod pieraŭtvareńniaŭ u APK harantavaŭ i sam Alaksandr Łukašenka, jaki nie raz zajaŭlaŭ, što raźvićcio kompleksu pavinna iści biez revalucyjnych pieraŭtvareńniaŭ, kab nie stracić taho, što ŭžo dasiahnuta. Akramia taho, usim viadomaja žudasnaja alerhija kiraŭnika dziaržavy na ŭsie revalucyjnaje, što mianiaje zvyčajny ład žyćcia.
Ale jak by prezident nie paźbiahaŭ revalucyjnych situacyj, jon sam takuju situacyju i stvaryŭ, kali ŭ siaredzinie narady raptam zrabiŭ niečakanuju zajavu, jakaja tyčycca biełaruskich bankaŭ. Kiraŭniku dziaržavy nie spadabaŭsia toj fakt, što bolšaść kamiercyjnych bankaŭ krainy, dzie dziaržava nie maje kantrolnaha pakieta i tamu nie moža ŭpłyvać na ich palityku, faktyčna samaŭchililisia ad padtrymki biełaruskaha APK. Ničoha dziŭna ŭ hetym samaŭchileńnie niama, uličvajučy toj fakt, što z hodu ŭ hod raście abjom niaviernutych kredytaŭ APK. Ale heta tolki ŭ tym vypadku, kali nie hladzieć na situacyju vačyma kiraŭnika dziaržavy.
Prezidenta aburyŭ toj fakt, što niehatyŭnyja nastupstvy ad niaviernutych kredytaŭ i restrukturyzacyi praterminavanaj zapazyčanaści niasie tolki dziaržava ŭ asobie kantralavanych im bankaŭ. A ŭ hety čas inšyja kamiercyjnyja banki, i asabliva stvoranyja z udziełam zamiežnaha kapitału, «atrymlivajuć niemały prybytak ad svajoj dziejnaści na terytoryi Respubliki Biełaruś».
«Ja patrabuju poŭnaha kiravańnia i kaardynacyi dziejnaści hetych bankaŭ. Banki pavinny pačynać pracavać, jak u savieckija časy, i nieści za heta adkaznaść. U nas zanadta vialikaja volnica ŭ bankach, asabliva z zamiežnym kapitałam,» — zajaviŭ Alaksandr Łukašenka.
Zychodziačy z zadumanaha, prezident daŭ adpaviednyja daručeńni staršyni praŭleńnia Nacyjanalnaha banka Biełarusi. Havorka idzie ab padrychtoŭcy kompleksu mier, jakija prymusiać kamiercyjnyja banki, asabliva stvoranyja z zamiežnym kapitałam, aktyŭna padklučycca da padtrymki biełaruskaha APK i pačać vydavać sielhaspradpryjemstvam kredyty pa źnižanych pracentnych staŭkach. Adkrytym zastałosia tolki adno pytańnie: za čyj košt adbudziecca heta źnižeńnie?
Reakcyi samych bankiraŭ jašče nie było, ale, niesumnienna, jana budzie. Chacia kiraŭnik dziaržavy pakłaŭ voka hałoŭnym čynam na prybytak bankaŭ, stvoranych z zamiežnym kapitałam, dzie pieršuju skrypku hraje Rasija.
Ciapier čytajuć
«Jany čamuści dumajuć, što ich zaraz zhvałciać». Prapahanda kinułasia tušyć abureńnie biełarusaŭ 150 tysiačami pakistancaŭ23
Kamientary